Njimbo 106
106
Ndulamo ya Yahwe mu bathu babo!
1 #
1 Zwiyitikalo 16:34; 2 Zwiyitikalo 5:13; 7:3; Ezera 3:11; Njimbo 100:5; 107:1; 118:1; 136:1; Jeremiya 33:11 Kudzani Yahwe!
Tendani Yahwe ngobe bakalulwama,
ngobe ludo gwabo gusingazunguzike gumile nge kusingapele kose.
2Apa ndiyani ungaleba ngekwe mishingo mikulu ya Yahwe,
kene kulakidza kukudziwa kwabo kene?
3Bakakombolegwa bana njele ne ndulamo,
ibabo banothama ndulamo misi yose.
4Mundikumbule, imwi Yahwe, ha mumilila bathu benyu,
mundibhatshe amubatjidza,
5kuti ndibone gombolelo le bashalugwa benyu,
kuti ndishathile shatho ye itjaba tjenyu,
kuti ndimukudzebo ne lukata gwenyu.
6Takatjinya iswi tose na bobatategulu bedu,
takathama tjibi, tikathama bubi.
7 #
Kufuluka 14:10-12
Bobatategulu bedu bali ku Egipiti,
abazothamila hanya mishingo yenyu inotjenamisa,
abazokumbulukigwa bunji gwe ludo gwenyu gusingazunguzike,
koga bakapandukila Upezhugwi pezhugwi pa Gungwa Shaba.
8Koga ibo bakababhatsha bethamila zina labo,
kuti ndizo kuzibgwe ngekwe simba labo gulu.
9 #
Kufuluka 14:21-31
Bakatjemela Gungwa Shaba, gukapkhwa.
Bakabatungamila mu tjilambanyika.
10Ndizo bakabadzutunula mu luboko gwe nnyanyayidzi,
bakabadzutunula mu luboko gwe tjita.
11Vula ika kwididza banyanyayidzi babo.
Akuna ne nng'ompela wabo wakasala.
12 #
Kufuluka 15:1-21
Ndizo bakagalamoyo mu matama abo,
bakamba njimbo dzinokudza Ndzimu.
13Koga tjinyolotjo bakakangang'wa mishingo yabo,
abazolindila gumbuludzo labo.
14 #
Mbalo 11:4-34
Koga bakabe ne kudzungayila kwe njemulo pakati kwe shango,
ndizo bakalika Ndzimu mu tjilambanyika,
15Ukabapa tjabakabe bakumbila,
koga ukatumila bugwele gwakabipa pakati kwabo.
16 #
Mbalo 16:1-35
Balume ba mu mishasha bakathamila Mushe fupa
na Aroni N'yengemali wa Yahwe,
17shango ikazhuka ikamidza Dathani,
kakale ikavukidzila goko la Abiramu.
18Moto na iwobo ukamuka ukapisa goko labo,
nthuto ukapisa babi.
19 #
Kufuluka 32:1-14
Bakathama ifano tje phulu ku Horebu
ngono bakanamata ifano tjakabumbiwa.
20Bakatetshanya gudzo le Ndzimu
nge ifano tje ngabe inofula bushwa.
21Bakakangang'wa Ndzimu ntjidzi wabo,
wakathama zwithu zwikulukulu mu Egipiti,
22mishingo inotjenamisa mu shango ya Hamu,
ne mishingo inotjisa pa Gungwa Shaba.
23Ndizo wakabe eti unobalobesa,
ha Mushe nshalugwa wawo, akabe,
asama mu nkoto mbeli kwawo,
kushandusa bushongola gwawo mu kubalobesa.
24 #
Mbalo 14:1-35
Ndizo bakasola shango inoyemulika,
bakashaya kugalamoyo mu kugadzabgwe kwawo.
25Bakang'ong'ola mu mishasha yabo,
ngono bakasiteedze hwi la Yahwe.
26Ndizo bakamilidza luboko gwabo bakatuna
kuti banowobathama kuti bawe mu tjilambanyika,
27 #
Zwipo 26:33
kakale banowopaladza zwizekugwana zwabo nge zwitjaba,
bebapaladza bezhala shango.
28 #
Mbalo 25:1-13
Ndizo bakazwibhatshanya na Bhaale we Pheori,
bakaja zwibhayilo zwakapiwa bafi,
29Bakashongola Yahwe bebagwadzisa moyo nge mishingo yabo mibi,
ngono shamu ikabawila.
30Ndizo Finihasi kamilika kabakumbilila,
ngono shamu ikamisiwa.
31Ikoku kwakatogwa ili ndulamo ya Finihasi
kudwa mu tjizekugwana kunoti ku tjimwe nge kusingapele kose.
32 #
Mbalo 20:2-13
Bakagwadzisa Yahwe moyo ku misenya ye Meriba,
ngono Mushe wakangina mu manikano nge zila yabo,
33ngobe bakadzonga meya dzidze,
bakathama kuti Mushe alebe matama mafu.
34 #
Basumikilisi 2:1-3; 3:5, 6 Abazolobesa zwitjaba
sekwa kwabakadwiwa ndi Yahwe,
35koga bakalobolelana ne zwitjaba zwipoga
ngono bakazwidiya mipanga yabo.
36Bakashingila midzimu yabo,
kwakabe gwanga ku bali.
37 #
2 Bomambo 17:17
Bakathama bakololo babo zwibhayilo
ne bakololokadzi babo bakababhayila midzimu.
38 #
Mbalo 35:33
Bakatebula lopa lisina nlandu,
lopa le bakololo ne bakololokadzi babo,
babakadusa ili zwibhayilo ku midzimu ye Bakanana,
ngono shango ikatemapadziwa nge lopa lile.
39Bakazwitemapadza nge mishingo yabo,
kakale bakathama bufukula nge zwabanoshinga.
40 #
Basumikilisi 2:14-18
Ndizo Yahwe bakagwadzila moyo bathu babo,
ngono bakashima lukata gwabo,
41bakabalonga mu maboko e zwitjaba zwipoga,
kuti ndizo babusiwe ndi ibabo bakababenga.
42Zwita zwabo zwakabatshambilidza,
bakakundiwa bakabe pasi kwe simba lazo.
43Yahwe bakabagwila kanjinji,
koga ibo bakabapandukila nge mazwimisilo abo,
ngono bakayisiwa pasi ngekwe matjinyo abo.
44Nenguba kwakajalo bakabayitila hanya mu kuhwa zogwadza kwabo,
pabakahwa tjililo tjabo.
45Bakakumbulukigwa tjidumano tjabo nge kwabo,
kuyendidzana nge ludo gwabo gusingazunguzike bakabuza moyo.
46Bakathama kuti bahwigwe zogwadza
nge bathu bose bakabe bakabathama basungwa.
47 #
1 Zwiyitikalo 16:35, 36 Mutitjidze, imwi Yahwe, Ndzimu wedu,
kakale mutikubunganye kudwa mu zwitjaba,
kuti ndizo tiboke zina lenyu lakayengemala
ne gudzo mu kukudziwa kwenyu.
48Ngakukudziwe Yahwe, Ndzimu we Iziraela,
kudwa kusingapele kunoti kusingapele.
Ngono bathu bose ngabati, “Ngakujalo.”
Kudzani Yahwe!
Kalanga Bible © Bible Society of Botswana, 2008, 2018.