Mbalo 23
23
1Ngono Bhalamu kadwa Bhalaki kati, “Undibakile zwibeso zwili kutendeka ipapa, ube undilulwamisila mikong'wana ili kutendeka ne nyundo dzili kutendeka.” 2Bhalaki kathama tjaadwiwa ndi Bhalamu, ngono iye na Bhalamu bakayisa tjibhayilo tje nkong'wana ne tje nyundo mu tjibeso tjinopisigwa zwibhayilo tjimwe ne tjimwe. 3Bhalamu kadwa Bhalaki kati, “Ima pa tjibhayilo tjitjo tjinopisiwa, imi ndi yendile mbelinyana, pamwe Yahwe banowozha kundili, ngono tjabanobe bandilakidza itjo ndowokubudza.” Bhalamu kabe etathila pezhugwi kwe dombo. 4Ndzimu ukashangana naye, Bhalamu kadwa Ndzimu kati, “Ndabaka zwibeso zwili kutendeka, ngono mu tjibeso tjinopisigwa zwibhayilo tjimwe ne tjimwe ndayisa nkong'wana ne nyundo.”
5Yahwe bakalonga matama abo mu nlomo wa Bhalamu, bakan'dwa beti, “Bgwilila kuna Bhalaki, ngono umbudze matama iyawa.” 6Ngono kabgwilila kuna Bhalaki, kanon'wana ali mile ana makulukota wose e Moabu pa tjibhayilo tjitje tjinopisiwa. 7Bhalamu katangisa ndebeleko iye kati:
“Bhalaki mambo we Moabu wakanonditola ku Aramu,
ku bhezhuba kwe matombo,
Wakati, ‘buya, undilongele bhiso muna Jakubo,
buya undilongele Iziraela bhiso.’
8Apa ndingalonga bhiso tjini muna usakalongwa bhiso nge Ndzimu,?
Ndingabona nlandu tjini mu nthu usakabongwa nlandu ndi Yahwe?
9Ngoti ndombona ndili pezhugwi kwe matombo,
ndombona ali mu matombo.
Bona, itjaba tjinogala tjili tjoga.
Kakale atjitozwibalila mu zwimwe zwitjaba.
10Ndiani ungabala zwizekugwana zwa Jakubo zwinji se hwuluba,
Banjinji kwazo mu kubagwa.
Letja ndife lufu gwe nlulwami;
Ne bhelelo langu linge lile.”
11Ngono Bhalaki kadwa Bhalamu kati, “Apa wandithamilani kene? Ndakanokutolela kuwolonga bhiso mu zwita zwangu, ngono bona, akuna tjawathama, akusi kubakombolela.” 12Ngono kan'dabila eti, “Apa andizofanila kuleba tjandadwiwa ndi Yahwe kene?”
Kulebesambeli kwe bubili kwa Bhalamu
13Bhalaki kadwa Bhalamu kati, “Ngatiyende tose, paungati ulipo ukabona bamwe be Baizaraela. Unowobona bamwe babo banowobe bali pejo, aungababone bose. Ube undilongela bhiso mubali uli paunowobe ulipo.” 14Kayenda naye ku shango ye Zofimu pezhugwi kwe Dombo le Pisiga, bakaswika bakabaka zwibeso zwili kutendeka, bakapisila tjibhayilo tje nkong'wana ne tje nyundo mu tjibeso tjinopisigwa zwibhayilo tjimwe ne tjimwe.
15Bhalamu kadwa Bhalaki kati, “Ima ipapa kubapa ne tjibhayilo tjitjo tjinopisiwa, nditjanoshangana na Yahwe tjandiyeno.”
16Yahwe bakashangana na Bhalamu, bakalonga matama abo mu nlomo uwe, bakan'dwa beti, “Bgwilila kuna Bhalaki, ngono umbudze matama iyawa.” 17Ngono kaswika kunli, kawana alimile kubapa ne tjibhayilo tjitje tjinopisiwa ana makulukota e Moabu. Bhalaki kambhuzwa kati, “Yahwe balebani?” 18Bhalamu katangisa ndebeleko iye kati:
“Milika, Bhalaki uhwe;
Unditeedze, iwe nkololo wa Zipori
19Ndzimu autonga nthu, kwaunganyepa;
Autonga nthu, kwaungashandula nkumbulo.
Apa ungati tjawaleba, ukasi tjithame kene?
Kene tjawagadzabgwe, aungatjishingikadze kene?
20Bona, ndakapiwa ndaulo kuti ndikombolele,
Ha Ndzimu wakombolela, andingabgwilize shule.
21Auzowana mbipo muna Jakubo
kene kuli kubona mang'oni mu Iziraela.
Yahwe Ndzimu wabo unabo,
kulumbidziwa kwa mambo kupakati kwabo
22Ndzimu wakabadusa mu Egipiti,
wakabagwila se nyati.
23Akuna pheku muna Jakubo,
akuna hakata dzingashingisiwa mu Iziraela.
Ngwenu kowolebgwa ngekwa Jakubo na Iziraela kuyi,
‘Bona tjathamwa nge Ndzimu!’
24Bona bathu ibaba, banomadzuka se shumbakadzi.
Kakale tjomuka se shumbalume,
Aitoizela isazandabula phuka ikaja,
Kudzina ing'wa malopa e zwayabulaya.”
25Ndizo Bhalaki kadwa Bhalamu kati, “Se walamba tjose kulonga bhiso mu Iziraela, usitongo ikombolela tjose.” 26Koga Bhalamu kadabila Bhalaki eti, “Apa andizokubudza kose Yahwe kwabakati ndithame kene?”
Kulebesambeli kwa Bhalamu kwe butatu
27Bhalaki kadwa Bhalamu kati, “Ngatiyende, ngwenu ndowokuyisa ntome. Pamwe kowoshathisa Ndzimu kuti undilongele bhiso kudwa ikweno.” 28Ipapo Bhalaki kayisa Bhalamu pezhugwi kwe Dombo le Peori kwaungalingila tjilambanyika pasi. 29Bhalamu kadwa Bhalaki kati, “Undibakile zwibeso zwili kutendeka ipapa, ube undizhisila mikong'wana ili kutendeka ne nyundo dzili kutendeka.” 30Ngono Bhalaki kathama sekwa adwiwa ndi Bhalamu, kayisa tjibhayilo tje nkong'wana ne tje nyundo mu tjibeso tjinopisigwa zwibhayilo tjimwe ne tjimwe.
Currently Selected:
Mbalo 23: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
