Njimbo 107
107
LUKWALO GWE BUSHANU
(Njimbo 107—150)
Ndzimu unokudzigwa ndulamo
1 #
1 Zwiyitikalo 16:34; 2 Zwiyitikalo 5:13; 7:3; Ezera 3:11; Njimbo 100:5; 106:1; 118:1; 136:1; Jeremiya 33:11 Tendani Yahwe, ngobe bakalulwama,
ngobe ludo gwabo gusingazunguzike gumile nge kusingapele kose.
2Bakadzutunugwa ndi Yahwe ngabalebe bejalo,
ibabo bakadzutunugwa mu tjiazha tje tjita
3babazwibuzila kudwa mu shango,
kudwa ku bhezhuba ne kudwa golombedzo,
kudwa ku bunandzwa ne kudwa ku burwa.
4Bamwe bakadzungayila mu tjilambanyika tjisina ugele mutjili,
basingawane zila inoyenda ku nzi nkulu kwabangagala.
5Bakabhakhwa nge zhala ne nyota,
bakabe bepela meya.
6Ndizo bakalilila kuna Yahwe mukudziyidzika kwabo,
ngono bakabasunungula mu manikano dzabo.
7Bakabatungamila nge zila yakatambunuka,
kuswikila beswika ku nzi nkulu wabangagala.
8Ngababokele Yahwe ludo gwabo gusingazunguzike,
nenge mishingo yabo inotjenamisa mu bathu.
9Ngobe banogukhwisa bana nyota,
ne bana zhala banobagutsha nge zwithu zwakanaka.
10Bamwe bakagala mu zhalima ne mu lima dema lakatizwi,
basungwa bali mu kuhwazogwadza ne mu dzitshipi,
11ngobe bakapandukila matama e Ndzimu,
bakalasha gumbuludzo le Upezhugwi zhugwi.
12Bakapaugwa nge nshingo unolema,
bakawila pasi, kusina ne unobabhatsha.
13Ndizo bakalilila kuna Yahwe mu kudziyidzika kwabo,
bakabatjidza mu kuhwazogwadza kwabo,
14bakabadusa mu lima ne mu zhalima lakati zwititi,
bakathubula misungo yabo na pakati.
15Ngababokele Yahwe ludo gwabo gusingazunguzike,
nenge mishingo yabo inotjenamisa mu bathu.
16Ngobe banopkhwanya matendele akathamwa nge phangula,
bebuya bethubula mazhalilo e tshipi na pakati.
17Bamwe bakabe begwalisiwa nge zila dzabo dze bubi,
kakale bakadziyila ngentha ye milandu yabo,
18zojiwa zose zwakabe zwibashimisa,
bakashanduka pa gomba le lufu.
19Ndizo bakalilila kuna Yahwe mu kudziyidzika kwabo,
ngono bakabatjidza mu kuhwazogwadza kwabo.
20Bakatumila dama labo ngono likabapodza,
likabatjidza mu kulobesiwa.
21Ngababokele Yahwe ludo gwabo gusingazunguzike
nenge mishingo yabo inotjenamisa mu bathu.
22Ngabaduse zwibhayilo zwe dendo, kakale balebe
ngekwe mishingo yabo nge njimbo dzabo dze shatho.
23Bamwe bakadelukila mu gungwa bali mu zwikepe,
beshaba bali mu vula hwuluhwulu dze gungwa,
24Bakabona mishingo ya Yahwe,
mishingo yabo inotjenamisa mu kati kati kwe vula.
25Ngobe bakalaula kukamilika matutu makulu,
akamilidza matuthu e vula ye gungwa.
26Akamidukila pezhugwi, kabgwilila mukati kati,
bakatemeka mafupa bali mu mbatsha,
27bakadzunguluka bakatshatsharika se bakalaladza,
ne luzibo gwabo gukabe mwina we tjigu.
28Ndizo bakalilila kuna Yahwe mu kudziyidzika kwabo,
bakabadusa mu manikano dzabo,
29bakadzikamisa dutu,
ne matuthu e gungwa akadzikama.
30Ndizo bakashatha ngobe zwakabe zwadzikama,
bakanobaswikisa ku bukotokelo gwe njemulo dzabo.
31Ngababokele Yahwe ludo gwabo gusingazunguzike,
nenge mishingo yabo inotjenamisa mu bathu.
32Ngabamilidzile Yahwe pezhugwi mu gubungano le bathu,
babakudze mu nshangano we bahwola.
33Banoshandula njizi dzikabe tjilambanyika,
misenya ikabe lidondo,
34Shango ye zwizwalo ikabe gukuno,
kuli ngekwe bubi gwe bagali bayo.
35Banoshandula tjilambanyika madziba e vula,
shango ye makwakwa ikashanduka misenya.
36Banothama kuti bana zhala batjilile ipapo,
kakale babake nzi unogagwa muuli,
37banodzwala mu minda, bakadzwala minda ye mizhambi,
ndizo bakavuna kunjinji.
38Nge gombolelo labo, banowanda kwazo,
ngono abatoletja ng'ombe dzabo dzitapudzika.
39Abatapudzika bakabe bashomanana,
balengudzika ngotshambilidziwa, kudziyidzika, nenge kuhwa zogwadza,
40banotebulila kulengudzika mu hadzasha,
bethama kuti badzungayile mu shango pasina zila,
41koga banomilidza basheti mu tshiyilo,
bebe bewatsha misha yabo se ngubi ye pkhwizi.
42Bakatambunuka banokubona bebe beshatha,
koga babi bose banozhalila milomo yabo.
43Batjenjedu ngabateedze zwithu izwezwi,
kakale babe ne njele ngekwe ludo gusingazunguzike gwa Yahwe.
Kalanga Bible © Bible Society of Botswana, 2008, 2018.