Makungulupeswa 11
11
1Tjiyelo tje manyepkhwa tjoshimisa kuna Yahwe,
ikale tjakatambunuka tjo bashathisa.
2Ha mazwikudzo ezha, kudwapo kozha mabhatisashoni,
koga muna banozwiyisa pasi kuna butjenjedu.
3Gudzo le bakalulwama lobatungamila,
koga bupitipiti gwe basakalulwama gobabulaya.
4Fumwa aitobhatsha ne tjimwe zhuba le bushongola,
koga ndulamo inosunungula nthu mu lufu.
5Ndulamo ye usina nlandu inotambunudza zila iye,
koga mbiimbi unokonesiwa nge bubi gugwe.
6Ndulamo ye bakatambunuka inobasunungula,
koga basakalulwama banobhatshigwa nge bubi gwabo.
7Nthu mbi ha efa, kugalamoyo kopalala,
ne njemulo dze fumwa dze basina ndzimu dzopela.
8Nlulwami unosunugwa mu mango'ni, kukangina mbiimbi muali.
9Ngo nyeya kukwe nthu mbi unotjinyidzila waagelidzane naye,
koga wakalulwama unotjidziwa nge luzibo.
10Ha balulwami bakadwililambeli, ntuthu unoshatha,
ngono ha babi bekolomoka bathu banopululudza.
11Makombolelo e balulwami anokudza nzi nkulu,
koga milomo ye babi inowukolomodza.
12Iye unolingila pasi mbakisani naye aana nkumbulo,
koga nthu unohwisisa unozwinyalalila.
13Nzwina bung'wa unoyenda elebanya unodusa zwikowa,
koga iye unogalikabgwe mu meya unozwibiga mu moyo uwe.
14Pasina gumbuludzo, bathu banowa,
koga pana bakumbuludzi banjinji kuna mbakililo.
15Iye unozwisungila ntaya unowozwibona ne kwako,
koga iye unobenga kwakajalo wakasununguka.
16Nkadzi unolemedzeka una gudzo,
koga balume bakasima bawowana fumwa.
17Nthu una meya yakanaka unobuyigwa,
koga nthu nkukutu unozwilonga mu mbatsha.
18Nthu mbiimbi unowana mbayilo unotjebela,
koga nthu uno dzwala kwakatambunuka unovuna kwe malebeswa.
19Iye wakalulwama kwe malebeswa unowotjila,
koga iye unotobela bubi unowofa.
20Bathu be mikumbulo yakaleleka banoshimisa kuna Yahwe,
koga ibo basina nlandu banobashathisa.
21Zibani kuti, nthu mbi haanga letjiwe koga asalobgwa shamu,
koga ibo bakalulwama banowosunungugwa.
22Se rin'gi ye golide yakalongwa mu tjimilo tje hwotji,
konga nkadzi wakanaka asina nkumbulo.
23Zwinoyemugwa nge balulwami zopelela zwili zwibuya,
koga zwinoyemugwa nge batjinyi zopelela zwisiyizo.
24Umwe nthu unopa akatambunudza luboko, unofumila mbeli,
mmwe unotjiba zwaakafanila pa bamwe, unoshayila tjose.
25Nthu una lubu unowofuma,
naiye unodilidzila unowodilidzigwa.
26Bathu balonga bhiso nthu unotjiba mathunde,
koga makombolelo amu nsholo we unoatengesa.
27Iye una moyonlefu wekushaka bubuya unoshaka gudzo,
koga bubi gozha kuna iye unoguvima.
28Iye unogalabgwe mu fumwa iye unowowa,
koga nlulwami unowopasula se zhani bgwelele.
29Iye unodziidza be nsha uwe unowothuwa lifa phepo,
ne tjilengwe tjowobe nlanda ku ntjenjedu.
30Ntjelo we nlulwami nti we butjilo,
koga kusabe ne nlayo kobulaya.
31 #
1 Pita 4:18
Ha nlulwami epiwa mbhailo uwe mu shango,
mbiimbi ne ntjinyi koying'wi nge kukwe!
Kalanga Bible © Bible Society of Botswana, 2008, 2018.