Njimbo 18
18
Lumbo gwa Dafite gwe kushathila kukunda
(2 Samuele 22:1-51)
1Ndomuda Yahwe, imwi masimba angu.
2Yahwe ndibo simba langu,
ndibo dizhilo langu.
Ndzimu wangu,
ndibo dizhilo langu landinotizhila kulili,
tjivikili tjangu, simba le jidzo langu, bhakasa langu.
3Ndodana Yahwe, ibo bakafanigwa ngokudziwa,
ngono ndatjidziwa mu zwita zwangu.
4Misungo ye lufu yakandipomba,
maphatjaphatja e golomodzo akandikulila.
5Mitjili ye ikumbu yakandipomba,
mapuzhu e lufu ambeli kwangu.
6Mu kudziyidzika kwangu ndakadana Yahwe;
Ndakalilila ku Ndzimu wangu kuti undibhatshe.
Mu Ng'umba yawo kahwa hwi langu.
Tjililo tjangu tjikaswika mu zebe dzidze.
7Ndizo shango yakazunguzika ikatengenyeka,
thiwabo dze matombo dzikazunguzika,
ngoti Ndzimu wakabe wagwadzamoyo.
8Busi gukathungayila mu zwimilo zwawo,
moto unopisa ukadwa mu nlomo wawo,
masimbe anothuta kadwa muuli.
9Ukapalula zhuzhugwi ukadelukila pasi,
makole matema alikusi kwe makumbo awo.
10Ukatatha tjerubhu ukawuluka,
ukazha nge lubilo mu mapapilo e phepo.
11Ukazwizwimba nge zhalima;
makole matema e vula
akamandana akaupoteleka.
12Mu lupenyo gwakabe guli mbeli kwawo,
tjivulamabgwe ne masimbe
e moto zwikapubulidza makole.
13Yahwe kakale bakadadamula bali kuzhuzhugwi,
Upezhugwi zhugwi kadusa hwi lile
ne tjivulamabgwe ne moto.
14Bakaposa misebe yabo bakapaladza zwita zwabo,
bakapenyesa lupenyo gwe vula bakazwipaladza.
15Ludondo gwe gungwa gukaboneka,
ne thiwa dze shango dzikabe patjena,
Yahwe ha mutjemela,
nge bushongola gwenyu.
16Bakaabilila kudwa zhuzhugwi bakanditola,
bakandidubula mu vula yakangina.
17Bakandiangula mu tjita tjangu tjakasima,
ne muna ibabo banondibenga,
ngoti bakabe bakandikunda.
18Ndakati ndakasimigwa, bakandigwisa,
koga Yahwe bakandiangula.
19Bakandiyisa mu magalo akatalabuka,
bakandiangula ngoti bakandishathila.
20Yahwe banondipa mbhayilo
kuyendidzana nge ndulamo yangu,
banondibuzila kuyendidzana nge mishingo yangu.
21Ndakalondolodza zila dza Yahwe,
andizothama mbipo ngofupatila Ndzimu.
22Ndayo dzabo dzose dzakanditungamila,
ne ndaulo dzabo andizodzikupila kutjena.
23Ndakasibe ne nlandu mbeli kwabo,
ndakazwidziba mu jinyo.
24Yahwe bakandipa mbhayilo
kuyendidzana nge ndulamo yangu
kuyendidzana ngekusabe nge nlandu kwangu.
25Kuna banogalikabgwe molakidza kugalikabgwe,
kuna basina nlandu molakidza kusheta nlandu,
26kuna bakatjenapala mozwilakidza makatjenapala,
kuna bakakombama muna bushongola.
27Motjidza banozwiyisa pasi,
koga banozwikudza mobabhatisa shoni.
28Imwi Yahwe ndimwi munothutisa luvone gwangu.
Ndzimu wangu unoshandula zhalima langu kube tjedza.
29Nge simba lenyu ndothasela babhayani,
ha ndina Ndzimu wangu ndotjuluka guma.
30Ndzimu iwoyu zila dzawo dzakalulwama seni,
kugadzabgwe kwa Yahwe ku malebeswa,
tjivikili tja bose banotizhila ku bali.
31Ndzimu ndiyani ha isi Yahwe?
Shongwe ndiyani ha isi Ndzimu wedu.
32Ndzimu ndiwo unondipa masimba,
ndiwo unothama zila yangu ikasibe ne mbatsha.
33 #
Habakuku 3:19
Wakathama makumbo angu kanga makumbo e zilawa,
wakandibiga pakagadzikana pezhugwi.
34Unodiya zwiazha zwangu kugwa,
kuti ndizo maboko angu angapeta dati le phangula.
35Mondipa tjivikili tje jidzo lenyu,
ne luboko gwenyu gwe luji gwakanditjengeta,
bhatsho yenyu yakandithama nkulu.
36Makatalabudza pamile makumbo angu,
kuti ndizo makumbo angu asitongosodzoloka.
37Ndakatatana ne zwita zwangu azwibhata;
Andizoshanduka kuswikila zwapela.
38Ndakabatemela pasi bakasitjatubule kumuka,
bakawila pasi kwe makumbo angu.
39Makandipa masimba e kugwa,
mukathama kuti zwita zwangu zwindithigamile.
40Mothama kuti zwita zwangu zwinditizhe,
na ibabo banondibenga ndobalobesa.
41Bakalila beshaka bhatsho,
koga akuna wakababhatsha.
Bakanodana Yahwe koga abazobadabila.
42Ndobakwiya bakasala benga hwuluba
inowulusiwa nge phepo.
Ndobatebula se dope le zila.
43Makandigwila mu bathu be bapanduki.
Makandithama ntungamili we zwitjaba;
bathu bandakabe ndisingazibe banondishingila.
44Tjinyolotjo ha ndilebeleka banondihwa.
Bataya banondithigamila.
45Bataya bakatemeka mafupa,
banozha betetema bebhuda mu matizhilo abo.
46Yahwe banotjila! Ngakukudziwe shongwe yangu,
ngakulumbidziwe Ndzimu we jidzo langu,
47iwo Ndzimu wakandibgwilizilila
ukaisa tjaba pasi kwangu,
48ukandigwila mu zwita zwangu.
Wakandikudza kupinda zwita zwangu,
ukandidusa mu phipiti
ukandiangula mu bathu banoda phipiti.
49 #
Baroma 15:9
Ndizo wali ndowomukudza
pakati kwe zwitjaba imwi Yahwe,
amba njimbo dzinokudza zina lenyu.
50Yahwe unopa mambo uwe kukunda,
bakalakidza nzhodziwa wabo ludo gusingapele,
iye Dafite ne ludzi gugwe.
Kalanga Bible © Bible Society of Botswana, 2008, 2018.