Makungulupeswa 28
28
1Mbiimbi unotizha nenguba kusina unotatana naye,
koga balulwami bakasimamoyo se shumba.
2Shango ha ina jinyo inobe ne batungamili banjinji,
koga ha kuna balume bana kuhwisisa ne luzibo
ingagadzikana kwe tjibaka.
3Nshayi unotshambilidza bashayi
ivula inona ikuba isiya kusina tjinojiwa.
4Ibabo basingatobele nlayo banolumbidza babi,
koga ibo banotobela nlayo banogwisana nabo.
5Bathu babi abatohwisisa kutambunuka,
koga ibo banoshaka Yahwe banonhwisisa kwakapelela.
6Nshayi unoyenda zila dzakatambunuka,
unopinda mfumi unotobela zila dzakakombama.
7Iye unotjengeta nlayo nkololo wakatjenjela,
koga nkwinya we magovu unobhatisa tate babe shoni.
8Iye unopaphidza fumwa iye nge kuzwalisa mari,
unokubunganyila iwoyo una buthu ku bashayi.
9Iye unozwina zebe kuti asihwe nlayo
ne ntembezelo uwe unoshimisa.
10Iye unotungamilila bakatambunuka ku zila yakabipa,
unowowila mu gomba lile,
koga basina nlandu banowobe ne thaka yakanaka.
11Nfumi wakatjenjela muna awe mesho,
koga nshayi wakatjenjela, unombonyolola.
12Ha balulwami bekunda, kobe ne kushatha kukulu,
koga ha batjinyi bemusa nsholo, balume banobgwata.
13Iye unosumbika matjinyo awe aatobhudilila,
koga iye unoadusila patjena ebuya ealasha unowohwigwa ngoni.
14Kwakakombolegwa nthu unotja Yahwe tjibaka tjose,
koga iye unokukutadza moyo uwe unowowila mu mbatsha.
15Se shumba inobomba kene bhira ikutjulukila,
ndizo zwinoyita mbusi we mbiimbi pezhugwi kwe bashayi.
16Mbusi usina hwisiso ntshambilidzi we moyo wakabipa,
koga unoshima kutjiba unowopaphidza mazhuba awe.
17Ha nlume e lemegwa ne lopa le nthu waakabulaya,
ngaabe ntizhi kuswikila e fa,
kushaye unombhatsha.
18Iye unotjila asina nlandu unowotjidziwa,
koga iye we zila dzakaleleka unowowila mu gomba.
19Iye unolima nnda uwe unowowana zojiwa zwinjinji,
koga iye unotobelela zwisina nshingo unowobe ne bushayi bukulu.
20Nthu unogalamoyo unowobe ne makombolelo akawanda,
koga iye una phupu dze fumwa haangashaye shamu.
21Kushalawula bathu akuzonaka,
koga ne bhemu le tjiwunga nthu unowotjinya.
22Nthu unonyimana unotizhilila fumwa,
koga aatoziba kuti kusheta kowonzhila.
23Iye unotjemela mmwe unowoti shule kadiwa kwazo,
kupinda iye unotjebela nge lulimi.
24Iye unotolela tate babe kene mmeyabe,
ekoti, “Ikoku atekuli tjinya,”
nkwinya we nthu unotjinya.
25Nthu we govu unogwisanya,
koga iye unogalamoyo muna Yahwe unowobhudilila.
26Iye unogalamoyo mu nkumbulo uwe tjilengwe,
koga iye unoyenda mu butjenjedu unowosungunugwa.
27Iye unopa bashayi aatowosheta,
koga iye unosumbika mesho unowowana bhiso.
28Ha babiibi bemusa nsholo, balume banobgwata,
ngono ha beloba balulwami banopaphidzika.
Kalanga Bible © Bible Society of Botswana, 2008, 2018.