Njimbo 32
32
Kuzwileba ne kuzwiibhatigwa
1 #
Baroma 4:7, 8 Kwakakombolegwa iye una matjinyo akazwiibhatigwa,
iye una tjibi tjaka vukidziwa.
2Kwakakombolegwa iye usingatilikwe nlandu ndi Yahwe,
iye usina bupitipiti mu meya iye.
3Ha ndisingazwilebe tjibi tjangu,
mbili wangu unoshakadziwa nge kugomela zhuba lose.
4Siku ne sikati shamu yenyu inondikulila.
Simba langu lakapela,
se doba lapedziwa ngopisa kwe tjilimo.
5Ndizo aduma tjibi tjangu,
ngono asisumbike jinyo langu.
Ndakati, “Ndowozwileba matjinyo angu kuna Yahwe,”
ipapo mukandizwiibhatigwa tjibi tjangu.
6Ndizo mmwe ne mmwe unogalamoyo
ngaamutembezele mu nsi we kudziyidzika,
kowoti misundila mikulu ye kudziyila
izha ikasinswikile.
7Ndimwi mabgwatilo angu,
mowondibakila mu mbatsha,
mukandikombeledza nge njimbo dze kusunungugwa.
8Ndowokulaya akudiya zila yawakafanila tobela,
ndowokukumbuludza ndakakulinga nge zhisho langu.
9Usinge mbizi kene mowulo,
ukashaya kuhwisisa,
zwinolaugwa nge tomu,
kuzhe kwa ikoko azwingayendidzane nawe.
10Kudziyila kunji ngekwe babi,
koga ludo gusingazunguzike gwakapoteleka
ibabo banogalabgwe muna Yahwe.
11Shathani muna Yahwe mupululudze,
imwi balulwami, mumimile nge kushatha,
imwi mose be mimoyo yakatambunuka.
Kalanga Bible © Bible Society of Botswana, 2008, 2018.