Njimbo 51
51
Ntembezelo wekukumbila mazwiibhatigo
1Ibeni ne ngoni mundili, Ndzimu,
kuyendidzana nge ludo gwenyu gusingazunguzike;
bukushani matjinyo angu kuyendidzana ne ngoni dzenyu.
2Sukani milandu yangu kwazo,
kakale musuke tjibi tjangu.
3Ngobe ndoziba milandu yangu,
ne tjibi tjangu tji mbeli kwangu misi yose.
4 #
Baroma 3:4
Ndakatjinyidzila imwi koga,
ndikathama tjakabipa mu mesho enyu,
kuti ndizo shamu yamunoloba bathu benyu ibe mu malebeswa
ne ngekuti mushayiwe nlandu ha mupedza ndebo.
5Malebeswa hwuti ndakazwagwa ndina jinyo,
ndakabe ntjinyi mme yangu betola ntumbu.
6Moshaka lebeswa mukatikati kwe nthu;
ndizo mundidiye butjenjedu mu moyo wangu.
7Mundisuke nge hosapu ndizo ndowobe mbuyanana;
mundisuke, ndizo ndowobe ntjena kupinda kapuku.
8Thamani kuti ndihwe mpululu ne shatho;
thamani kuti mafupa amakapkhwanya ashathe.
9Zwimbani mesho enyu kuti musibone zwibi zwangu,
kakale mubukushe milandu yangu yose.
10Bumbani mundili moyo mbuyanana, Ndzimu,
kakale mulonge meya tshwa yakalulwama mukati kwangu.
11Musinditatile kutjena namwi,
kakale mosinditolele Meya yenyu yakayengemala.
12Mundibgwilizile shatho ye jidzo lenyu,
kakale musimise mukati kwangu meya inoshaka ndulamo.
13Ndizo ndowodiya batjinyi zila dzenyu,
ngono batjinyi banowoshandukila kumuli.
14Munditjidze mukutebula lopa, Ndzimu,
imwi Ndzimu we jidzo langu,
ngono lulimi gwangu gowombila pezhugwi ngekwe jidzo lenyu.
15She, mumunulani nlomo wangu,
ndizo ndowomukudza ndiwo.
16Amutoda zwibhayilo;
Ha ndabe ndingadusa zwipo zwakapisiwa,
amungazwishathile.
17Tjibhayilo tjinoamutjilika ku Ndzimu,
i meya yakahwa zogwadza;
moyo umukuhwa zogwadza amungaulingile pasi.
18Thamilani Ziyoni kwakalulwama mu kushatha kwenyu;
bakani kakale makuma e Jerusalema,
19ndizo mowoshathisiwa nge zwibhayilo zwakapelela zwakapisiwa;
ndizo mikono inowobhayigwa mu zwibeso zwenyu.
Kalanga Bible © Bible Society of Botswana, 2008, 2018.