Njimbo 147
147
Kudziwa kwe Ndzimu Masimbawose
1Kudzani Yahwe!
Kwakanaka seni kumba njimbo
dzinokudza Ndzimu wedu,
ngobe una ngoni,
kakale lumbo gunobakudza gobafanila!
2Yahwe banobaka Jerusalema,
banokubunganya Baiziraela bakabe batapiwa.
3Banopodza be mimoyo yakapaluka,
kakale banosunga mabanga abo.
4Banolaula mbalo ye nyenyedzi,
banodzitumila mazina adzo dzose.
5She bedu bankulu kwazo,
kakale bana masimba makulu,
hwisiso yabo ayina tjilizanyo.
6Yahwe banomilidza banozwiyisa pasi,
Yahwe banoposela babi pasi.
7Mbilani Yahwe nge mboko,
thamilani Ndzimu wedu nlidzo
unozipa nge tjilidzo tje laya!
8Yahwe banofukidza zhuzhugwi nge makole,
banonisa vula mu shango,
banomedza bushwa mu matuthu.
9Banopa phuka zojiwa zwadzo,
ne majindana e makungubo ha elila.
10Nzhazho wabo aute uli mu masimba e mbizi,
kene shatho yabo aite ili mu lubilo gwe nlabuki.
11Koga Yahwe banoshathila ibabo banobatja,
muna banogalabgwe ludo gwabo gusingazunguzike.
12Kudza Yahwe, iwe Jerusalema!
Kudza Ndzimu uwo, iwe Ziyoni!
13Ngobe banosimisa mazhalilo e mikoba iyo,
banokombolela bathu ba mukuli.
14Banokupa kunyalala mu migathu iyo,
banokugutsha nge korong mbuyanana.
15Banotumilila ndaulo yabo mu shango,
dama labo lolabuka lilibilidza.
16Banozhisa kapuku tjinonga wulu,
banoandamisa makaa se nlota.
17Banoposela tjivulamabgwe pasi se mamburumburu,
apa ndiani ungamilila butotho gwabanozhisa kene?
18Banotuma dama labo, ngono bakazwinyausa,
banothama phepo yabo ikawuwudza,
ne vula dzikawunga!
19Banoleba dama labo kuna Jakubo,
milayo yabo ne ndaulo bakazwipa Iziraela.
20Akuna tjimwe itjaba tjabakatongothamila sa ikoko,
abatoziba milayo yabo.
Kudzani Yahwe!
Kalanga Bible © Bible Society of Botswana, 2008, 2018.