Makungulupeswa 16
16
1Ndongoloso inodwa mu moyo we nthu,
koga dabilo ye lulimi inodwa kuna Yahwe.
2Zila dzose dze nthu imbuyanana mu mesho awe,
koga Yahwe ndibo banoyela meya.
3Yisa tjimwe ne tjimwe tjaunoshinga kuna Yahwe,
ndizo zose zowopunduka.
4Yahwe bakathama kuti tjimwe ne tjimwe tjibe ne nshingo watjo,
ne babi bakathamigwa zhuba le zwakabipa.
5Mmwe ne mmwe una mazwikudzo unoshimisa kuna Yahwe,
nge malebeswa, aangaletjedziwe asalobgwa shamu.
6Nlandu unozwimbiwa nge ngoni ne malebeswa,
ne kutja Yahwe kothama nthu kuti aleye bubi.
7Ha zila dze nthu dzishathisa Yahwe,
unothama kuti ne babengi babe bagale naye nge kunyalala.
8Koyita kube ne kushomana kuna ndulamo,
pana kube ne fumwa nji kusina kutambunuka.
9Nkumbulo we nthu unoluka mano e zila iye,
koga Yahwe ndibo banontendeka thambo dzaakafanila tola.
10Mambo unoleba zwadwa mu Ndzimu,
nlomo uwe autoleba nge kusakatambunuka.
11Zwiyelo ne zwilizanyo zwakatambunuka nge zwa Yahwe,
mabgwe amu hwomo mishingo yabo.
12Kuthama tjakabipa koshimisa kuna bomambo,
ngekuti tjigalo tje bumambo tjothumbidziwa nge ndulamo.
13Milomo yakatambunuka inoshathisa bomambo,
kakale banoda iye unoleba zwakalulwama.
14Kugwadzamoyo kwa mambo ntumwa we lufu,
ngono nthu wakatjenjela unogutebamisa.
15Mu kushatha kwe tjiso tja mambo kuna butjilo,
ludo gugwe gonga gole le vula ye nyawuko.
16Kuwana butjenjedu kopinda kuwana golide,
ne kuwana kuhwisisa kopinda kuwana siliva.
17Zila ye bakatambunuka inoleya mbipo,
iye unolondolodza zila iye unotjengeta butjilo gugwe.
18Kuzwida kotangila kukolomoka,
ne meya ye kuzwikudza inotangila kuwila pasi.
19Koyita kuzwiyisa pasi mu meya kulizana ne bashayi
pana kukobana zwakatapiwa ne banozwikudza.
20Iye una njele nge dama unowobhudilila,
iye unogalabgwe Yahwe una kushatha.
21Una moyo wakatjenjela unodang'wa una hwisiso,
ne ndebeleko mbuya inokulumbidza kudiyika.
22Butjenjedu nsenya we butjilo kuna unago,
koga bulengwe i shamu inoloba zwilengwe.
23Nkumbulo we ntjenjedu unodiya nlomo uwe,
upaphidza bunyambi gwe ndebo mu milomo iye.
24Matama anozipa anonga mape e nyutji,
anozipisa meya ne kumusa mbili.
25 #
Makungulupeswa 14:12
Kuna zila inolingika yakalulwama ku nthu,
koga bhelelo layo ino yesa ku lufu.
26Zhala ye nshingi ino nshingila;
nlomo uwe unonkulumbidza.
27Nthu usina nshingo uno lukila bamwe zwakabipa,
ne ndebo iye inonga moto unong'ora.
28Nthu usi iye unogwisanya,
ne nnyeyi uno thubukanya bazwalani.
29Nthu unomanikidza zwithu unokwekweredza mbakidzani naye,
e nkwebela kuthama zwisi izo.
30Nthu uno vuna zhisho uno luka bupitipiti,
iye unomuma nlomo unoti kusi lebgwe bubi gwaka etikala.
31Nsholo ntjena tjiala tjinokudzika,
unowanika nge zila ye bululwami.
32Iye una moyonlefu unopinda una simba,
na iye unozwibhata unopinda uno tapa ntuthu.
33Unga posa zo madaiza,
koga Yahwe ndiye unotola thambo ye zwinowoyitikala.
Kalanga Bible © Bible Society of Botswana, 2008, 2018.