Bafilipi 3
3
Ndulamo ye malebeswa
1Tje bupelo zwikamu zwangu, shathani muna She. Ate ali mang'oni ku ndili, kumukwalila zwithu izozwazo kakale akuna mbatsha kumuli. 2Muzwitjengete mu mbgwa, muzwitjengete mu bashingi be bubi, muzwitjengete muna banopalulanya mbili. 3Ngobe ndiswi buthumbi gwe malebeswa, iswi tinothigamila Ndzimu nge Meya yawo, tizwiloba ifuba muna Kirisiti Jesu. Atitogalabgwe mu mishingo ye tjinyama; 4nenguba imi nge kwangu ndina tjandingagalabgwe mutjili tje tjinyama. Ha kuli kuti kuna unatjaangagalabgwe mutjili tje tjinyama, imi ndingagalabgwe kupinda. 5#Baroma 11:1; Mishingo 23:6; 26:5Ndakathumbigwa mu zhuba le buzhanakadzi le kuzwagwa kwangu. Ndi N'iziraela ngozwagwa, we ludzi gwa Bhenjamini, Nhebheru, wakazwagwa nge Bahebheru; ngekwe kulondolodza nlayo, ndi Nfarasi; 6#Mishingo 8:3; 22:4; 26:9-11ngekwe kutukutilila, ndakabe ndatukutilila kudziyidza bagalimoyo; ngekwe kuwana ndulamo kwe Ndzimu mu kulondolodza nlayo, andina nlandu. 7Koga mbuzilo kene ili ipi yandakabe ndinayo, ndoyitola ili ndashikilo ngekwa Kirisiti. 8Nge malebeswa ndotola tjimwe ne tjimwe ili ndashikilo, ngobe luzibo gwandinago ngekwa Kirisiti Jesu She wangu gopinda zwithu zose. Nge kukwe ndakalashikigwa nge zwithu zose, ngono azwitola zwili malala, kuti ndizo Kirisiti abe mbuzilo kundili, 9kuti kakale ndiwang'we munli, ndisina ndulamo nge kwangu yakatemelela mu nlayo, koga ndibe ne ndulamo ye Ndzimu nge kugalamoyo muna Kirisiti. Iko kudumila kunodwa ku Ndzimu, kunoshaka kugalamoyo, 10kuti ndizo ndizibe Kirisiti ne masimba e kumuka kukwe ne kudziyidzika mu kubhatana naye, ndifanana naye mu lufu gugwe, 11kuti, ha kutubuka, ndimusiwe mu bafi.
Kulabukila kuwana mbhayilo
12Anditodwa kuti ndakatubula kale kene kuti ndakatjilulwama. Ndodwilila ndigwisa kuwana mbhayilo, ngobe Kirisiti Jesu wakandithama abe uwe. 13Zwikamu, anditokumbula kuti imi ndauwana kale; koga tjing'ompela tjandinothama, hwukangang'wa tjishule kwangu ndibe ndigwisila kuswika kuna tji mbeli. 14Ndodwilila ndigwisila kunowidza lubilo, kuti ndiwane mbhayilo wandakadanigwa kudzimu nge Ndzimu muna Kirisiti Jesu.
15Tose bakakula tjimeya ngatibeni nge nkumbulo wakajalo. Koga ha mukumbula nge zila ipoga ngekwa ikoku, Ndzimu unowomuzumbunulila ikokubo. 16Koga ngatitjilileni mu malebeswa atakawana.
17 #
1 Bakorinta 4:16; 11:1 Zwikamu, dwililani mube bayedzi bangu, mulingilile ibabo banolondolodza tjilakidzilo tjatakamupa. 18Ngobe banjinji bandakamubudza nge kwabo kanjinji, ngono na ngwenu nditjamubudza ngekwabo nge mishodzi, banotjila se zwita zwe tjileyanyo tja Kirisiti. 19Bhelelo labo hwuloba, Ndzimu wabo ntumbu wabo, ngono banozwikudza nge tjabakafanila kubhatigwa nge shoni. Mikumbulo yabo imu zwithu zwe shango. 20Koga bugalo gwedu gu kudzimu, kakale takalindila Ntjidzi kudwako, iye She Jesu Kirisiti, 21iye unowoshandula mibili yedu isakasima kuti inge mbili uwe we kukudziwa, nge simba linontubulisa kuyisa zwithu zose pasi kukwe.
Kalanga Bible © Bible Society of Botswana, 2008, 2018.