Mbalo 3
3
Bakololo ba Aroni
1Edzi ithawu ngekwe nsha wa Aroni na Mushe mu zhuba Yahwe labakalebeleka na Mushe pezhugwi kwe Dombo le Sinai. 2#Mbalo 26:60Aroni wakabe ana bakololo bali banna: Mbano ali Nadabu, etobegwa ndi Abihu, Abihu etobegwa ndi Eleazari, Eleazari etobegwa ndi Ithamari. 3Bakazhodziwa bebigigwa nshingo we bupirisiti. 4#Zwipo 10:1, 2; Mbalo 26:61Koga Nadabu na Abihu bakafila mbeli kwa Yahwe pabakayisa moto wakatemapala mbeli kwa Yahwe mu tjilambanyika tje Sinai, befa basina bana. Ndizo Eleazari na Ithamari bakashinga bali bapirisiti butjilo gose gwa Aroni tate babo.
Balevi banobigigwa kushingila bapirisiti
5Yahwe bakadwa Mushe bakati, 6“Sedzedza ludzi gwa Levi mbeli kwe mpirisiti Aroni kuti babe babhatshi babe. 7Bakafanila kuti babhatshe Aroni kose ne gubungano lose mu mishingo ye nshasha we bushanganilo abe shinga mu bugalo gwe Ndzimu. 8Batjengete zwija zose zwe nshasha we bushanganilo, kakale bebhatsha bathu be Iziraela kushinga mu bugalo gwe Ndzimu. 9Upe Aroni ne bakololo babe Balevi, wakabapiwa nge buzhalo, be shalugwa mu bathu be Iziraela. 10Unowobiga Aroni ne bakololo babe kushinga bali bapirisiti, koga ha kuna mmwe upoga ungagwisa kukuthama abulawe.” 11Yahwe bakadwa Mushe bakati, 12#Kufuluka 13:2“Bona, ndazwitolegwa Balevi mu bathu be Iziraela kube bangu mu bumo gwe mbano imwe ne imwe inozwagwa mu bathu be Iziraela. Balevi banowobe bangu, 13ngobe mbano dzose nde dzangu, ngoti mu zhuba landakabulaya mbano dzose dze Baegipiti, ndaka zwishaluligwa mbano dzose mu Iziraela, mbano ye nthu kene ye ithuwo, dzowobe dzangu, ndimi Yahwe.” 14Yahwe bakadwa Mushe kakale bali mu tjilambanyika tje Sinai bakati, 15“Bala Balevi nge ng'umba dza botate babo nenge misha yabo, ubale kudwa mu nlume mmwe ne mmwe ana mwedzi ng'ompela akazwagwa kuyenda pezhugwi.” 16Ndizo Mushe kababala kuyendidzana ne dama la Yahwe sekwa bandwa. 17Awa ndiwo mazina e bakololo ba Levi: Geshoni na Kohati na Merari. 18Awa mazina e bakololo ba Geshoni nge misha yabo: Libeni na Shimeyi 19Bakololo ba Kohati nge misha yabo ndi Amuramu na Izha na Heburoni na Uziele. 20Bakololo ba Merari nge misha yabo ndi Mahili na Mushi. Eyi ndiyo misha ye Balevi nge ng'umba dza botate babo.
21Bakololo ba Geshoni nge misha yabo ndi Libini na Shimeyi. Eyi ndiyo misha ye Bageshoni nge ng'umba dza botate babo. 22Bakabagwa kudwa mu bana betjilume bana mwedzi ng'ompela bakazwagwa kuyenda pezhugwi bakabe zwiwulu zwili kutendeka zwina mazana ali mashanu (7 500). 23Be misha ye Bageshoni bakabe bakafanila baka mishasha ku bhezuba shule kwe bugalo gwe Ndzimu, 24na Eliyasafu nkololo wa Laeli ali nsholo we ludzi gwe Bageshoni. 25Bageshoni bakabe bakalingisana ngotjengeta bugalo gwe Ndzimu ne mukati kwago ne tjinogufukidza ne tjisitilo tji pa nkoba we nshasha we bushanganilo 26ne zwisitilo zwakatendenyedza bugalo gwe Ndzimu ne tjibeso tjinopisigwa zwibhayilo ne tjisitilo tje nkoba we nsha wakatendenyedza nshasha we bushanganilo ne misungo yawo, nshingo wose wakalingisana ngoshingwa ipapo.
27Ng'umba ya Kohati yakabe ili ye nsha we Baamuramu ne nsha we Baizhari ne nsha we Baheburoni ne nsha we Bauzieli, misha iyeyi ndiyo ye Bakohati. 28Balume bose bakabagwa kudwa muna una mwedzi ng'ompela akazwagwa kuyenda pezhugwi, bakabe bali zwiwulu zwili zhanakadzi ne mazana ali tathatu (8 600), betjengeta mishingo ye bugalo gwakayengemala. 29Misha ye bakololo ba Kohati yakabe yakafanila gala ku burwa gwe bugalo gwe Ndzimu, 30bana Elizafani nkololo wa Uziele ali ntungamili we ng'umba dza botate be misha ye Bakohati. 31Nshingo wabo wakabe uli kutjengeta Bhokisi le Tjidumano tje Ndzimu ne tafuli ne tjigadziko tje mavone ne zwibeso ne zwija zwe bugalo gwakayengemala gunoshingisiwa nge bapirisiti ne tjisitilo, nshingo wose wakalingisana ngoshingwa ipapo.
32Eleazari nkololo wa Aroni mpirisiti, wakabe ali ntungamili we batungamili be Balevi, kakale akalingilila banoshinga mu bugalo gwakayengemala. 33Bakololo ba Merari yakabe ili Maheli na Mushi. Eyi ndiyo misha ye Bamerari nge ng'umba dza botate babo. 34Balume bose bakabagwa kudwa muna ana mwedzi ng'ompela akazwagwa kuyenda pezhugwi bakabe zwiwulu zwili tathatu ne mazana ali mabili (6 200). 35Ntungamili we ng'umba ya botate be misha ya Merari wakabe ali Zuriele nkololo wa Abihaile, bakabe bakafanila gala ku bunandzwa gwe bugalo gwe Ndzimu. 36Bakololo ba Merari bakabigwa kutjengeta makwasayili e bugalo gwe Ndzimu ne makoko ne phanda ne misemo ne zwithu zwazo zose ne nshingo wose wakalingisana ne zwithu izwezwi, 37nenge phanda dzakapoteleka nsha ne misemo yadzo ne mbambo ne misungo yawo.
38Mushe na Aroni ne bakololo babe bakabe bakafanila gala mbeli kwe bugalo gwe Ndzimu ku bhezhuba, mbeli kwe nshasha we bushanganilo, bakalingisana ne kunobhuda zhuba, bakalingisana ngoshinga mishingo ye bugalo gwakayengemala ne tjimwe ne tjimwe tjakafanila yitigwa bathu be Iziraela, koga kwakabe kuti ntaya esedzela ebulawa. 39Balevi bose be tjilume kudwa mu mwana we mwedzi azwagwa kuyenda pezhugwi bakabagwa ndi Mushe na Aroni nge misha yabo nge ndaulo ya Yahwe, bakabe bali zwiwulu zwili makumi mabili ana mabili (22 000).
Balevi banotola bumo gwe bakololo be mbano
40Yahwe bakadwa Mushe bakati, “Bala bana bose be bathu be Iziraela be mbano be tjilume, kutangisa ne una mwedzi akazwagwa kuyenda pezhugwi, ubabale nge mazina. 41Ngono unditolele Balevi, mu bumo gwe mbano dzose dze bathu be Iziraela, ne bana be kutanga be zwithuwo zwe Balevi mu bumo gwe bana be kutanga be zwithuwo zwe bathu be Iziraela, ndimi Yahwe.” 42Ndizo Mushe kabala mbano dzose dze bathu be Iziraela sekwa akadwiwa ndi Yahwe. 43Ngono be tjilume bose be mbano bakabagwa nge mazina, kudwa muna una mwedzi ng'ompela kuyenda pezhugwi, bakabe bali zwiwulu zwili makumi mabili ana bubili ne mazana ali mabili ana makumi ali kutendeka ana butatu (22 273).
44Yahwe bakadwa Mushe bakati, 45“Tjitola Balevi mu bumo gwe mbano dzose dze bathu be Iziraela ne zwithuwo zwe Balevi mu bumo gwabo, ngono Balevi banowobe bangu, ndimi Yahwe. 46Se bana be tjilume be mbano be bathu be Iziraela bekulila be Balevi nge bali mazana mabili ana makumi ali kutendeka ne butatu, (273) bakafanila dzutunula mbalo ipezhugwi kwe mbalo ye Balevi. 47Ng'ompela unlipile nge maloso e siliva ali mashanu, kuyendidzana nge shekele dze bugalo gwakayengemala, shekele kuli gira dzili makumi mabili (20), 48mari akadzutunula be mbalo yakapinda uape Aroni ne bakololo babe.” 49Mushe katola mari ye kudzutunugwa muna ibaba bakabe bepinda nge mbalo yakadzutunugwa nge Balevi 50Wakatola maloso e shekele dzili tjiwulu tjing'ompela tjina mazana matatu ana makumi ali tathatu ana mashanu (1 365) kuyendizana ne shekele dze bugalo gwakayengemala mu mbano dze bathu be Iziraela. 51Mari e kudzutunugwa Mushe kaapa Aroni ne bakololo babe kuyendidzana ne dama la Yahwe sekwa Yahwe bakabe bandwa.
Currently Selected:
Mbalo 3: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
