Njimbo 27
27
Ntembezelo we kukudza
1Yahwe ndibo tjedza tjangu ne jidzo langu,
ndiyani wandingatja kene?
Yahwe ndibo dizhilo langu,
ndingatja ani kene?
2Ha babi bendinginilila
kuti bandibulaye,
babengi bangu ne zwita zwangu,
banowokuthiwa bakawa.
3Kene ndingakombiwa ne ngwa,
anditowotja,
kene ngwa ingandiwila,
koga ndowobe ne kugalabgwe.
4Tjing'ompela tjithu tjandakakumbila kuna Yahwe,
nditjo tjandinowovima.
Wuti ndigale mu ng'umba ya Yahwe,
mazhuba wose e butjilo gwangu,
kubona bubuya gwa Yahwe
ne kuzwidiya mu ng'umba yabo.
5Ngoti banowondisumbika mu bugalo gwabo
mu zhuba le kudziyidzika,
banowondisumbika mu tente yabo,
banowondigadza pezhugwi kwe shongwe.
6Ndizo ndowomilidzika kupinda
zwita zwangu zose kundipoteleka.
Ndowodusa zwipo nge mpululu mu tente ya Yahwe.
Ndowomba nge nlidzo wakanaka ndimbila Yahwe.
7Ihwani Yahwe ha ndimudana,
mundihwile ngoni mundidabile!
8Moyo wangu nge kwenyu ukati, “Shaka buso gwabo!”
Buso gwenyu Yahwe, ndigo gwandinoshaka.
9Musindisumbikile buso gwenyu.
Musigwadzemoyo mukatata nlanda wenyu,
imwi magala muli bhatsho yangu.
Musindilashe, musindifupatile,
imwi Ndzimu we jidzo langu.
10Kene tate na mme bangandilasha,
Yahwe banowondiamutjila.
11Mundidiye zila yenyu Yahwe,
munditungamile mu zila yakatambunuka
ngekwe zwita zwangu.
12Musiletje zwita zwangu zwikandithama kuda kwazo
batendeki be manyepkhwa bakandimukila,
mafemo abo anolakidza mbatsha kundili.
13Ndogalamoyo kuti ndowobona
bubuya gwa Yahwe mu shango ye batjili.
14Galabgwe muna Yahwe
sima, ukulumbidzike,
galamoyo muna Yahwe.
Kalanga Bible © Bible Society of Botswana, 2008, 2018.