Makungulupeswa 29
29
1Iye unogala e tjemegwa koga ewomesa ntshibha
unowotjimbidza akolomodziwa kusina bhatsho.
2Ha balulwami bebusa, bathu banoshatha,
koga ha ku busa babiibi, bathu banogomela.
3Iye unoda butjenjedu unoshathisa tate babe,
koga iye unozwizwadzanya ne fukula unozwitjinyila fumwa.
4Nge kutambunuka mambo unogadzikanya shango,
koga iye unoshaka zwipo unoyishakadza.
5Nthu unotjengedza mbakidzani uwe
unowalila makumbo awe gwanga.
6Nthu mbi unobhatshigwa mu tjibi tjitje,
koga nthu wakalulwama unomba kapululudza.
7Nthu wakalulwama unoziba fanilo dze bashayi,
koga nthu mbi aana hanya nazo.
8Badadi banopisa nzi nkulu,
koga bathu bakatjenjela banodzima bushongola.
9Ha ntjenjedu eseka ne tjilengwe,
tjilengwe itjo tjopengapenga tjikaseka ngono akuna kunyalala.
10Bathu banotebula lopa banoshima nthu usina nlandu,
ne babiibi banoshaka lufu gugwe.
11Tjilengwe tjodusa bushongola gwatjo gose,
koga ntjenjedu unozwibhata.
12Ha mbusi e teedza manyepkhwa,
makombgwa awe wose anowobe mabiibi.
13Nshayi ne ntshambilidzi banofanana,
Yahwe banobapa tjedza tje mesho bose.
14Ha mambo esumikilisa bashayi nge kulizalizana,
bumambo gugwe gowothumbidziwa kusingapele.
15Shamu ne kutjemela zopa butjenjedu,
koga mwana usinga tjemegwe unobhatisa mmeyabe shoni.
16Ha babiibi bali mu mbuso, tjibi tjowanda,
koga balulwami banowobona kuwa kwabo.
17Tjemela nkololo uwo, unowokupa kunyaluluka,
unowoshathisa moyo uwo.
18Pasina bulebesambeli bathu abatozwibhata,
koga wakakombolegwa iye unolondolodza nlayo.
19Nlanda aatotjemeleka nge mahwi koga,
nenguba e hwisisa aana hanya nazo.
20Unobona nthu wakatungamidza leba?
Tjilengwe tjoyita panli.
21Iye unolela nlanda nge kunlema kudwa mu butjetjana,
ku bupelo unowowana abe n'galithaka uwe.
22Nthu una bushongola unomusa ngwa,
ne nthu unoda gwadzamoyo unodzwala bubi bunjinji.
23Mazwikudzo enthu anon'yisa pasi,
koga iye wakatebama mu meya unowowana gudzo.
24Nkwinya we mbava unoshima butjilo gugwe,
unohwa bhiso, koga aana tjaangaleba,
25kutja nthu hwuteya dati,
koga iye uno galabgwe muna Yahwe wakatjengeteka.
26Bali banjinji banoshaka ludo gwe mbusi,
koga kudwa kuna Yahwe nthu unowana kutambunuka.
27Nthu usakatambunuka unoshimisa ku nlulwami,
koga iye wakatambunuka unoshimisa ku babiibi.
Kalanga Bible © Bible Society of Botswana, 2008, 2018.