Mbalo 4
4
Mishingo yakapiwa Balevi be ludzi gwa Kohati
1Yahwe bakadwa Mushe na Aroni bakati, 2“Bala bakololo be Balevi be ludzi gwa Kohati nge misha yabo nenge ng'umba dza botate babo, 3kudwa mu balume be makole ali makumi matatu (30) kunoti kuna bana makole ali makumi mashanu (50), ubale bose bangangina mu nshingo, kushinga nshingo mu nshasha we bushanganilo. 4Nshingo we bakololo ba Kohati mu nshasha we bushanganilo, wutjengeta zwithu zwakayengemala kwazo. 5Ha nshasha ufulusiwa, Aroni ne bakololo babe banowongina mukati bakadelusa tjisitilo, bebe befukidza bhokisi le butendeki nditjo. 6Balifukidze nge makukuta akasukiwa, bebe bewala jila le mbala we makole, bebe belonga mapango anolisenga.
7“Bafukidze tafuli ye tjiwunga tjinopiwa Yahwe nge jila le mbala we makole wakabondelela, babige ndilo ne ndigwana dzinopisila motsha ne ndilo hwulu ne mapepe e tjipo tje tjing'o, ne tjiwunga tje misi yose tjibigwe payili. 8Bazwifukidze zose nge jila shaba, bebe beli fukidza nge makukuta akasukiwa bebe belonga mapango anolisenga.
9“Batole jila le mbala we makole wakabondelela bafukidze tjigadziko tje luvone ne mavone atjo ne midzibo yatjo ne ndigwana dzatjo ne zwija zwe mafuta zwakashingisiwa. 10Batjipetele ne zwija zwatjo zose zwili mu bhetelo le gukuta lakasukiwa babe betjibiga mu thala.
11“Pezhugwi kwe tjibeso tjinopisigwa zwibhayilo tje golide bawale jila le mbala we makole wakabondelela, bebe betjipetela nge bhetelo le makukuta akasukiwa babebetjibiga mu thala. 12Batole zwija zose zwinoshingisiwa mu bugalo gwakayengemala bazwipetele nge jila le mbala we makole wakabondelela, bebe bezwifukidza nge makukuta akasukiwa e phuka dze gungwa, bebe bezwibiga mu thala. 13Bawole nlota mu tjibeso tjinopisigwa zwibhayilo babe bewala tjila le mbala we bushaba gwakabondelela pezhugwi kwatjo. 14Babige zwija zose zwe tjibeso tjinopisigwa zwibhayilo mutjili zwinoshingisiwa ipapo, makambana e moto ne mbambo dzino bhaya nyama ne maharawo ne zwikutili, zwija zose zwe tjibeso tjinopisigwa zwibhayilo, babe bewala makukuta akasukiwa akanaka pezhugwi kwatjo babe betjibiga mu thala. 15Kowoti Aroni ne bakololo babe bapedza fumika bugalo gwakayengemala ne zwija zwago zose, se be bukotokelo befuluka, be ng'umba ya Kohati bazhe basenge, koga abazofanila kutha zwithu zwakayengemala, ngoti bangafa. Ezwi ndizo zwithu zwe nshasha we bushanganilo zwakafanila sengwa nge bakololo ba Kohati.
16“Eleazari nkololo we mpirisiti Aroni unowobe ntjengeti we mafuta e luvone ne motsha unonuhwa zwinozipa ne tjipo tje mathunde tje misi ne misi ne mafuta anozhodziwa, ne kulingilila bugalo gwe Ndzimu na zose zwimuguli zwe bugalo gwakayengemala ne zwija zwago.” 17Yahwe bakadwa Mushe na Aroni bakati, 18“Musiletje ludzi gwe misha ye Bakohati gukalobesiwa pakati kwe Balevi, 19muthame kuti batjile basife ha bangasedzela pejo ne zwithu zwakayengemala kwazo. Aroni ne bakololo babe bangine mukati, ngono bape mmwe ne mmwe wabo nshingo ne ntolo wakanlingisana. 20Koga Bakohati basitongongina mukati bakashozhela zwithu zwakayengemala, nenguba kuli kwe tjibakana, abangajalo banowofa.”
Mishingo yakapiwa Balevi be ng'umba ya Geshoni
21Yahwe bakadwa Mushe bakati, 22“Bala Balevi be ludzi gwa Geshoni nge misha yabo nenge ng'umba dza botate babo, 23kudwa mu bathu be makole ali makumi matatu kunoti kuna bana makole ali makumi mashanu, ubale bose bangangina mu nshingo kushinga mu nshasha we bushanganilo. 24Oyu ndiwo nshingo we misha ye Bageshoni mu kushinga nenge mitolo yakabalingisana: 25Banowosenga zwisitilo zwe bugalo gwe Ndzimu ne nshasha we bushanganilo ne tjinogufumika tje makukuta akasukiwa pezhugwi kwago ne tjisitilo tje nkoba we nshasha we bushanganilo 26ne matyila akalembeleka mu nsha ne tjisitilo tje nkoba we nsha wakakombeledza bugalo gwe Ndzimu ne tjibeso tjinopisigwa zwibhayilo ne misungo yago ne zwija zose zwinoshingisiwa kumisa zwithu izwezwi, ngono bathame kose kwakabalingisana ne kuti bakushinge. 27Nshingo wose we bakololo be Bageshoni unowobe mu ndaulo ya Aroni ne bakololo babe, kose kwabakafanila senga ne kose kwabakafanila thama, mubudze bose bakalingisana kusenga ntolo wakabalingisana. 28Oyu ndiwo nshingo we bakololo be Bageshoni mu nshasha we bushanganilo, ngono nshingo wabo unowobe wakalingiligwa ndi Ithamari nkololo we mpirisiti Aroni.
Mishingo yakapiwa Balevi be ng'umba ya Merari
29“Ngekwe ludzi gwa Merari, ubabale nge misha yabo nenge ng'umba dza botate babo, 30kudwa mu bathu be makole ali makumi matatu (30) kunoti kuna bana makole ali makumi mashanu (50), ubale mmwe ne mmwe ungangina mu nshingo we kuthama nshingo we nshasha we bushanganilo. 31Banowobe bakalingisana ngosenga makwasayili e bugalo gwe Ndzimu ne makoko ago ne phanda dzago ne zwigadziko zwago ne kushinga nshingo wose we nshasha we bushanganilo 32ne panda dze nsha kupoteleka ne zwigadziko zwadzo ne mbambo ne misungo ne zwija zose nenge zwithu zose zwinowoshingisiwa, nlume mmwe ne mmwe apiwe tjaakafanila senga. 33Oyu ndiwo nshingo we misha ye bakololo ba Merari, nshingo wabo wose mu nshasha we bushanganilo bali mu luboko gwa Ithamari nkololo we mpirisiti Aroni.”
Kubagwa kwe Balevi
34Mushe na Aroni ne batungamili be gubungano bakabala bakololo be Bakohati nge misha yabo nenge ng'umba dza botate babo, 35kudwa mu mmwe ne mmwe unga ngina mu nshingo we kushinga mu nshasha we bushanganilo una makole ali makumi matatu (30) akazwagwa kuyenda pezhugwi kuna bana makole ali makumi mashanu (50). 36Ngono bakabagwa nge misha yabo bakabe zwiwulu zwili zwibili zwina mazana ali kutendeka ana makumi ali mashanu (2 750). 37Ibaba ndibo be misha ye Bakohati bakabe beshinga mu nshasha we bushanganilo, bakabagwa ndi Mushe na Aroni kuyendidzana ne ndaulo ya Yahwe yabakapa Mushe.
38Bageshoni bakabagwa nge misha yabo nenge ng'umba dza botate babo. 39Balume bose kudwa muna ana makole ali makumi matatu kuyenda pezhugwi kuna ana makole ali makumi mashanu (50) wakabe akalizana kungina mu nshingo we kushinga mu nshasha we bushanganilo, 40bakabagwa nge misha yabo nenge ng'umba dza botate babo bakabe bali zwiwulu zwili zwibili zwina mazana ali matathatu ana makumi ali matatu (2 630). 41Eyi ndiyo misha yakabagwa ye bakololo ba Geshoni, bose bakabe beshinga mu nshasha we bushanganilo, bakabagwa ndi Mushe na Aroni kuyenda nge ndaulo ya Yahwe.
42Misha ye bakololo ba Merari yakabagwa nge misha nenge ng'umba dza botate babo, 43kudwa muna bana makole ali makumi matatu (30) bakazwagwa kuyenda pezhugwi kuna bana makole ali makumi mashanu (50), mmwe ne mmwe wakabe akalizana kungina mu nshingo we kushinga mu nshasha we bushanganilo, 44bakabagwa nge misha bakabe zwiwulu zwili zwitatu zwina mazana ali mabili (3 200). 45Ibaba ndibo be misha ye bakololo ba Merari, bakabagwa ndi Mushe na Aroni kuyendidzana ne ndaulo ya Yahwe yabakapa Mushe. 46Balevi bose bakabagwa ndi Mushe na Aroni ne batungamili be Iziraela nge misha yabo nenge ng'umba dza botate babo, 47kudwa muna bakabe bana makole ali makumi ali matatu (30) bakazwagwa kuyenda pezhugwi kuna bana makole ali makumi mashanu (50), mmwe ne mmwe wakabe angangina mu nshingo ne kusenga ntolo mu nshasha we bushanganilo, 48bakabagwa bakabe zwiwulu zwili zhanakadzi zwina mazana ali makumi mashanu ana makumi ali zhanakadzi (8 580). 49Kuyendidzana nge ndaulo ya Yahwe yabakapa Mushe, mmwe ne mmwe wakapiwa nshingo uwe we kushinga kene kusenga, tjabakabe bowobe badwiwa. Saikoko Mushe kababala Yahwe sekwa bakandwa.
Currently Selected:
Mbalo 4: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
