Makungulupeswa 15
15
1Dabilo yakatebama inodzikamisa bushongola,
koga dama gukutu lodzonga bushongola.
2Lulimi gwe ntjenjedu godiya luzibo,
koga milomo ye zwilengwe inoleba bulengwe.
3Mesho a Yahwe a pamwe ne pamwe,
akalinga batjinyi ne balulwami.
4Lulimi lunyolo nti we butjilo,
koga kusatambunuka ku muguli konyadza meya
5Tjilengwe tjolingila pasi ndayo dza tate batjo,
koga una hanya nge kutjemegwa wakatjenjela.
6Mu ng'umba ye nlulwami kuna fumwa njinji,
koga zwinowang'wa nge babi zwina mbatsha.
7Milomo ye batjenjedu inodzwala luzibo,
koga mikumbulo ye zwilengwe ayizojalo.
8Zwibhayilo zwe babi zoshimisa kuna Yahwe,
koga mitembezelo ye balulwani inobashathisa.
9Zila ye mbiimbi inoshimisa kuna Yahwe,
koga banoda iye unotobela ndulamo.
10Shamu inogwadza inowoloba iye unobhuda mu zila,
iye usingade tjemegwa unowofa.
11Lufu ne Golomodzo zwi patjena mbeli kwa Yahwe,
tisingalebe ngekwe kubona zose zwi mu mimoyo ye bathu.
12N'dadi aatoda kutjemegwa,
aanganoshaka bhatsho ku batjenjedu.
13Moyo wakashatha unonakisa tjiso,
koga moyo wakapuna unonyadza meya.
14Nkumbulo we unohwisisa unoshaka zibo,
koga milomo ye zwilengwe inoja bulengwe.
15Mazhuba wose e wakatshambilidziwa mabi,
koga una moyo ntjena unogala akashatha.
16Koyita kube ne kushomanana ngono nthu etja Yahwe,
pana una fumwa hwulu inon'dziyidza.
17Koyita kuti nthu aje milibo nge ludo,
pana kuja ng'ombe yakakodziwa pa zhele lubengo.
18Nthu una bushongola unomusa ngwa,
koga moyonlefu unonyaladza zhoba.
19Zila ye simbe yakazwin'gwa nge mihwa,
koga zila ye nlulwami imbuyanana yakashaladuka.
20Mwana wakatjenjela unoshathisa tate babe,
koga tjilengwe tjolingila mayi batjo pasi.
21Bulengwe goshathisa iye usina nkumbulo,
koga nthu unohwisisa unoyenda mu zila yakatambunuka.
22Pasina bukumbuludzi mano aatotubuka,
koga pana bakumbuludzi banjinji mano anotubuka.
23Nthu unoshathisiwa ngopa dabilo yakalulwama,
ne dama ha lilebgwa nge tjibaka tjalo konaka seni!
24Zila ye ntjenjedu inokwebela ku butjilo,
kuti ndizo aleye ikumbu!
25Yahwe banokolomola ng'umba ye unozwida,
koga banotjengeta n'gathu we tjilikadzi.
26Mikumbulo ye babi inoshimisa Yahwe,
koga matama e babuyanana anobashathisa.
27Iye unobe ali govu le fumwa unodziidza be nsha uwe,
koga iye unobenga zwizwimba nlomo unowotjila.
28Nkumbulo we wakalulwama unoalakana kuti ungadabila uyitini,
koga nlomo we nthu mbi unoleba zwithu zwakabipa.
29Yahwe bakule kwazo ne bakabipa,
koga banohwa ntembezelo we balulwami.
30Mesho akashatha anoshathisa moyo,
ne thawu mabuya dzosimisa mafupa.
31Iye una zebe inoteedza kutjemela kunoyisa ku butjilo,
unowogala pakati kwe batjenjedu.
32Iye unolamba layiwa unozwilengudza,
koga iye unotjemeleka unowana hwisiso.
33Kutja Yahwe kodiya butjenjedu,
ne kuzwiyisa pasi kozha kutangila kukudziwa.
Kalanga Bible © Bible Society of Botswana, 2008, 2018.