Njimbo 31
31
Ntembezelo we mbakililo
1Ndotizhila ku muli Yahwe,
musitongondiletja abhatisiwa shoni;
munditjidze nge ndulamo yenyu.
2Mundihweni, mundigwile tjinyolotjo!
Ibeni shongwe ye dizhilo langu,
dizhilo lakasima kunditjidza.
3Ndimwi shongwe yangu ne dizhilo langu,
ngekwe zina lenyu munditungamile, mundikwebe.
4Mundiduse mu gwanga gwandakasumbikigwa,
ngoti ndimwi dizhilo langu.
5 #
Luke 23:46
Meya yangu ndoyilonga mu maboko enyu.
Makandidzutunula Yahwe,
imwi Ndzimu unogalikabgwe.
6Ndobenga ibabo banokudza zwifano zwisina nshingo,
koga imi ndogalabgwe muna Yahwe.
7Ndowoshatha apululudza ngekwe
ludo gwenyu gusingazunguzike,
ngoti makabona kudziyidzika kwangu,
mukaziba tshiyilo yangu.
8Amuzondilonga mu maboko e tjita tjangu,
makamisa makumbo angu pathu pakashaladuka.
9Ibeni ne ngoni nami Yahwe,
ngoti ndimu kudziyidzika,
mesho angu anyala ngolila,
meya yangu ne mmbili wangu zwanyalabo.
10Butjilo gwangu gwashakadziwa ngohwa zogwadza,
makole angu atapudziwa ngolila.
Simba langu lopedziwa nge tshiyilo yangu,
ne mafupa angu ashakala.
11Ndi madado pakati kwe zwita zwangu
ndotjisa ku babakidzani bangu.
Ibabo banondibona mu dzizila banonditizha.
12Ndatjibhuda mu mikumbulo se nthu wakafa,
ndatjinga tjija tjakapkhwanyika.
13Ee ndohwa banjinji benyebezela beti,
kotjisa pamwe ne pamwe!
Banolangana nge kwangu,
belanganila kundibulaya.
14Koga ndomugalabgwe Yahwe,
ndoti “Mu Ndzimu wangu.”
15Misi yangu imu maboko enyu;
mundiangule mu maboko e zwita zwangu
ne muna banondidziyidza.
16Buso gwenyu ngagupenyele nlanda wenyu;
munditjidze mu ludo gwenyu gusingazunguzike.
17Musindiletje abhatisiwa shoni Yahwe,
ngoti ndodana imwi.
Letjani babi babhatisiwe shoni,
ngabangine mu bugalo gwe bafi nge tjitu.
18Milomo inonyepa ngainyaladziwe,
inozwikudza izwida,
ilengudza balulwami.
19Ndulamo yenyu ihwulu seni,
iyo yamakabigila ibabo banomutja,
ya munothama mu mesho e bana be bathu,
muthamila ibabo banotizhila ku muli.
20Makabasumbika ngekubepo kwenyu,
mubasumbikila ndangano dzakabipa dze bathu,
makababakilila mu nshasha wenyu
mubavikila milomo ina zwilebo.
21Yahwe ngabakudziwe,
ngoti bakandilakidza ludo gwabo gunotjenamisa,
mu tjibaka tjandakabe ndakakombiwa
se nzi nkulu wakombiwa nge ngwa.
22Ndakati ndapaluka moyo ati,
“Ndatatigwa kutjena namwi.”
Koga imwi mohwa tjililo tjangu,
ha ndikumbila bhatsho yenyu.
23Idani Yahwe imwi mose bayengemali!
Yahwe banotjidza banogalamoyo,
koga banobgwilizila nge buzhalo iye unozwikudza.
24Simani, mube nge tjilopa,
imwi mose makalindila Yahwe.
Kalanga Bible © Bible Society of Botswana, 2008, 2018.