Njimbo 35
35
Ntembezelo unokumbila bhatsho
1Yahwe, nyanyayidzanani na ibabo
banonyanyayidzana nami,
igwani na ibabo banogwa nami!
2Tolani tjivikili ne thumo,
mundimile!
3Dusani thumo ne nsebe mubhayane
ne batatamili bangu!
Muti ku meya yangu,
“Ndimi sununguko iyo!”
4Ngababhatisiwe shoni balengudziwe
ibabo banoshaka kundibulaya.
Ngabashandusiwe bakawumana
ibabo banolangana mbipo nge kwangu.
5Ngabange bunye pana phepo,
Ntumwa wa Yahwe ngaabatutudzile mbeli.
6Zila yabo ngayibe zhalima itedzemuke
ntumwa wa Yahwe akatatana nabo.
7Bakanditeya nge gwanga gwabo ndisina nlandu,
bakanditshila bhuzhu ndisina nlandu.
8Kulobesiwa ngakubawile batjakazwikangwang'wa.
Gwanga gwabakateya ngagubhate ibo,
ngabawile muguli balobesiwe.
9Ipapo meya yangu inowoshatha muna Yahwe,
ishatha mu jidzo labo.
10Mafupa angu wose anowoti,
“Yahwe, apa ndiyani unonga imwi kene?
Imwi munotjidza ibabo basina matatabuko
muna ibabo bakabasimila.
Motjidza basina matatabuko
ne basheti muna ibabo banobatolela.”
11Batendeki babiibi banomilika,
banondibhuzwa zwithu zwandisingazibe.
12Banondilipila ndulamo nge mbipo,
be siya meya yangu ili mu kudziyidzika.
13Koga imi ndakati begwala aambala jila le saka,
azwidziyidza nge kuzwinyima zojiwa.
Ndakatembezela ndakakotamisila nsholo pa ifuba tjangu,
14se ndinohwilazogwadza nzwalani kene mwana wa tate.
Ndakanga nthu unolilila mmeyabe,
ndakakotama ndilila.
15Koga ndakati ndikuthiwa bakakubungana ngoshatha,
bakakubungana bebhayana nami,
zwilema zwandakabe ndisingazibe
zwikaleba bubi nge kwangu zwisingamise.
16Bakandidadila bakandikuwelela,
bakandinyenamila nge lubengo.
17Kowobe lini Yahwe makalingilila koga?
Mundigwile mu kundigwisa kwabo,
angulani butjilo gwangu mu shumba.
18Ndizo ndowomuboka mu gubungano gulu,
mu gubungano lakasima ndowomukudza.
19 #
Njimbo 69:4; Johani 15:25 Musiletje zwita zwangu zwinondibenga,
zwikashathila kudziyidzika kwangu,
kakale musiletje ibabo banondibengela suli
bakatsika zhisho nge kushatha.
20Ngobe abatoleba mbakiso,
koga banolukila bagedzikane
mu shango matama e kutjebela.
21Banondiashamisila milomo yabo kwazo,
beti “Ehe, Ehe, mesho edu atjibona tjashingikala.”
22Yahwe, makubona,
musinyalale.
She, musi be kule nami.
23Muzwizunguze mumile fanilo yangu,
mundimile Ndzimu wangu She wangu!
24Lakidzani kuti andina nlandu
kuyendidzana nge ndulamo yenyu
Yahwe Ndzimu wangu,
musibaletje bakandidadila.
25Musibaletje bakazwidwa bakati,
“Ehe, yemula dze mimoyo yedu dzashingikala.”
Musibaletje bakati, “Tapedza naye!”
26Thamani kuti bose banoshathila kudziyidzika
kwangu babhakhwe nge shoni
bahwumane balengudzike.
Thamani kuti shoni dzitshe
banozwikudza pezhugwi kwangu.
27Banoshathila kutambunuka kwangu
ngabamimile nge kushatha,
ngono bapaphe bati, “Yahwe bankulu,
ibo banoshathila mamuko akanaka e nlanda wabo.”
28Ipapo lulimi gwangu gowoleba ngekwe ndulamo yenyu
nenge kukudziwa kwenyu zhuba lose.
Kalanga Bible © Bible Society of Botswana, 2008, 2018.