Njimbo 36
36
Bubi gwe bathu
1 #
Baroma 3:18
Kutjuluka nlayo we Ndzimu kwe mbiimbi,
kukati mukatikati kwe moyo wangu,
mu nli kutja Ndzimu akupo.
2Ngoti unozwitjengedza mu nkumbulo eti,
jinyo lile alingazibgwe likabengiwa.
3Matama e nlomo uwe i mbipo ne kutjebela,
wakaletja kushinga nge butjenjedu
nenge kuthama tjakalulwama.
4Unoluka maano mabiibi alilele mu ngubo dzidze,
wakazwilonga mu zila isakalulwama,
aatolambana ne bubi.
5Yahwe ludo gwenyu gusingazunguzike
goandamila kudzimu, kugalikamoyo
kwenyu koswika ku makole.
6Ndulamo yenyu inotungama se matombo e Ndzimu,
kusumikilisa kwenyu konga gungwa gwakangina.
Nthu ne phuka mozwitjidza imwi Yahwe.
7Ludo gwenyu gusingazunguzike gosheteka seni, Ndzimu.
Bathu bose bangatizhila mu ntutshi we mapapilo enyu.
8Banoja thundu ye ng'umba yenyu nge bunji gwayo,
mobang'wisa mu gwizi gwe kushatha kwenyu.
9Ngobe mu muli kodwilila butjilo;
mu tjedza tjenyu tobona tjedza.
10Dwilidzani ludo gwenyu gusingazunguzike
muna ibabo banomuziba.
Ne jidzo lenyu ngalibe
kuna ibabo bakatambunuka mu moyo!
11Musiletjedze bathu basina mazwibhato
bakanditshamba nge makumbo,
kene kuli iko kutatiwa nge babi.
12Babi balele nge mitumbu;
bakalashigwa pasi, abatotubula milika.
Kalanga Bible © Bible Society of Botswana, 2008, 2018.