Njimbo 148
148
Bathu banolumbidziwa kukudza Ndzimu
1Kudzani Yahwe!
Kudzani Yahwe muli kudzimu,
mubakudze muli pezhugwi tjose!
2Mubakudze, mose batumwa babo
mibunga yabo yose mubakudze!
3Mubakudze, imwi zhuba ne mwedzi,
mubakudze, imwi nyenyedzi dzinopenya!
4Mubakudze, imwi mazhuzhugwi zhugwi,
namwi vula dzipezhugwi ku makole!
5Zose ngazwikudze zina la Yahwe,
ngobe bakadusa ndaulo ngono zwikathamiwa!
6Bakazwithama kuti zwibeyapo nge kusingapele kose,
bakabiga milayo igelile tjose.
7Kudzani Yahwe muli mu shango,
imwi mazhithu e gungwa ne madziba wose,
8Lipenyo gwe vula ne tjivulamabgwe,
kapuku ne makaa,
dutu linohwa ndaulo yabo!
9Matombo ne matuthu wose,
miti ye mitjelo ne ye misida!
10Phuka dze shango ne zwithuwo zose
ne zwitjili zose ne nyuni dzinowuluka!
11Bomambo be shango ne bathu bose,
bakololo be bushe ne babusi bose be shango.
12Bazhuzha kose ne baanadi
bathuntana kose ne batjetjana!
13Ngabakudze zina la Yahwe,
ngobe ndilo zina loga linokudziwa,
gudzo labo lipezhugwi kwe kudzimu ne shango.
14Bakamilidzila bathu babo lunyanga
kulumbidza bagalimoyo babo bose,
bethamila bathu be Iziraela bapejo ne moyo wabo.
Kudzani Yahwe!
Kalanga Bible © Bible Society of Botswana, 2008, 2018.