Mbalo 24
24
1Kukati Bhalamu ebona kuti koshathisa Yahwe kukombolela Iziraela, kasitongonoshaka pheku sekwa akathama mu tjibaka tjakapinda. Kashanduka kalinga ku tjilambanyika. 2Ngono Bhalamu kamilidza mesho kabona pakakotokela Baiziraela ludzi nge ludzi. Meya ye Ndzimu ikadelukila munli, 3katangisa ndebeleko iye kati:
“Ndebeleko ya Bhalamu nkololo wa Bheori
ndebeleko ye nlume wakabe ebona zubuyanana#24:3 wakabe ebona zubuyanana: Kene “wakabe akazhalilika mesho.”,
4Ndebeleko ya iye unohwa dama le Ndzimu.
Iye unobona mbono inodwa kuna Masimbawose.
Iye unothigama ekotamisa nsholo, mesho awe akalinga.
5Mishasha iyo yakanaka seni, iwe Jakubo
idzo thumba dzidzo iwe Iziraela.
6Inonga mikuku yakapashila kule kule,
inonga minda imu phili ye gwizi,
inonga makonde akadzwagwa ndi Yahwe,
inonga mikosho ipa hwunde ne vula.
7Vula inowowunga idwa mu makabha awe,
mbewu iye inowobe mu vula njinji,
mambo uwe unowobe nkulu kupinda Agagi,
bushe gugwe gowomilidzigwa pezhugwi.
8Ndzimu wakan'dusa mu Egipiti,
Unobagwila se nyati.
Unowolobesa zwitjaba zwinonyanyayidzana naye,
Unowopkhwanya mafupa azo akabe zwitibhu tibhu,
Unobabhaya nge misebe iye.
9 #
Kutangisa 49:9;
Kutangisa 12:3
Unobuba kalala pasi se shumba,
kakale unonga shumbakadzi, ndiani unowommusa?
Kwakakombolegwa mmwe ne mmwe unokukombolela,
una bhiso mmwe ne mmwe unokulonga bhiso.”
10Bhalaki kazhala bushongola ngekwa Bhalamu, kalobanya maboko awe, kadwa Bhalamu kati, “Ndakakudanila kuwolonga bhiso mu zwita zwangu, ngono bona, wakabakombolela uyijali katatu. 11Ndizo ngwenu milika uyendezo kanyi kuko. Ndakabe ndazwidwa nditi ndowokuwatsha, ngono Yahwe bakakuma mbeli kuti ndikuwatshe.”
12Ngono Bhalamu kadwa Bhalaki kati, “Apa andizobudza batumwa babo bawakatuma kundili kuti, 13‘Nenguba Bhalaki angandipa ng'umba iye ili zhele siliva ne golide, andingatubule kutjuluka ndaulo ya Yahwe. Kuthama bubuya kene mbipo nge kuda kwangu, Yahwe tjabati ndilebe, nditjo tjandinowoleba kene?’
Bulebesambeli gwe bupelo gwa Bhalamu
14“Ngono ngwenu, bona, ndoyenda ku bathu bakanyi kwangu. Ndizoke, ndowokubudza tjinowothamwa nge bathu ibaba mu mazhuba anozha muna bakanyi kwenyu.” 15Katangisa ndebeleko iye kati:
“Ahwa matama a Bhalamu nkololo wa Bheori,
matama e nlume wabona mbono.
16Matama e nthu unohwa matama e Ndzimu,
unoamutjila luzibo gwe u pezhugwi zhugwi.
Unobona mbono ya ibo Masimbawose,
iye unothigama ekotamisa nsholo,
koga mesho awe akalinga.
17Ndombona, koga kusi ngwenu,
ndakanlinga, koga kusipejo pejo.
Nyenyedzi inowobhuda muna Jakubo,
swimbo ye bushe inowobhuda mu Iziraela,
inowopkhwanya migathu ye Moabu.
Inowolobesa bakololo bose ba Shethi.
18Edomu unowokundiwa,
Seiri tjita tjitje unowothuyiwabo,
koga Iziraela unowokunda kupinda.
19Bushe gopiwa mmwe unodwa muna Jakubo,
ngono unowolobesa malimbelimbe e nzi.”
20Ndizo kalinga Amaleki, katangisa ndebeleko iye kati,
“Amaleki wakabe uli iwo umbeli kwe zwitjaba zose,
koga ku bupelo bose,” banowolobela tjose.
21Kalinga Bakeniti, katangisa ndebeleko iye kati,
“Mugele mu bugalo gwakabakiligwa,
gunonga shaka lakabakwa mu shongwe;
22Nenguba kwakajalo, Kaini unowothukudziwa.
Kudza Ashuri ukutapa.”
23Bhalamu katangisa ndebeleko iye kakale kati,
“Yee mme wee mapalala! Apa ndiani unowotjila,
ha Ndzimu ungathama ikoku kene?
24Koga zwikepe zowodwa ku Khitimu
ngono zongondongedza Ashuri na Eberi;
ngono na ibobo banowoloba.”
25Ndizo Bhalamu kamilika, kabgwilila kanyi kukwe na Bhalaki na iyebo kazwiyendilazwe.
Currently Selected:
Mbalo 24: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
