Makungulupeswa 9
9
Butjenjedu ne bulengwe
1Butjenjedu gwakabaka ng'umba yago,
gwakaibamba ne phanda dzili kutendeka.
2Gwakabhaya ng'ombe dzago, gukashanganya nkumbi wago we zhambi,
ne tafuli ye zojiwa yakalulwamisiwa.
3Gwatuma balandakadzi kunokoka bathu
mu magalo apezhugwi mu nzi nkulu guti,
4“Usakatjenjela, ngaanginile ngeno.”
Kuna basina nkumbulo goti,
5“Buyani muje tjiwunga tjangu,
mung'we nkumbi we zhambi wandakashanganya.
6Letjedzani bulengwe, mutjile,
muyende mu zila ye hwisiso.”
7Iye unotjemela ndadi unozwidanila kutukwa,
iye unotambunudza nthu mbimbi unowokubala.
8Usitongo tjemela ndadi, ngobe unowokubenga,
tjemela ntjenjedu ngono unowokuda.
9Laya ntjenjedu, ngono iye unowotjenjelela mbeli,
diya nthu wakalulwama unowopaphidzika mu luzibo.
10 #
Jobe 28:28; Njimbo 111:10; Makungulupeswa 1:7 Kutja Yahwe ndiko kutangisa kwe butjenjedu,
ne kuziba Wakayengemala ndiyo hwisiso.
11Ngoti nge kwangu mazhuba awo anowowatshika,
makole anowopaphidziwa mu butjilo gugo.
12Ha wakatjenjela, wakazwitjenjelegwa,
ha udada, unowodziyila woga.
13Nkadzi we tjilengwe una zhoba,
ha ana mano kakale ha ana shoni.
14Unogala pa nkoba we ng'umba iye,
unogala mu tjigalo tjipezhugwi mu nzi nkulu,
15edana ibabo banopinda,
banoyenda mu zila dzabo eti,
16“Iye usakatjenjela, ngaanginile ngeno!”
Kuna usina hwisiso unoti kunli,
17“Vula yakwibiwa inozipa,
ne tjiwunga tjinojigwa mu ikohwa tjozipa.”
18Koga aatoziba kuti bafi bayapo,
kuti bezi be nkadzi uwoyo ba mukatikati kwe ikumbu.
Kalanga Bible © Bible Society of Botswana, 2008, 2018.