Makungulupeswa 2
2
Mbayilo we butjenjedu
1Nkololo wangu, ha uamutjila matama angu,
ne kubiganya milayo yangu mukuli,
2uteya zebe iyo kuteedza butjenjedu,
ne kulonga meya mu nyama kuhwisisa,
3nge lebeswa, ha ulilila kube ne ndingisiso
umilidzila pezhugwi hwi lilo udana hwisiso,
4ha uishaka se siliva,
uivima se fumwa yakasumbikala,
5ndiko kwaunowohwisisa kutja Yahwe
ne kuwana luzibo gwe Ndzimu.
6Ngoti Yahwe banopa butjenjedu,
kudwa mu nlomo wabo kodwa luzibo ne hwisiso,
7banobigila butjenjedu balulwami,
ndibo tjivikili tja ibabo bana ntutshi,
8ne kulinda zila dze kutambunuka
betjengeta zila dze balulwami babo.
9Ipapo unowohwisisa ndulamo ne kutambunuka
ne kusashalaula, idzo zila dzose dzakanaka,
10ngoti butjenjedu gowozha mu moyo uwo,
ne luzibo gowobe shatho mu meya iyo,
11njalakang'wa dzowokulinda,
kuhwisisa kowokutjengeta,
12zowokutjidza mu zila dze mbipo,
kudwa mu ndebo dze bathu dzakaleleka,
13banolasha zila dzakatambunuka
kuyenda mu zila dze zhalima,
14banoshathila kushinga mbipo
ne kuda kusatambunuka kwe bubi,
15bathu be zila dzakakombama,
bakatjenjelela ntome mu zila dzabo.
16Unowotjidziwa kuleya nkadzi we fukula,
ne mu lulimi gugwe gunotjebela,
17unofupatila nkwinya uwe we butjetjana gugwe
ekangangwa tjidumano tjitje ne Ndzimu uwe,
18koga nsha uwe unolobesiwa nge lufu,
ne zila dzidze meya dze zhalima,
19akuna unoyenda kunli unoshanduka
kene kawana zila ye butjilo.
20Ndizo unoyenda mu zila dze bathu bakalulwama,
ukayenda mu zila dze bakatambunuka.
21Ngoti bakatambunuka banowogala mu shango,
ne bathu bana ntutshi banowosala muili,
22ngono babiibi banowodusiwa mu shango
ne bana bupielele banowodzikunugwa muguli.
Kalanga Bible © Bible Society of Botswana, 2008, 2018.