Njimbo 108
108
Ntembezelo unokumbila kukunda zwita
(Lumbo 57:7-11; 60:5-12)
1Moyo wangu wakadzikama, imwi Ndzimu,
moyo wangu wakadzikama,
ndowomba lumbo athama nlidzo unozipa.
Muka iwe meya yangu!
2Muka tjilidzo tje dende ne tje laya!
Ndowobinduka mazhokuyedza.
3Ndowomutenda imwi Yahwe, pakati kwe zwitjaba,
kakale ndowomba njimbo dzinomukudza pakati kwe zwitjaba.
4Ngobe ludo gwenyu gusingazunguzike,
gupezhugwi kupinda zhuzhugwi,
kakale kugalikabgwe kwenyu koswika ku makole.
5Kudziwani, imwi Ndzimu, mumilidzigwe
pezhugwi kupinda zhuzhugwi, ne gudzo
lenyu ngalibe mu shango yose.
6Mutikundile nge luboko gwenyu gwe luji,
mubuye mundidabile,
kuti ndizo ibabo bamunoda batjidziwe.
7Ndzimu wakagadzabgwe,
uli mu bugalo gwawo gwakayengemala:
“Mu kukunda ndowothubukanya Shekemu,
kakale ndowokobanya nkuku we Sukoti.
8Giliyadi nde yangu na Manase nde yangu;
Ifureimi i hwutshe ye tjivikili tje nsholo wangu,
Juda i swimbo yangu ye bushe.
9Moabu i bhavu landinongulila;
Edomu iye ndomposa nge shangu yangu;
ndomimilila Filisitiya ngobe ndankunda.”
10Ndiyani unowondiyisa ku nzi nkulu wakabakiligwa nge luswingo?
Ndiyani unowonditungamila ndiyenda ku Edomu
11Apa amuzotilasha kene Ndzimu?
Amutoyenda ne babhayani bedu Ndzimu.
12Mutibhatshe mu zwita,
ngobe bhatsho ye nthu ayina nshingo.
13Ndzimu unowotipa tjilopa
ndiwo unowotshamba zwita zwedu nge makumbo.
Kalanga Bible © Bible Society of Botswana, 2008, 2018.