Njimbo 104
104
Ndzimu mbumbi
1Kudza Yahwe, iwe meya yangu.
Imwi Yahwe Ndzimu wangu, mu nkulu kwazo.
Makaambadziwa kutetiwa ne bushe,
2Makazwifukidza nge tjedza se tjiambalo.
Imwi munobambula kudzimu se nshasha we saile.
3Imwi munomisa phanda dze mbako dzenyu mu vula,
imwi munothama makole kara yenyu ye bushe,
imwi motatha mapapilo e phepo,
4 #
Bahebheru 1:7
mothama phepo batumwa benyu,
moto ne nthuto bashingili benyu.
5Mobiga shango mu thiwa dzayo,
kuti ndizo isitongofa yazunguziwa.
6Moifukidza nge madziba e gungwa se tjiambalo,
vula yakabe ilimile pezhugwi kwe matombo.
7Amutjemela banotizha,
mu nsindo we kudadamula kwenyu bakatizha.
8Matombo akamilika,
mikuku ikawungila pathu pamakailaulila.
9Makabiga n'gathu kuti ndizo basitongopinda,
kuti ndizo basitongofukidza shango kakale.
10Mowungisila misenya mu mikuku,
inowunga pakati kwe matuthu,
11inong'wisa phuka imwe ne imwe,
mbizi dze shango dzozwidusa nyota.
12Pawunde nayo nyuni dzobaka mashaka,
dzomba dzili pakati kwe thabi dze miti.
13Kudwa mu bugalo gwenyu gu pezhugwi modilidzila matombo,
shango inogutshiwa nge zwizwalo zwe nshingo wenyu.
14Momedzela ng'ombe bushwa,
ne miti kuti ishingisiwe nge nthu,
nekuti aduse zojiwa mu mavu,
15ne nkumbi kushathisa moyo we nthu,
ne mafuta anothama kuti buso gugwe gupenye,
ne zojiwa zwinogadza nthu moyo.
16Miti ya Yahwe inodilidzigwa kwazo,
misida ye Lebanoni yabakadzwala.
17Nyuni dzobaka mashaka adzo muili,
hwondo inobaka shaka layo mu miti isina mihwa.
18Matombo malefu anogala ngululu,
shongwe i dizhilo le mbila.
19Makathama kuti mwedzi ulakidze misi ye gole,
zhuba loziba tjibaka tjalo tjongina.
20Mothama zhalima, kukabe busiku,
lubaka gwe phuka dze shango dziyenda mulili.
21Shumbana dzobombela tjadzingabulaya,
dzishaka zojiwa zwadzo mu Ndzimu.
22Ha zhuba libhuda, dzonobgwata
dzinolala mu mazwimba adzo.
23Nthu unoyenda ku nshingo uwe,
enoshinga kudza kube madekwana.
24Zwakawanda seni zwithu zwamakathama, imwi Yahwe!
Makazwithama zose nge butjenjedu,
shango izhele zwitjili zwenyu.
25Ndiyeno i gungwa, bukulu kakale gwakaashama,
guna zwitjili zwinonyewula zwe bunji gusingabalike,
zwitjili zose zwitukununu ne zwikulu kulu.
26 #
Jobe 41:1; Njimbo 74:14; Isaya 27:1 Zwikepe zoyenda muguli,
ne zhithu le gungwa linoyi Livatani lamakabumba kuti lizanile muguli.
27Zose izwezwi zwakalinga kumuli
kuti muzwipe zojiwa mu tjibaka tjakalingisana.
28Amuzwipa, zotjinunga, amufumbatunula
tjiazha tjenyu, zogutshiwa nge zwithu zwakanaka.
29Amusumbika buso gwenyu, zotja, amushomola
meya yazo zofa, zwibe zwibgwilila
mu hwuluba pazwakadwa.
30Amudusa meya yenyu, muituma zobumbika,
kakale mothama mbumbiko ye shango ikabe tshwa.
31Dzene gudzo la Yahwe lingama nge kusingapele,
dzene Yahwe bangashathila mishingo yabo.
32Ibo banolinga shango ikatetema,
banokutha matombo kathungayila bhulubusi.
33Ndowombila Yahwe mu butjilo gwangu gose,
ndowomba ndikudza Ndzimu wangu anditjatjila.
34Dzene kukumbula kwangu kungabashathisa,
ngobe ndowoshatha ndili muna Yahwe.
35Batjinyi ngabalobesiwe mu shango,
ne babi basitjafe babepo.
Kudza Yahwe, iwe meya yangu.
Kudza Yahwe!
Kalanga Bible © Bible Society of Botswana, 2008, 2018.