Bafilipi 2
2
Kuzwiyisa pasi kwa Kirisiti ne bukulu gugwe
1Ndizo ha ili kuti kuna kukulumbidza muna Kirisiti, ne nyaladzo mu ludo gugwe, ne kukobana ne Meya, ne moyo nyolo ne kuhwila zogwadza, 2zhadzisani kushatha kwangu nge bung'ompela mu nkumbulo, muna ludo gung'ompela ne meya ing'ompela ne nkumbulo nng'ompela. 3Musishinge tjimwe nge kuzwikumbulila koga kene kuzwikudza, koga mu kuzwiyisa pasi, tolani kuti bamwe banoyita pamuli. 4Mmwe ne mmwe wenyu ngaasilinge zwinonshathisa koga, koga ngaalinge ne zwinoshathisa bamwe. 5Ibeni ne njalakang'wa edzi mu muli, idzo dzamunadzo muna Kirisiti Jesu:
6Iye wakati ali Ndzimu,
kasitole kulizana ne Ndzimu,
ili tjimwe tjingagala tjakanamatigwa
7koga wakasiya kose kukwe,
kangina mu bulanda
kabe mutjifano tje bathu.
8Ngono kati awanika ali mu tjifano tje nthu kazwiyisa pasi,
kabe unohwa kudzina engina mu lufu,
igo lufu mu tjileyanyo dumbu.
9Ndizo Ndzimu wakammilidzila pezhugwi kwazo,
ukampa zina lipezhugwi,
zina linopinda limwe ne limwe,
10 #
Isaya 45:23
kuti ndizo nge zina la Jesu
zwidwi zose zwithigame,
kudzimu ne mu shango na pasi,
11ne lulimi gumwe ne gumwe gulebe,
kuti Jesu Kirisiti ndi She,
kukudza Ndzimu Tate.
Penyani se tjedza mu shango
12Ndizo badiwa bangu, sekwa magala mundihwa, kusi ndili yapo koga ne mu busipo gwangu mundihwe kupinda, mushingile tjidziwa kwenyu nge kutja nenge kutetema, 13ngobe Ndzimu unoshinga mu muli, kuthama kuti mutubule kushingila ne kushaka kushathisa iwo.
14Shingani tjimwe ne tjimwe musingang'ong'ole kene kuli kukakabadzana, 15#Matama 32:5kuti ndizo musibe ne nlandu, mube babuyanana, muli bana be Ndzimu basina itoyi pakati kwe tjizekugwana tjakakombama tjakabipa kwazo. Mopenya pakati kwabo, muli tjedza mu shango, 16makabhatisisa dama le butjilo, kuti ndizo mu zhuba la Kirisiti ndizwikudze kuti, andizolabukila suli kene kushingila suli.
17Nenguba malopa angu angadigwa pezhugwi kwe tjibhayilo tje kugalamoyo kwenyu, ndakashatha, ndopululudza namwi mose. 18Sa ikoko namwibo makafanila mushathe, mupululudze nami.
Timoti na Epafurodito
19Ndogalabgwe muna She Jesu, kuti ndowotuma Timoti kumuli tjinyolotjo, kuti ndizo ndikulumbidziwe nge thawu nge kwenyu. 20Andina mmwe unonga iye, ungabe ne hanya namwi nge malebeswa. 21Akuna wandinaye unonga iye, bose banogwisila njemulo dzabo koga, dzisi dza Jesu Kirisiti. 22Koga moziba sekwa akazwilakidza tjaali itjo. Wakashinga nami mu ndebo mbuya, se nthu ne nkololo uwe. 23Ndizo ndogalabgwe kuntuma tjinyolotjo ha ndabona kuti tjimo ini nge kwangu. 24Ndogalamoyo muna She kuti nami ndowozha ikoko tjinyolotjo.
25Ndakakumbula kuti kwakafanila kutuma Epafurodito ikamu tjangu, kakale ali nshingi nami. Ti babhayani tose, iye ntumwa wenyu wakandibhatsha muna zwandinosheta. 26Wakabe akamushuba mose, ngono ali mu buyendasi, ngobe makahwa kuti wakabe egwala. 27Dumbu wakagwala, kashoko fa kabuya patukununu, koga Ndzimu wakanhwila zogwadza. Kusi iye koga, namibo kuti buyendasi gusi tathikane ne gumwe buyendasi. 28Ndakatukutilila kuntuma, kuti mushathile kumbona kakale nenge kuti pamwe ndisidziyidzike kwazo. 29Ndizo mun'amutjile muna She nge kushatha kose, mutete bathu bakajali, 30ngobe wakashoko be afa, efila nshingo wa Kirisiti, elonga butjilo gugwe mu mbatsha, kuwidza nshingo wenyu kundili.
Kalanga Bible © Bible Society of Botswana, 2008, 2018.