Njimbo 33
33
Lumbo gunokudza Ndzimu
1Shathani muna Yahwe imwi balulwami,
gudzo lofanila bakatambunuka.
2Kudzani Yahwe nge dende, mubathamile
nlidzo nge tjilidzo tjina misungo ili gumi.
3Mubambile lumbo butshwa, lidzani misungo
iyeyo nge bunyambi umbila pezhugwi.
4Ngoti dama la Yahwe lakatambunuka,
ne nshingo wabo wose unothamiwa nge kugalikabgwe.
5Yahwe banoda ndulamo ne ndulamiso,
shango izhele ludo gwabo gusingazunguzike.
6Kudzimu kwakathamiwa nge dama la Yahwe,
ne zwinjinji zwinowang'wako
zwakathamiwa nge mafemo e nlomo wabo.
7Bakakubunganya vula dze gungwa se dzimu butili,
Bakabiganya vula mu ng'umba dze mbiganyilo.
8Shango yose ngayitje Yahwe,
Bagali bose be shango ngababalumbidze!
9Ngoti bakalebeleka, ngono ikabeyapo,
bakalaula kukashingikala.
10Yahwe banothama ndangano dze tjaba
dzikasibe tjimwe, banopaladza ndongoloso dze bathu.
11Ndongoloso ya Yahwe imili nge kusingapele,
mazwimisilo abo anoyenda nge zwizekugwana zose.
12Kwakakombolegwa itjaba tjina Yahwe bali Ndzimu watjo,
bali bathu babashalula kube thaka yabo!
13Yahwe banolinga pasi bali kudzimu,
banobona bathu bose.
14Kudwa kwabagele mu tjigalo tje bushe
banolinga bagali be shango bose.
15Ndibo banobumba mimoyo yabo bose,
banoziba mishingo yabo yose.
16Mambo aatotjidziwa nge babhayani babe banjinji,
mbhayani aatotjidziwa nge masimba awe makulu.
17Mbizi ye ngwa ate tjimwe tjinga gagwabgwe kukunda,
nge masimba ayo makulu ayingatjidze.
18Bonani, Yahwe banotjengeta ibabo banobatja,
ibabo banogalabgwe mu ludo gwabo gusingazunguzike,
19kuti basunungule meya yabo mu lufu,
ne kubatjidza mu bhamba.
20Meya yedu yakalingilila kuna Yahwe,
ndibo bhatsho yedu ne tjivikili tjedu.
21Ee, mimoyo yedu inoshathisiwa ndibo,
ngoti togalabgwe mu zina labo lakayengemala.
22Ludo gwenyu gusingazunguzike, Yahwe,
ngagube naswi, koga sekwatinogalabgwe mu muli.
Kalanga Bible © Bible Society of Botswana, 2008, 2018.