Njimbo 49
49
Madatha e kugalabgwe mu fumwa
1Ihwani woku imwi bathu bose;
teedzani imwi bagali be shango yose,
2bapasi kose ne bakamilidzika,
bafumi kose ne bashayi.
3Nlomo wangu unowoleba butjenjedu;
ndebeleko ye moyo wangu inowobe kuhwisisa.
4Ndowoteedza makungulupeswa;
ndowolidza dende awana dabilo ye malipa.
5Ini nditja mu misi ye kudziyidzika,
ha matjinyo aibabo banobhayana
nami akandipoteleka,
6ibabo banogalamoyo mu fumwa dzabo kakale
bezwikudza ngekwe bunji gwe thundu dzabo?
7Malebeswa, akuna nthu tjaangatenganya butjilo nditjo,
akuna themba nthu yaangabigila Ndzimu nge kwago.
8Tjinotenganya butjilo themba yatjo i pezhugwi kwazo,
kakale akungashingikale
9kuti nthu atjilile tjose, asitongongina mu gomba.
10Ngobe atilinga batjenjedu, towana befa;
tjilengwe ne tjihema banoloba bose
besiyila bamwe fumwa yabo.
11Zwikumbu ndizo mizi yabo nge kusingapele,
ndiwo magalo abo ne zwizekugwana zose,
nenguba bakatumila shango nge mazina abo.
12Koga nthu angagalile tjose mu kuzwikudza kukwe
unonga phuka dzinoloba.
13Elo ndilo bhelelo le zila ye bulengwe,
bhelelo la ibabo banoshathisiwa nge thundu dzabo.
14Se pkhwizi, bakashaligwa gomba le lufu;
lufu gowobe nlisi wabo;
banodelukila koga mu ikumbu,
ne mbumbiko yabo inowokolomoka;
Gomba le lufu ndilo linowobe nzi wabo.
15Koga Ndzimu unowodzutunula meya yangu
mu simba le lufu,
ngobe iwo unowondiamutjila.
16Musitje ha bamwe befuma,
ha fumwa dze mizi yabo dzipaphidzika.
17Ngobe ha befa akuna tjabanowosenga,
fumwa yabo ayitowobatobela.
18Nenguba mu butjilo gwabo bakabe bezwidwa beti bakashatha,
ngoti nthu unokudziwa ha wuzwithamila kwakanaka,
19banowoyenda kuna bobatategulu babo,
ibabo basingatjawobona tjedza kakale.
20Koga nthu angagalile tjose mu kuzwikudza kukwe;
unonga phuka dzinoloba.
Kalanga Bible © Bible Society of Botswana, 2008, 2018.