Makungulupeswa 30
30
Matama a Aguri
1Matama a Aguri nkololo wa Jake we Masa.
Nthu unoti kuna Itiyeli, kuna Itiyeli ne kuna Ukali:
2Malebeswa wose ndi tjilengwesa kuti ndibe nthu.
Andina hwisiso ye nthu.
3Andizozwidiya butjenjedu,
naiko kuziba ngekwa iye Wakayengemala.
4Ndiyani wakatathila kudzimu kabuya ka delukila pasi?
Ndiani wakafumbatila phepo mu mbaka dzidze?
Ndiyani wakapetela vula nge tjiambalo?
Ndiyani wakasika mbizho dzose dze shango?
Zina lile ndiani, ne zina le nkololo uwe ndiani?
Nge malebeswa unoziba!
5Dama limwe ne limwe le Ndzimu lakanatshiwa;
ndiwo tjivikiso kuna banotizhila kuwuli.
6Usitongo paphidza matama awo,
ungadwa ukakutjemela, udwa uwangwa uli nnyepi.
7Zwithu zwibili zwandinokumbila kumuli,
musindilambile izo ndisathu afa,
8Dusilani kule nami zwisiyizo ne manyephwa,
musindipe bushayi kene fumwa,
mundigutshe ne zojiwa zwandinosheta,
9ndingadwa ndi guta, ndibe ndimuzwilandula,
nditi, “Yahwe ndiyani?”
Kene ndidwa ndibe nshayi ndibe ndikwiba,
ndibe nditjinya zina le Ndzimu wangu.
10Usitongo nyeya nlanda kuna tetshi uwe,
asidwe ekulonga bhiso, ubouwang'wa uli nlandu.
11Kuna ibabo banolonga botate babo bhiso,
basingakombolele bomme babo.
12Kuna ibabo babuya mu mesho abo,
koga basakangudziwa shambgwa yabo.
13Kuna ibabo be mesho anozwikudza,
anolingila pezhugwi!
14Kuna ibabo bana meno anopitsha
be meno e mipanga,
kuponda bashayi mu shango,
bashayi kubadusa mu bathu.
15Munyopi tjina bakololokadzi babili;
“Mundipe, mundipe,” banolila.
Kuna zwithu zwitatu zwisingafe zwa gutshika,
zwinna azwitotongoti, “Kwa lizana”:
16ikumbu, mbeleko isingazwale,
shango inogala ina nyota ye vula,
ne moto usingatongoti, “Kwa lizana.”
17Zhisho linodadila tate,
linolingila kuhwa mme balo pasi
lowokopogwa nge makungubo e nkuku
likanojiwa nge magola.
18Zwithu zwitatu zwinonditjenamisa,
zwinna anditozwihwisisa,
19zila ye dzu mu makole,
zila ye nyoka mu shongwe,
zila ye ikepe mu makungwa,
ne zila ye nlume ne nsikana.
20Ndiyo zila ye phombgwekadzi,
unoja, ebe bukusha nlomo,
ebuya eti, “Hakuna tja ndatjinya.”
21Zwithu zwitatu zwinozunguza shango,
zwinna zwaisingatubule kumilana nazo,
22nlanda ha ebe mambo,
ne tjilengwe ha tjakaguta zojiwa,
23nkadzi usingadiwe ha ewana nlume,
ne nlandakadzi ha etolela tetshikadzi uwe nlume.
24Zwithu zwinna mu shango zwitukununu,
koga zwakatjenjela kwazo,
25ntjenje ludzi gusakasima,
ngono unozwikubunganyila zojiwa mu zhizha,
26mbila ludzi gusakasima,
ngono dzothama mizi yadzo mu shongwe,
27phashu adzina mambo,
ngono dzoyenda dzili nlunda,
28tjibululu ungatjibhata ne luboko,
koga tjogala mu ng'umba dza bomambo.
29Zwithu zwitatu zwinotshamba tjimambo,
zwinna zotshamba sa bomambo,
30shumba, iyo yakasima kupinda zwibandana zose,
akuna tjainotja,
31gukurume linotanyaila, phoko ye mbudzi,
na mambo unotanyayila mbeli kwe bathu babe.
32Ha wakabe uli tjilengwe, uzwikudza,
kene wakabe uluka bubi,
bhata nlomo uwo.
33Ngoti nkaka ha unonubugwa unodusa mafuta,
kutshamba tjimilo kodusa malopa,
ne kushoka kugwadzamoyo ko zhisa kukwebakwebana.
Kalanga Bible © Bible Society of Botswana, 2008, 2018.