Makungulupeswa 1
1
Nshingo we makungulupeswa
1 #
1 Bomambo 4:32
Makungulupeswa a Solomoni, nkololo wa Dafite, mambo we Iziraela,
2anodiya butjenjedu ne matama e ndayo,
ekuhwisisa matama e ndingisiso,
3ne kuamutjila nlayo kunotjenjedza,
kuthama kululwama ne kutambunuka ne kusa shalaula,
4kupa basina luzibo butjenjedu,
kupa luzibo ne njele ku batjetjana,
5ntjenjedu unohwa kapapha kudiyika kukwe,
una hwisiso kapapha bunyambi gugwe,
6kuhwisisa gungulupeswa ne zwifano,
matama e batjenjedu ne mabatsho abo.
Gumbuludzo ku batjetjana
7 #
Jobe 28:28; Njimbo 111:10; Makungulupeswa 9:10 Kutja Yahwe ndiko kutangisa kwe luzibo,
zwilengwe zolingila pasi butjenjedu ne ndayo.
8Nkololo wangu, teedza ndayo dza tate babo,
usilashe zwidiyo zwa mmeyabo,
9ngobe zowobe tjiala mu nsholo uwo,
ne ndalama mu ntshibha uwo.
10Nkololo wangu, ha batjinyi bekutjengedza,
usitongo duma.
11Ha beti, “Ngati yende tose, tilalile nthu titebule lopa,
tinyange tibhate usina nlandu,
12se ikumbu ngati bamidzeni bali bapenyu,
bali bapumbulu, sa ibabo banolongwa mu gomba,
13towowana fumwa inoguta,
tikazhadza ng'umba dzedu ne zwatinowotapa,
14iwe ibe mmwe wedu,
tibe ne hwomwana ing'ompela.”
15Nkololo wangu, usitongo yenda zila nabo,
dziba gumbo lilo kuyenda mu zila dzabo,
16ngobe makumbo abo anotjimbidzo tizhila ku bubi,
kakale banotjimbidzo kutebula lopa.
17Akutobhatsha tjimwe kuteya
nyuni yakakulinga,
18koga bathu ibaba banolalila lopa labo,
bakalalila butjilo gwabo.
19Ndiyo zila ya bose banowana fumwa nge phipiti,
inotolela bathu butjilo gwabo.
Butjenjedu godana
20 #
Makungulupeswa 8:1-3
Butjenjedu gomimilila pezhugwi mu dzizila,
mu matengeselo gomilidza hwi lago,
21pezhugwi kwe makuma gomimilila pezhugwi,
pa mikoba ye nzi nkulu golebeleka guti,
22“Kowodzina kukabe lini, imwi basina mano,
muda kusabe ne mano?
Kowodzina kukabe lini badadi bedada beshathila kudada kwabo
ne zwilengwe zwibenga luzibo?
23Shandukani ha ndimutjemela,
bonani, ndowodila meya yangu mu muli,
ndowothama kuti matama angu muazibe.
24Nekuti ndakamudana mukasinditeedze,
ndikatambunudza luboko gwangu mukasibe ne hanya,
25mukasibe ne hanya ne gumbuludzo langu,
mukasibe ne tjimwe ngotjemela kwangu,
26namibo ndowomuseka mu mbhatsha dzenyu,
ndowomuseka mahanya ha kutja kwenyu kwamuswikila,
27ha kutja kumuwila se dutu,
ne mbhatsha dzenyu kumuzhila se tjampupudze,
ha buyendasi ne manikano zwimuwila.
28Ipapo banowondidana, koga anditowodabila,
banowondishaka bakalonga meya mu nyama koga abatowondiwana.
29Ngoti bakabenga luzibo
kakale bakasishalule kutja Yahwe,
30bakasibe ne hanya ne gumbuludzo langu,
bakalingila pasi kutjemela kwangu kose,
31ndizo banowovuna tjabakadzwala mu zila dzabo
kakale bakagutshiwa ne butjakwani gwabo.
32Ngoti basina mano banobulawa ngopambuka kwabo,
kusabe ne hanya kwe zwilengwe kozwipaladza,
33koga iye unonditeedza unowogala akabakililika,
unowogala asakabiga asingatje mbipo.”
Kalanga Bible © Bible Society of Botswana, 2008, 2018.