Njimbo 30
30
Ntembezelo wekuboka
1Ndowomukudza Yahwe ngobe makandimilidza,
amuzoletja zwita zwangu zwikandikuwelela.
2Yahwe Ndzimu wangu
ndakamulilila ndishaka bhatsho yenyu,
ngono makandipodza.
3Yahwe makadusa meya yangu mu bugalo gwe bafi,
munditjidze kudwa muna ibabo bakangina mu gomba.
4Mbilani Yahwe njimbo dzinobakudza
imwi bayengemali babo,
mukudze zina labo lakayengemala.
5Ngoti bushongola gwabo gotola tjibaka tjitukununu,
koga moyontjena wabo awutopela.
Tjililo tjingabe tje busiku,
koga shatha kozha ne mangwanana.
6Nge kwangu mukubhudilila kwangu ndakati,
“Andingatongotshedugwa.”
7Nge kundimila, Yahwe,
makandidzikila se dombo lakasima.
Koga makati musumbika buso gwenyu,
adziyidzika.
8Ndakalilila imwi Yahwe,
ndakakumbila ku muli Yahwe.
9“Mowobuyigwa ngeni mu lufu gwangu,
ha ndinginila pasi mu gomba?
Apa hwuluba inowomukudza kene?
Apa inowoleba ngekwe kugalikabgwe kwenyu?
10Mundihwe Yahwe, mube nge ngoni nami!
Yahwe, ibeni mbhatshi wangu!”
11Makashandula tjililo tjangu tjikabe nzano.
Makandimbula tjiambalo tjangu tje saka,
ngono mukandiambadza kushatha,
12kuti ndizo meya yangu imukudze isinyalale.
Yahwe Ndzimu wangu,
ndowomuboka nge kusingapele.
Kalanga Bible © Bible Society of Botswana, 2008, 2018.