Makungulupeswa 10
10
Makungulupeswa a Solomoni
1Makungulupeswa a Solomoni.
Nkololo wakatjenjela unoshathisa tate babe,
koga nkololo we tjilengwe unolonga mayi buyendasi.
2Fumwa inowang'wa nge bupitipiti aitobuzila,
koga ndulamo inosunungula mu lufu.
3Yahwe abatoletjedza balulwami bebhakhwa nge zhala,
koga banodziba njemulo dze babi.
4Luboko gwe simbe gozwala bushayi,
koga luboko gwe una majatu gofumisa.
5Nkololo unovuna mu zhizha wakatjenjela,
koga nkololo unoyizela mu zhizha unobhatisa shoni.
6Makombolelo amu nsholo we wakalulwama,
koga nlomo we mbiimbi unosumbika phipiti.
7Njalakang'wa dze nlulwami makombolelo,
koga zina le mbiimbi lowobola.
8Una moyo wakatjenjela unowoamutjila milayo
koga tjilengwe tjinolebanya tjowokolomogwa.
9Iye unoyenda nge zila ina gudzo unowoyenda zubuyanana,
koga iye unoyenda zila dzakakombama unowodusigwa patjena.
10Iye unovuna zhisho unozhisa mang'oni,
koga iye unotjemela akatambunuka unozhisa mbakiso.
11Nlomo we nlulwami nsenya we butjilo,
koga nlomo we mbiimbi unosumbika phipiti.
12 #
Jakubo 5:20; 1 Pita 4:8 Benga komusa ngwa,
koga ludo gozwimba milandu yose.
13Pa milomo yaiye una hwisiso kowanika butjenjedu,
koga shamu yakafanila usakatjenjela.
14Batjenjedu banokubunganya luzibo,
koga kubalabala kwe tjilengwe kodana kuloba.
15Fumwa ye mfumi ndiwo nzi uwe nkulu wakasima,
bushayi gwe bashayi ndigo kuloba kwabo.
16Mbhailo we nlulwami unoyisa ku butjilo,
koga mbuyilo ye mbiimbi inokwebela ku tjibi.
17Iye unoteedza ndayo umu zila ye butjilo,
koga iye unolamba tjemegwa unolashika.
18Iye unobenga esumbika unonyepa,
ne unotjinya bamwe mazina tjilengwe.
19Pana matama manji tjibi atjitoshayika,
koga iye unozwibhata nlomo wakatjenjela.
20Lulimi gwe nlulwani i siliva yakashalugwa,
nkumbulo we mbiimbi auna bhatsho.
21Milomo ye nlulwami inojisa banjinji,
koga zwilengwe zofa ngoshaya nkumbulo.
22Makombolelo a Yahwe anofumisa,
ngono abatoapaphidza nge buyendasi.
23Kutjinya ku tjilengwe konga nzano,
koga mazwibhato mabuya lushatho ku nthu una kuhwisisa.
24Zwinotjiwa nge mbiimbi ndizo zwinon'wila,
koga tjinoyemugwa nge balulwami banowotjipiwa.
25Tjampupudze ha tjipinda, mbiimbi aatjipo,
koga nlulwami wakathumbila kusingapele.
26Se kunothama nkumbi wakatyorowa ku meno ne busi ku mesho,
ndiko kunothama simbe kuna banoyituma.
27Kutja Yahwe kopaphidza butjilo,
koga makole e mbiimbi anowobe mashomana.
28Galabgwe kwe balulwami lushatho,
koga zwakalindigwa nge babi azwitoshingikala.
29Yahwe i dizhilo kunawakatambunuka,
koga bagolomodzo ku bathami be mbipo.
30Balulwami abatowofa batshedugwa,
koga babi abatowogala muna iyeyi shango.
31Nlomo we nlulwami unozhisa butjenjedu,
koga lulimi gwakaleleka gowothubugwa.
32Milomo ye nlulwami inoziba tjinoamutjilika,
koga nlomo we mbiimbi unoziba tjakaleleka.
Kalanga Bible © Bible Society of Botswana, 2008, 2018.