Njimbo 105
105
Ndzimu ne bathu bawo
(1 Zwiyitikalo 16:8-22)
1Tendani Yahwe, danani zina labo,
thamani kuti mishingo yabo izibike mu bathu.
2Mubambile, imbani njimbo dzinobakudza,
lebani ngekwe mishingo yabo yose inotjenamisa.
3Gudzo mu zina labo lakayengemala.
Mimoyo ya ibabo banoshaka Yahwe ngaishathe.
4Shakani Yahwe nenge simba labo,
dwililani mushake buso gwabo.
5Kumbulani mishingo inotjenamisa yabakathama,
matjenamiso abo, nenge kusumikilisa kwabakathama.
6Imwi lutshinga gwa Abhurahama nlanda wabo,
bakololo ba Jakubo, bashalugwa babo.
7Ndibo Yahwe Ndzimu wedu,
kusumikilisa kwabo kumu shango yose.
8Banokumbulukigwa tjidumano tjabo nge kusingapele,
ngekwe dama labakadwa, zwizekugwana zwili tjiwulu.
9 #
Kutangisa 12:7; 17:8;
Kutangisa 26:3
Tjidumano tjabakathama na Abhurahama,
kutuna kwabo begadzabgwe Isaki,
10 #
Kutangisa 28:13
kwabakatshambilidza muna Jakubo se nlayo,
muna Iziraela tjili tjidumano nge kusingapele,
11beti, “Ndowomupa shango ye Kanana
se gobe lenyu kube lukata.”
12Pabakabe basibangana nge mbalo,
bali bashomanana, kakale bali bazhi muili,
13beyenda kudwa mu tjaba imwe benoti ku imwe,
bedwa mu mbuso mmwe benoti ku mmwe,
14 #
Kutangisa 20:3-7
akuna wabakadumilila kuti abatshambilidze,
bakatjemela bomambo mu bumo gwabo,
15beti, “Musitongo kuma bazhodziwa bangu,
musitongogwadzisa balebesambeli bangu.”
16 #
Kutangisa 41:53-57
Bakati bezhisa bhamba mu shango
bakapedza zojiwa zose,
17 #
Kutangisa 37:28; 45:5 bakabe batungamidza nlume mbeli kwabo,
Josefa, wakabe atengesiwa ali nlanda.
18 #
Kutangisa 39:20—40:23
Makumbo awe akahwisiwa zogwadza nge miketani,
ntshibha uwe wakapombedziwa tshipi,
19kuswikila tjaakaleba tjishingikala,
dama la Yahwe lakanlika.
20 #
Kutangisa 41:14
Mambo wakalaila kuti asunungugwe,
nlauli we itjaba wakansunungula.
21 #
Kutangisa 41:39-41
Wakanthama she we ng'umba iye,
ne nlauli we thundu iye yose,
22kuti ape ndaulo hadzasha dzawo se kwaanoda
kakale kuti adiye batungamili babe butjenjedu.
23 #
Kutangisa 46:6;
Kutangisa 47:11
Ndizo Iziraela akazha mu Egipiti,
Jakubo wakagala se nzhi mu shango ya Hamu.
24 #
Kufuluka 1:7-14
Ngono Yahwe bakawatsha bathu babo kwazo,
kakale bakabasimisa kupinda zwita zwabo,
25bakashandula mimoyo yabo kuti babenge bathu babo,
kuti bashinge ne balanda babo nge bupitipiti.
26 #
Kufuluka 3:1—4:17
Bakatuma nlanda wabo Mushe,
na Aroni ibo babakashalula.
27Bakathama zwilakidzo zwabo pakati kwabo,
ne matjenamiso mu shango ya Hamu.
28 #
Kufuluka 10:21-23
Bakatuma zhalima, bakathama kuti shango iti zwii,
bakashandukila matama abo
29 #
Kufuluka 7:17-21
bakashandula vula dzabo dzikabe malopa,
bakathama kuti hwobe dzabo dzife.
30 #
Kufuluka 8:1-6
Shango yabo ikazhala mazhula,
nenge mu ng'umba dza bomambo babo.
31 #
Kufuluka 8:20-24;
Kufuluka 8:16, 17 Bakalebeleka, kukazha nlunda we thuzi,
ne nyunyu dzikazhala mu shango yabo yose.
32 #
Kufuluka 9:22-25
Bakabaligila tjivulamabgwe mu bumo gwe vula,
ne lupenyo gwe vula gukapenya mu shango yabo yose.
33Bakaloba mizhambi ne mipaya yabo,
ngono bakavunilila miti ye shango yabo.
34 #
Kufuluka 10:12-15
Bakalebeleka, phashu dzikazha
ne phashwana dze bunji gusingabalike,
35dzakaja zwimela zose mu shango yabo.
36 #
Kufuluka 12:29
Bakabulaya mbano dzose mu shango yabo,
zwizwalo zwe kutanga zwe simba labo lose.
37 #
Kufuluka 12:33-36
Ndizo kapeleka Baiziraela bakasenga siliva ne golide,
akuna ne nng'ompela mu ludzi gugwe wakakuthiwa.
38Baiziraela bakati bemilika Egipiti ikashatha,
ngobe bakabe bobatja.
39 #
Kufuluka 13:21, 22 Bakatambunudza gole kubafukidza,
ne moto kuti kube ne tjedza busiku.
40 #
Kufuluka 16:2-15
Bakakumbila, ngono bakabazhisila hwalishanga,
bakabapa zojiwa zwinodwa kudzimu zwili zwinjinji.
41 #
Kufuluka 17:1-7; Mbalo 20:2-13 Bakazhula shongwe vula ikatebukana,
ikawunga ipalama tjilambanyika se gwizi,
42ngobe bakakumbulukigwa kugadzabgwe kwabo kwakayengemala,
ne nlanda wabo Abhurahama.
43Ndizo bakapeleka bathu babo ngekushatha,
bashalugwa babo bemba.
44 #
Joshuwa 11:16-23
Bakabapa shango dze zwitjaba,
ngono bakazwitolegwa fumwa yakazwishabigwa nge zwitjaba,
45kuti ndizo kubupelo babhate milayo yabo
ne kutjengeta ndaulo dzabo.
Kudzani Yahwe!
Kalanga Bible © Bible Society of Botswana, 2008, 2018.