Njimbo 37
37
Galabgwe muna Yahwe
1Usizwidziyidze ngekwe bathu babi,
usitongo dwila moyo bashingi be mbipo.
2Ngekuti banowobuna se bushwa,
bebe bewoma se mitinyana minyolo.
3Galabgwe muna Yahwe, ushinge ndulamo
kuti ndizo ugale mu shango ushathile kugadzikana.
4Shatha muna Yahwe,
ngono banowokupa yemula dze moyo uwo.
5Biga butjilo gugo muna Yahwe,
galabgwe mubali ngono ibo banowoshinga.
6Banowodusila ndulamo iyo patjena se tjedza
ne ndulamo iyo se masikati makulu.
7Dzikama mbeli kwa Yahwe,
ubalindile nge moyo nlefu.
Usizwidziyidze ngekwe unodwilila mu zila iye,
kene iye unoluka mano akabipa.
8Uzwidzibe mu kugwadzamoyo,
ne mu bushongola, goyisa mu mbipo koga.
9Ngoti babi banolobesiwa, koga ibabo
banolindila Yahwe banothuwa shango.
10Kowobe tjibakana koga,
babi banowobe basitjipo.
Kene ukalingisisa pa magalo awe,
unowobe asipo ipapo.
11 #
Matewu 5:5
Koga bana moyo nnyolo banowothuwa shango,
ngono banowoshatha mu kubhudilila kwakawanda.
12Mbi unolukila mano nlulwami,
enlinga nge lubengo.
13Koga Yahwe banoseka mbi,
ngono banobona kuti zhuba lile laswika.
14Babi banoshomola mathumo abo bakapeta matati abo,
kutemela pasi ibabo banosheta,
kubulaya ibabo bakatambunuka.
15Mathumo abo anowobhaya mimoyo yabo,
matati abo anowovunika.
16Kushomanana nlulwami kwaanako
koyita pa fumwa njinji ye babi.
17Maboko e babi anowovung'wa,
koga Yahwe banowosimisa bakalulwama.
18Yahwe banoziba mazhuba e basina nlandu,
ne lukata gwabo gowogala nge kusingapele.
19Abangabhakhwe nge shoni mu misi yakabipa,
mu mazhuba e bhamba bana zwakalizana.
20Koga babi banowoloba, zwita zwa Yahwe
zofanana ne bubuya gwe shango, zowopela se busi.
21Mbi unoadzima ngono kasibgwilize tjaanokolota,
koga nlulwami aatonyimana, unopana.
22Ibabo bakakombolegwa ndi
Yahwe banowothuwa shango,
koga babakalonga bhiso banowothubugwa.
23Thambo dze nthu dzodwa muna Yahwe,
koga banosimisa banobashathisa.
24Kene awa aatoti kakandalalila tjose,
ngoti Yahwe bakabhata luboko gugwe.
25Ndakabe ndili ntukununu,
ngono ngwenu ndakwegula.
Koga andithu abona nlulwami elashiwa kene
bana babe bekumbila zojiwa.
26Unopana tjibaka tjose kaadzimana,
ne bana babe banobe gombolelo.
27Siya mbipo, ushinge ndulamo,
ndizo unowogala nge kusingapele.
28Ngoti Yahwe banoda ndulamo,
abangasiye balulwami babo.
Balulwami banowotjengetiwa nge kusingapele,
koga bana be babi banowothubugwa.
29Balulwami banowothuwa shango
bakagala muili nge kusingapele.
30Nlomo we nlulwami unoleba butjenjedu
ne lulimi gugwe goleba ndulamo.
31Nlayo we Ndzimu umu moyo uwe,
aatodzembeleka.
32Mbimbi unolalila nlulwami,
eshaka kumbulaya.
33Koga Yahwe abanganletjedzele mu simba lile,
kene kuli kunletja etilikwa nlandu ha esumikilisiwa.
34Milila Yahwe ulondolodze zila yabo,
ibo banowokukudza ukathuwa shango,
unowobona kulobesiwa kwe babi.
35Ndakabona nthu wakabipa
akapasula se nti we nsida we Lebanoni.
36Ndakapinda ipapo kakale ngono kabe asitjipo,
nenguba ndakanshaka kwakabe kusina paangawang'wa.
37Linga nthu usina nlandu, ubone nthu wakatambunuka,
ngoti una bumangwana.
38Koga batjuluki be nlayo banowolobesiwa tjose,
ludzi gwabo gowobulawa.
39Jidzo le nlulwami lodwa kuna Yahwe,
ndibo dizhilo lile mu nsi we kudziyidzika.
40Yahwe banobabhatsha bakabaangula,
banobaangula mu babi,
ngekuti banotizhila ku bali.
Kalanga Bible © Bible Society of Botswana, 2008, 2018.