Njimbo 109
109
Ntembezelo we kukunda ne kubgwilizila
1Imwi, Ndzimu wandinokudza, musinyalale koga!
2Ngobe milomo mibibi ne ye bupitipiti inondikuwelela,
banoleba nge kwangu manyepkhwa.
3Banondipomba nge matama e lubengo
kakale bendigwisa ndisina nlandu.
4Banoshandula ludo gwangu nge kundibenga,
nenguba kwakajalo ndobatembezelela.
5Ndizo bakandibokela ndulamo nge mbipo,
bakandibengela ludo gwangu.
6Banoti, “Mumbigile nthu mbiimbi mbeli kukwe,
nthu unontilika nlandu ngaame ku luji gugwe.
7Ha esumikilisiwa, ngaawang'we nlandu,
ntembezelo uwe ngautogwe se tjibi.
8 #
Mishingo 1:20
Mazhuba awe ngaabe mashomanana,
dzene mmwe angatola mamo awe.
9Dzene bana babe bangabe siyang'wa
nenge nkadzi uwe kabe tjilikadzi.
10Dzene bana babe bangadzungayila beyenda bekumbila,
dzene bangatakhwa mu matongo abanogala.
11Dzene baanokolota bangantapila kose kwaanako,
dzene bathu basingazibgwe bangantolela zwizwalo zwe dukuta lile.
12Dzene kungasheta unonhwilangoni,
nenguba ali iye ungahwilangoni siyang'wa dzidze.
13Dzene lutshinga gugwe gungalobesiwa,
dzene zina lile lingafidziwa mu tjizekugwana tje bubili.
14Dzene matjinyo a tate babe angakumbugwa mbeli kwa Yahwe,
ne tjibi tja mmeyabe tjikasibukushiwe,
15ngazwidwilile zwili mbeli kwa Yahwe,
ne kukumbugwa kukwe kulashiwe mu shango.
16Ngobe aazotongo kumbula kulakidza ngoni,
koga wakadziyidza bashayi ne basheti
ne be mimoyo yakapaluka kuswikila befa.
17Wakabe eda kulonga bhiso, bhiso ngalibe munlibo.
Azobe eda kukombolegwa, makombolelo ngaabe kutjena naye.
18Wakazwiambadza bhiso se tjiambalo tjitje,
dzene lingang'wila mu mbili uwe se vula,
se mafuta mu mafupa awe.
19Ngalinge tjiambalo tjaanozwipomba nditjo,
se mwandabula waanozwisunga ndiwo zhuba ne zhuba.”
20Dzene ikoko kungabe mbayilo we banonditilika nlandu muna Yahwe,
wa ibabo banoleba mbipo nge butjilo gwangu.
21Koga imwi, Yahwe She wangu,
mundimile ngekwe zina lenyu,
ngobe ludo gwenyu gusingazunguzike gwakalulwama,
mundisunungule.
22Ngobe ndi nshayi kakale ndi nsheti,
ne moyo wangu wakabhayika mukati kwangu.
23Ndopinda se ntutshi we madekwana,
ndoshashamugwa se phashu.
24Zwidwi zwangu zolengezha ngozwinyima zojiwa,
anditjina nyama pa mbili.
25 #
Matewu 27:39; Mako 15:29 Ndatjibe sapa muna ibabo banonditilika nlandu,
ha bendibona, banodzungudza misholo.
26Mundibhatshe imwi Yahwe, Ndzimu wangu!
Munditjidze kuyendidzana nge ludo gwenyu gusingazunguzike.
27Thamani kuti bazibe kuti igogu luboko gwenyu,
imwi Yahwe, makuthama.
28Bangabalonga bhiso, koga imwi mowokombolela.
Dzene bagwisi bangu bangabhatisiwa shoni,
nlanda wenyu ngaashathe.
29Bagwisi bangu ngabalengudzike,
shoni ngadzibakombole bange basakaambala.
30Nge nlomo wangu ndowoyisa mboko hwulu kuna Yahwe,
ndowokudza Yahwe pakati kwe mbunga we bathu.
31Ngobe banoma ku luboko gwe luji gwe basheti,
kuti babatjidze muna ibabo bangabalashila mu lufu.
Kalanga Bible © Bible Society of Botswana, 2008, 2018.