Njimbo 119
119
Nlayo wa Yahwe
1Bakakombolegwa ibabo be zila dzakatambunuka,
banolondolodza nlayo wa Yahwe.
2Bakakombolegwa ibabo banobhata ndaulo dzabo,
banobashaka nge mimoyo yabo yose,
3kakale basingathame tjakabipa,
koga beyenda mu zila dzabo.
4Makabiga milayo yenyu
kuti ilondolodziwe nge buzhalo.
5Dzene zila dzangu dzabe dzakatambunuka
mu kubhata milayo yenyu!
6Ndizo anditowobhatisiwa shoni,
andina hanya ne milayo yenyu yose.
7Ndowomukudza nge moyo wakatambunuka,
andizwidiya ndaulo dzenyu dzakayengemala.
8Ndowotobelela milayo yenyu
musindilashile tjose.
9Apa bathu batjetjana bangathama tjini kuti zila dzabo
dzigale dzili dzakatjenapala kene?
Nge kudzitjengeta kuyendidzana nge dama lenyu.
10Ndomushaka nge moyo wangu wose,
musitongondiletja asalondolodza milayo yenyu.
11Ndakabiganya dama lenyu mu moyo wangu,
kuti ndisitongo mutjinyila.
12Kukudziwa ngakube kumuli, imwi Yahwe,
mundidiye milayo yenyu.
13Nge nlomo wangu ndoleba
ndaulo dzose dzodwa mu nlomo wenyu.
14Ndoshathila kutobelela milayo yenyu,
sekwa nthu angashathila fumwa dzose.
15Ndowokumbula ngekwe milayo yenyu,
ndibe ndizwilingisanya ne zila dzenyu.
16Ndowoshathila milayo yenyu,
anditowokangang'wa dama lenyu.
17Bhatani nlanda wenyu zubuyanana,
ngono ndowotjila alondolodza dama lenyu.
18Zhulani mesho angu, kuti ndizo ndibone
zwithu zwinotjenamisa zwinodwa mu nlayo wenyu.
19Ndi nzhi mu shango,
musindisumbikile milayo yenyu.
20Ndojika mu moyo nge ishubo
ngekwe ndaulo dzenyu mu zwibaka zose.
21Motjemela ibabo banozwikudza,
bana bhiso banomiligwa nge milayo yenyu.
22Dusani masapa abo ne kundidadila kwabo mundili,
ngobe ndolondolodza milayo yenyu.
23Nenguba hadzasha dzigalapasi dzindilukila gwanga,
nlanda wenyu unowokumbula ngekwe milayo yenyu.
24Milayo yenyu i shatho yangu,
ndiyo bakumbuludzi bangu.
25Meya yangu yakakotama ndanamatila mu hwuluba,
mundimuse ngekwe dama lenyu.
26Ndakatindizwileba zwandakathama, mukandidabila,
mundidiye milayo yenyu.
27Mundithame ndihwisise zila dze milayo yenyu,
ndizo ndowokumbula ngekwe matjenamiso enyu.
28Meya yangu yakanyala ngentha ye buyendasi,
mundimuse ngekwe dama lenyu.
29Dusilani zila dze manyepkhwa kutjena nami,
mundidiye nlayo wenyu ne ngoni.
30Ndakashalula zila ye kugalikabgwe
ndakabiga ndaulo dzenyu mbeli kwangu.
31Ndakanamatila milayo yenyu, imwi Yahwe,
thamani kuti ndisibhatisiwe shoni.
32Ndowolondolodza milayo yenyu ndakalonga meya
mu nyama, apaphidza kuhwisisa kwangu.
33Mundidiye, imwi Yahwe, zila ye milayo yenyu,
ngono ndowoilondolodza kunoti ku bupelo.
34Mundipe kuhwisisa, kuti ndilondolodze nlayo wenyu
ndibe ndiutjengete ne moyo wangu wose.
35Munditungamile mu zila ye milayo yenyu,
ngobe ndoyishathila.
36Tendebudzilani moyo wangu ku milayo yenyu,
kusi kushaba kwe bugovu.
37Shandusani mesho angu mu kulinga zwisi zwa tjimwe,
mundipe butjilo mu zila dzenyu.
38Zhadzisani kugadzabgwe kwenyu, mu nlanda wenyu,
ikoku kwa ibaba banomutja.
39Shandulilani kulengudzika kwandinotja kutjena nami,
ngobe ndaulo dzenyu dzakalulwama.
40Bonani ndakashuba milayo yenyu,
mu ndulamo yenyu mundipe butjilo.
41Ludo gwenyu gusingazunguzike ngaguzhe kundili imwi Yahwe,
jidzo lenyu kuyendidzana nge kugadzabgwe kwenyu.
42Ndizo ndodabila ibabo banondidadila,
ngobe ndogalabgwe mu dama lenyu.
43Musitole dama le malebeswa mu nlomo wangu,
ngobe kugalabgwe kwangu kumu ndaulo dzenyu.
44Ndowolondolodza nlayo wenyu,
nge kusingapele kose.
45Ndowoyenda ndakasununguka,
ngobe ndakashaka milayo yenyu.
46Ndowolebeleka ngekwe milayo yenyu mbeli kwa bomambo
kakale anditowobhatisiwa shoni,
47Ndoshathisiwa nge milayo yenyu,
ngobe ndoida.
48Ndowomilidzila maboko ku milayo yenyu, iyo yandinoda,
kakale ndowokumbula ngekwe milayo yenyu.
49Kumbulani dama lenyu ku nlanda wenyu,
ngobe makandipa kugalabgwe.
50Ndilo linondinyaladza mu kudziyidzika kwangu,
ngekuti kugadzabgwe kwenyu konditjidza.
51Banozwikudza banondidadila kusina tjilizanyo,
koga anditoshandukila nlayo wenyu.
52Ndokumbula ndaulo dzenyu dza ntolo imwi Yahwe,
ndowana nyaladzo mudzili.
53Moyo wangu unopisa ngekwe babi,
ibabo banoletjedza nlayo wenyu.
54Milayo yenyu yagala ili njimbo dzangu,
mu ng'umba yandinolala ndili mu gwendo.
55Mu busiku ndokumbula zina lenyu, imwi Yahwe,
kakale ndolondolodza nlayo wenyu.
56Makombolegwa andakapiwa,
ngobe ndakalondolodza milayo yenyu.
57Yahwe ndibo gobe langu,
ndogadzabgwe kuti ndowohwa matama enyu.
58Ndakashaka buso gwenyu nge moyo wangu wose,
ibeni nge ngoni nami kuyendidzana nge kugadzabgwe kwenyu.
59Ndakalingisisa zila dzangu,
ashandusila makumbo angu ku milayo yenyu,
60Ndowolibilidza, ndisinganonoke
kulondolodza milayo yenyu.
61Nenguba misungo ye babi indipomba,
anditowokangang'wa nlayo wenyu.
62Busiku ndomukila kumukudza,
ngekwe ndaulo dzenyu dzakayengemala.
63Ndi nzwalani wa bose banomutja,
wa bose banolondolodza milayo yenyu.
64Imwi Yahwe, shango izhele ludo gwenyu gusingazunguzike,
mundidiye milayo yenyu.
65Makathamila nlanda wenyu bubuya,
kuyendidzana ne dama lenyu, imwi Yahwe.
66Mundidiye kusumikilisa kwakatambunuka ne luzibo,
ngobe ndogalamoyo mu milayo yenyu.
67Ndakati ndisathu alobgwa shamu ndakabe ndakalashika,
koga ngwenu ndohwa dama lenyu.
68Makalulwama kakale mothama bubuya,
mundidiye milayo yenyu.
69Banozwikudza banondibhomedza manyepkhwa,
koga ndobhata milayo yenyu nge moyo wangu wose.
70Mimoyo yabo mikodu,
koga imi ndoshathila nlayo wenyu.
71Kwakandilulwamila kuti ndibe ndakalobgwa shamu,
kuti ndizo ndizwidiye milayo yenyu.
72Nlayo we nlomo wenyu wakandinakila kwazo
kupinda zwiwulu zwinjinji zwe siliva ne golide.
73Maboko enyu akandithama kakale kandibumba,
mundipe hwisiso kuti ndizwidiye milayo yenyu.
74Ibabo banomutja banowondibona bakashatha,
ngobe ndakagalamoyo mu dama lenyu.
75Ndoziba, imwi Yahwe, kuti kusumikilisa kwenyu kwakatambunuka,
ngoti makandiloba shamu nge kugalikabgwe kwenyu.
76Ludo gwenyu gusingazunguzike gumilile kundinyaladza,
kuyendidzana ne kugadzabgwe kwenyu ku nlanda wenyu.
77Ngoni dzenyu ngadzizhe kundili, kuti ndizo nditjile,
ngobe nlayo wenyu i shatho yangu.
78Banozwikudza ngababhatisiwe shoni,
ngobe banoshaka kundilengudza nge bupitipiti,
koga imi ndokumbula ngekwe milayo yenyu.
79Thamani kuti ibabo banomutja bashandukile kundili,
kuti ndizo bazibe milayo yenyu.
80Moyo wangu ngausibong'we nlandu ngekwe milayo yenyu
kuti ndizo ndisitongobhatisiwa shoni.
81Meya yangu inotshwigwa ngekwe jidzo lenyu,
ndogalabgwe mu dama lenyu.
82Mesho angu atjinyala ngolindila gadzabgwe kwenyu,
ndobhuzwa nditi, “mowondinyaladza lini?”
83Ndotjinga gukhwa le nkumbi we zhambi lili mu busi,
ipapa ndisakatongokangang'wa milayo yenyu.
84Apa nlanda wenyu adzikitadze kuswikila lini kene?
Apa mowosumikilisa banondigwadzisa lini kene?
85Banozwikudza bakanditshila makomba,
bathu basingatobele nlayo wenyu.
86Milayo yenyu yose inogalikabgwe
ndodziyidziwa kusina tjandatjinya mundibhatshe!
87Bakashokobe bandidusa mu shango,
koga andizolasha milayo yenyu.
88Mu ludo gwenyu gusingazunguzike musitole butjilo gwangu,
kuti ndizo ndibhate milayo ye nlomo wenyu.
89Yahwe bayapo nge kusingapele,
dama lenyu lakadzikila kudzimu.
90Kugalikabgwe kwenyu kodwilila kunoti ku zwizekugwana zose
makathama shango, ngono yakadzikila.
91Nge ndaulo yenyu zwithu zwimile nasi,
ngobe zwithu zose zoshingila imwi.
92Ha nlayo wenyu wakabe usi shatho yangu,
ndobe ndakafa ngolobgwa shamu kwangu.
93Anditowofa ndakangang'wa milayo yenyu,
ngobe makabiganyidzila butjilo gwangu ndiyo.
94Ndiwenyu, munditjidze,
ngobe ndakashaka milayo yenyu.
95Babi bakandilalila kuti bandilobese,
koga ndokumbula milayo yenyu.
96Ndakabona bhelelo le ndizanyo yose,
koga milayo yenyu ayina tjilizanyo.
97Imi, ndoda milayo yenyu seni!
Ndokumbula ngekwayo sikati lose.
98Nlayo wenyu unonditjenjedza kupinda zwita zwangu,
ngobe unogalila tjose nami.
99Ndohwisisa kupinda badiyi bangu bose,
ngobe milayo yenyu ndiyo gumbuludzo langu.
100Ndohwisisa kupinda bakwegula,
ngobe ndohwa milayo yenyu.
101Ndodziba makumbo angu mu zila dzose dzakabipa,
kuti ndizo ndibhate dama lenyu.
102Anditoshandukila ndaulo dzenyu,
ngobe makandidiya.
103Matama enyu anozipa tjini mu lulimi gwangu,
anozipa kupinda butji gwe nyutji mu nlomo wangu!
104Nge milayo yenyu ndowana kuhwisisa,
ndizo ndobenga zila dzose dze manyepkhwa.
105Dama lenyu luvone gwe makumbo angu,
ne tjedza tje zila yangu.
106Ndakatuna abuya akushingikadza,
kulondolodza ndaulo dzenyu dzakayengemala.
107Ndakadziyidzika kwazo, mundipe butjilo,
imwi Yahwe, kuyendidzana ne dama lenyu.
108Amutjilani zwipo zwangu zwe kukudza, imwi Yahwe,
kakale mundidiye ndaulo dzenyu.
109Ndodwilila ndakabhata butjilo gwangu nge luboko gwangu,
koga anditokangang'wa nlayo wenyu.
110Babi bakandilukila gwanga,
koga andizolashika mu milayo yenyu.
111Milayo yenyu ndiyo lukata gwangu nge kusingapele kose,
ndiyo shatho ye moyo wangu.
112Ndakashandulila moyo wangu mu kuhwa milayo yenyu
nge kusingapele kose, kunoti ku bupelo.
113Ndobenga bathu bana moyo mibili,
koga ndoda nlayo wenyu
114Ndimwi dizhilo langu ne tjivikili tjangu,
ndogalabgwe mu dama lenyu.
115Idwani pandili imwi bashingi be bubi,
kuti ndibhate milayo ye Ndzimu wangu.
116Mundibhatshe kuyendidzana ne kugadzabgwe
kwenyu, kuti ndizo nditjile, kakale musindiletje
abhatisiwa shoni mu kugalabgwe kwangu.
117Mundibhate, kuti nditjile
ndidwilile ndina hanya nge milayo yenyu.
118Molasha bose banolashika mu milayo yenyu,
ngobe butjakwani gwabo mwina we tjigu.
119Bose babi be shango mobatola se malala,
ndizo ndoda milayo yenyu.
120Mmbili wangu unotetemesiwa nge kumutja,
ndotja kusumikilisa kwenyu.
121Ndathama kwakatambunuka nenge ndulamo,
musindiletjedzele mu batshambilidzi bangu.
122Gadzanibgwe nlanda wenyu kuti mowonthamila bubuya,
musiletjedzele basina Ndzimu kuti banditshambilidze.
123Mesho angu atjinyadziwa ngolindila jidzo lenyu,
ne kuzhadzisika kwe kugadzabgwe kwenyu kwakalulwama.
124Thamilani nlanda wenyu kuyendidzana ne ludo gwenyu gusingazunguzike,
kakale mundidiye milayo yenyu.
125Ndi nlanda wenyu, mundipe hwisiso,
kuti ndihwisise milayo yenyu.
126Tjabe tjibaka tjenyu imwi Yahwe, kuti mutole thambo,
ngobe nlayo wenyu auzotobegwa.
127Sa ikoku, ndoda milayo yenyu,
kupinda golide, kupinda golide yakatjena.
128Malebeswa ndolingisanya makumbo angu ne milayo yenyu yose,
ndobenga zila imwe ne imwe ye manyepkhwa.
129Milayo yenyu inotjenamisa,
ndizo meya yangu inoilondolodza.
130Petenuka kwe matama enyu kopa tjedza,
kopa basi be tjimwe hwisiso.
131Ndofemeleka ndakazhaligwa,
ngobe ndakashuba milayo yenyu.
132Shandukilani kundili mundihwile ngoni,
sekwa munogala muthamila ibabo banoda zina lenyu.
133Tambunudzani miyendo yangu kuyendidzana nge dama lenyu,
musitongoletja jinyo likandilaula.
134Mundidzutunule mu tshambilidzo ye bathu,
kuti ndizo ndilondolodze milayo yenyu.
135Penyeselani nlanda wenyu buso gwenyu,
kakale mundidiye milayo yenyu.
136Mesho angu anowunga mishodzi,
ngoti bathu abatolondolodza nlayo wenyu.
137Makalulwama, imwi Yahwe,
ne kusumikilisa kwenyu kwakalulwama.
138Makabiga milayo yenyu mu ndulamo
nenge mu kugalikabgwe kose.
139Ndobhaika mu moyo nge shungu
ngoti zwita zwangu zwokangang'wa matama enyu.
140Kugadzabgwe kwenyu kwakalikiwa zubuyanana,
ngono nlanda wenyu unokuda.
141Ndintukununu kakale ndolingigwa pasi,
nenguba kwakajalo anditokangang'wa milayo yenyu.
142Ndulamo yenyu i ndulamo isingapele,
kakale nlayo wenyu ndiwo malebeswa.
143Tshiyilo ne buyendasi zwakandizhila,
koga milayo yenyu i shatho yangu.
144Milayo yenyu yakayengemala nge kusingapele,
mundipeni hwisiso kuti nditjile.
145Ndomudana nge moyo wangu wose mundidabile, imwi Yahwe.
Ndowolondolodza milayo yenyu.
146Ndomulilila, munditjidze,
kuti ndilondolodze milayo yenyu.
147Ndobinduka busikwana ndilila ndishaka bhatsho,
ndogalabgwe mu matama enyu.
148Mesho angu anobe akalinga kutangila balindi be busiku,
kuti ndikumbulukigwe kugadzabgwe kwenyu.
149Ihwani hwi langu mu ludo gwenyu gusingazunguzike,
Imwi Yahwe, mu kululwama kwenyu,
tjengetani butjilo gwangu!
150Ibabo banotobela bubi babo pejopejo,
abateli pano ne nlayo wenyu.
151Ipapo imwi muli pejo, imwi Yahwe,
ne milayo yenyu yose i malebeswa.
152Ndakazwidiya mu milayo yenyu ntolo,
kuti makaibiga nge kusingapele.
153Lingani tshiyilo yangu munditjidze,
ngobe andizokangang'wa nlayo wenyu.
154Mundimile mu ndebeleko yangu mundidzutunule,
tjengetani butjilo gwangu kuyendidzana
ne kugadzabgwe kwenyu!
155Jidzo aliteli pano ne babi,
ngobe abatoshaka milayo yenyu.
156Kukulu ngoni dzenyu, imwi Yahwe,
munditjidze kuyendidzana ne ndulamo yenyu.
157Zwita ne banondinyanyayidza banjinji
nenguba kwakajalo, anditoshandukila milayo yenyu.
158Ndolinga basingagalikebgwe, ashima,
ngobe abatolondolodza milayo yenyu.
159Bonani sekwandinoda milayo yenyu,
londolodzani butjilo gwangu kuyendidzana ne ludo gwenyu gusingazunguzike.
160Matama enyu wose malebeswa,
ndulamo ye ndaulo dzenyu dzose imile nge kusingapele.
161Bakololo be bushe banondisumikilisila kusina,
koga moyo wangu unotja matama enyu.
162Ndoshathila dama lenyu,
se nthu wawana thundu yatapiwa ku ngwa.
163Ndobenga kakale ndoshima manyepkhwa,
koga ndoda nlayo wenyu.
164Ndomukudza katendeka nge zhuba,
ngekwe ndaulo dzenyu dzakalulwama.
165Banoda nlayo wenyu bana kunyalala kukulu,
akuna tjinobakutha.
166Ndakalindila jidzo lenyu, imwi Yahwe,
ngono ndoshingikadza milayo yenyu.
167Ndohwa milayo yenyu,
ndoyida kupindisisa.
168Ndohwa milayo ne ndaulo dzenyu,
ngobe zila dzangu dzose modziziba.
169Imani tjililo tjangu tjiswike kumuli, imwi Yahwe.
Mundipe hwisiso kuyendidzana ne dama lenyu.
170Mitembezelo yangu ngaiswike mbeli kwenyu
mundisunungule kuyendidzane ne kugadzabgwe kwenyu.
171Nlomo wangu unowomukudza kunjinji,
ngobe mondidiya milayo yenyu.
172Lulimi gwangu gowomba ngekwe kugadzabgwe kwenyu,
ngobe milayo yenyu yose yakalulwama.
173Luboko gwenyu ngagugale gwakazwilulwamisila
kundibhatsha, ngobe ndolondolodza milayo yenyu.
174Ndina nyota ye jidzo lenyu, imwi Yahwe,
ngobe nlayo wenyu i shatho yangu.
175Tshene munganditjidza kuti ndizo ndimukudze,
ne ndaulo dzenyu dzindibhatshe.
176Ndakamila ndonga pkhwizi yakalashika,
shakani nlanda wenyu,
ngobe anditokangang'wa milayo yenyu.
Kalanga Bible © Bible Society of Botswana, 2008, 2018.