Njimbo 28
28
Ntembezelo unokumbila bhatsho
1Ndodana imwi Yahwe, shongwe yangu,
musilambe kundihwa.
Ha mungandinyalalila,
ndowonga ibabo banongina mu gomba.
2Ihwani tjililo tjangu,
ndililila kumuli ndishaka bhatsho,
ndimilidzila maboko
ku bugalo gwenyu gwakayengemala.
3Musindikakatile kuzhe ne babi,
na ibabo bashingi be bubi,
banoleba kunyalala ne babakidzani babo,
koga mu mimoyo yabo kuna busada.
4 #
Zumbunulo 22:12
Mubalipe kuyendidzana ne mishingo yabo,
kuyendidzane ne mbipo ye mishingo yabo.
Mubalipe kuyendidzana ne mishingo ye maboko abo.
Mubape mbhayilo wakabalingisana.
5Ngobe abana hanya nge mishingo ya Yahwe,
kene mishingo ye maboko abo,
banowobalobesa bakasitjababumbe kakale.
6Yahwe ngabakudziwe,
ngobe bakahwa kukumbila kwangu.
7Yahwe ndibo simba langu ne tjivikili tjangu,
moyo wangu unogalabgwe mu bali.
Ndizo ndobhatshiwa ne moyo wangu wakashatha,
ndobakudza nge lumbo gwangu gwe kuboka.
8Yahwe ndibo simba le bathu babo,
ndilo dizhilo linotjidza nzhodziwa wabo.
9Tjidzani bathu benyu,
kombolelani thaka yenyu.
Ibeni nlisi wabo, mubabhabhe nge kusingapele.
Kalanga Bible © Bible Society of Botswana, 2008, 2018.