Njimbo 19
19
Kukudziwa kwe Ndzimu
1Mazhuzhugwi anoleba bukulu gwe Ndzimu,
zhiyendakuyenda lolakidza mishingo ye maboko awo.
2Zhuba lolebeleka libudza limwe,
busiku golakidza gumwe zibo.
3Akuna ndebeleko kene matama,
akuna pasingahwike nsindo wazo.
4 #
Baroma 10:18
Nsindo wazo unobhudila mu shango yose,
matama awo anohwika ku phelelo dze shango.
Ndzimu wakabakila zhuba nshasha mu ali,
5ilo linobhuda se nkwasha ebhuda mu ng'umba iye,
lolabuka mu zila yalo lakashatha se nlume wakasima.
6Lobhuda mu lubizho gumwe gwe shango,
likayenda likanomilila ku gumwe.
Akuna tjakabgwatila kupisa kwalo.
Nlayo wa Yahwe
7Nlayo wa Yahwe uzhele,
unomusidzila meya.
Ndaulo dza Yahwe dzogalikabgwe,
dzotjenjedza basakatjenjela.
8Milayo ya Yahwe ina malebeswa,
inoshathisa moyo.
Ndaulo ya Yahwe yakatjena,
inozhula mesho.
9Kutja Ndzimu kubuyanana,
kugele nge kusingapele.
Milayo ya Yahwe yakatambunuka,
yakalulwama.
10Inodika kupinda golide,
Inozipa kupinda butji gwe
nyutji gudotha mu mape.
11Nlanda wenyu unotjenjedziwa ndiyo,
kuyilondolodza kuna mbuzilo hwulu.
12Koga apa ndiyani ungabona milandu iye kene?
Mundizwiibhatigwe milandu yakasumbikika.
13Mundidzibe mu matjinyo e mwaza,
musialetje akandilaula.
Ndizo ndowolulwama tjose,
ndowobe ndasununguka mu kutjuluka nlayo.
14Matama angu nenge njalakang'wa
dzangu ngadziamutjilike kumuli,
imwi Yahwe dizhilo langu, Ndzutunuli wangu.
Kalanga Bible © Bible Society of Botswana, 2008, 2018.