Njimbo 42
42
LUKWALO GWE BUBILI
(Njimbo 42—72)
Ntembezelo we ntapiwa
1Ndzimu, ndakamushuba
se bhizha lishuba vula dzinowunga.
2Meya yangu ina nyota ye Ndzimu.
Ndowodza abona buso gwe Ndzimu lini?
3Mishodzi yangu yatjibe zojiwa zwangu
siku ne sikati,
ha bathu ibo bedwilila beti kundili,
“Ungayi Ndzimu uwo?”
4Zwithu izwezwi ndozwikumbula
andidusa tjinogwadza meya yangu:
Sekwa ndakayenda ne bunji,
ndakagutungamila takalongolokela ku ng'umba ye Ndzimu,
timimila nge kushatha nenge njimbo dzinoboka,
mbunga uli mu nzano.
5Ini uli mu buyendasi iwe meya yangu,
ini wakanyalala mukati kwangu?
Galabgwe mu Ndzimu ngoti ndowowukudza kakale,
iwo bhatsho yangu
ne Ndzimu wangu.
6Meya yangu imu buyendasi mukati kwangu,
ndizo ndomukumbula
ndili mu shango ye Jorodani neye Hemoni,
kudwa ku Dombo le Miza.
7Misundila inodana misundila
mu nsindo we mabilila enyu.
Matuthu ne mabundo e vula yenyu akandifukidza.
8Masikati Yahwe banolakidza ludo gwabo gusingazunguzike,
mu busiku ndomba lumbo gwabo,
ntembezelo ku Ndzimu we butjilo gwangu.
9Ndodwa Ndzimu shongwe yangu nditi,
“Ini makandikangang'wa?
Ini ndakafanila yendayenda nge kuhwazogwadza
ndakatshambilidziwa nge tjita?”
10Ndonga ndina banga gulu mu mbili wangu,
banyanyayidzi bangu banondisapula,
bedwilila beti,
“Ungayi Ndzimu uwo?”
11Ini uli mu buyendasi meya yangu,
ini ulinyelele mukati kwangu?
Galabgwe mu Ndzimu, ngobe ndowoti kakale awukudza,
mbhatshi wangu, Ndzimu wangu.
Kalanga Bible © Bible Society of Botswana, 2008, 2018.