Mbalo 22
22
Mambo we Moabu unodana Bhalamu
1Ndizo Baiziraela bakamilika bakayenda bakanokotokela mu lubala gwe Moabu ku bhezhuba kwe gwizi gwe Jorodani kulingisana ne Jerikho.
2Kukati Bhalaki nkololo wa Zipori ebona bunji gwe Baiziraela, ebuya ehwa tjabakathama Baamoni, 3Mambo we Moabu kose ne bathu babe, bakakuligwa nge lutjo. 4Ngono Bamoabu bakadwa sholotjena dze Midiyani bakati, “Nlunda uwoyu wawolobesa kose kwakatipoteleka se ng'ombe ithukudza fulo mu shango.” Ipapo Bhalaki wakabe ali mambo we Moabu mu misi iyeyo, 5#Mbalo 31:8; 2 Pita 2:15, 16; Judi 1:11katuma batumwa kunodana Bhalamu nkololo wa Bheori ku Pethori pejo ne Gwizi gwe Yufuratesi, mu shango ye Amawu, kundwa beti, “Bona, kuna itjaba tjinodwa ku Egipiti, tjakaandama nge shango yose, tjakotokela pejo nami. 6Izha ngeno tjinyolotjo, ndokukumbila, undilongele bathu ibaba bhiso, ngoti banji, pamwe swiyo ndingatubula kubakunda, abatata mu shango yangu. Ngoti ndoziba kuti ha ukombolela bathu, banokombolegwa, kakale ha ulonga bhiso, bathu banobe ne bhiso.”
7Ipapo hadzasha dze Moabu ne dze Midiyani bakamilika bakabhata nshalu we ku kandila. Bakaswika kuna Bhalamu bakambudza tjabatumwa ndi Bhalaki. 8Ngono kabadwa kati, “Pitshani busiku ipapa, ngono ndowomupa shandulo mangwana, Yahwe sekwa banowobe balebeleka nami.” Hadzasha dze Moabu dzikalala kuna Bhalamu.
9Ndzimu ukazha kuna Bhalamu ukambhuzwa uti, “Aba bathu baunabo ndibo ani?”
10Bhalamu kadabila Ndzimu eti, “Bhalaki nkololo wa Zipori mambo we Moabu wakabatuma kundili eti, 11‘Bona, kuna itjaba tjinodwa ku Egipiti, tjaandama nge shango yose. Ndokumbila, uzhe ngeno tjinyolotjo, undilongele bhiso mu bali, pamwe ndingatubula kubhayana nabo abatata.’ ”
12Ndzimu ukadwa Bhalamu ukati, “Usitongobuya ukayenda ne balume ibaba, kakale usitongobuya ukalonga bhiso mu bathu be Iziraela, ngoti bakakombolegwa.”
13Tjimuka Bhalamu kabinduka kayenda ku hadzasha dza Bhalaki kadzidwa kati, “Bgwililani ku shango ya kanyi kwenyu, ngoti Yahwe balamba ndiyenda namwi.” 14Ipapo hadzasha dze Moabu dzikamilika dzikayenda, kuna Bhalaki dzikaswika dzindwa dziti, “Bhalamu walamba kuzha naswi.”
15Shule kwa ipapo Bhalaki katuma hadzasha dzili njinji kupinda dze kutanga, kakale dzina tjilumbi kupinda. 16Dzikanontulila matama dziti, “Bhalaki nkololo wa Zipori unomukumbila eti, ‘Ngakusibe ne tjimwe tjingamuma mbeli kuzha kundili. 17Ndowomuwatsha kukulu kwazo, nenguba mungati ndimuthamileni, ndotjithama, ndomukumbila izhani muwondilongela bhiso mu bathu ibaba.’ ” 18Koga Bhalamu kadwa balanda ba Bhalaki kati, “Nenguba Bhalaki angandipa ng'umba iye ili zhele siliva ne golide, andingatjuluke ndaulo ya Yahwe, Ndzimu wangu, nenguba ingabe ili mu kuthu kutukununu kene kukulu tjini. 19Koga ndomukumbila pitshani busiku ipapa, sekwakathama bamwe, pamwe Yahwe bangalala baleba tjimwe nami.”
20Ngono mu busiku igogo Ndzimu ukazha kuna Bhalamu ukandwa ukati, “Ha balume ibaba bazha kuwokudana, umilike uyende nabo, koga unothama tjandinowobe ndakudwa.”
Bhalamu ne donki tjitje
21Kukati tjimuka Bhalamu kabinduka kabelesa donki tjitje kayenda ne makulukota e Moabu. 22Koga Ndzimu ukazhala bushongola ngobe ayenda, ngono kukati Bhalamu ali mu zila akatatha donki tjitje ana balanda babe babili, ntumwa wa Yahwe kama mu zila mbeli kukwe kumpinganyidza. 23Kukati donki tjibona ntumwa wa Yahwe ali mile mu zila akabhata thumo nge luboko, tjikapambuka mu zila, tjikangina mu shango. Ngono Bhalamu katjiloba katjibgwiliza mu zila. 24Ipapo ntumwa wa Yahwe kama pakati kwe zijana ipakati kwe minda mibili ye mizhambi pakamanikana, zijana inopinda pakati kwe makuma. 25Ngono kukati donki tjibona ntumwa wa Yahwe, tjikasedzela ku guma tjikazwiyilidza gumbo la Bhalamu mu guma, ngono katjiloba kakale. 26Ipapo ntumwa wa Yahwe kayendila mbeli kanoma pakamanikana kwazo pakabe kusina paungapinda ndipo. 27Kukati donki tjibona ntumwa wa Yahwe, tjikalala pasi Bhalamu ali pezhugwi kwatjo. Ngono Bhalamu kazhala bushongola katjiloba nge lukombo gugwe. 28Ndizo Yahwe bakazhula donki nlomo tjikabhuzwa Bhalamu tjikati, “Apa ndakuthamani kwaungadza uka ndiloba zwingapa katatu kene?”
29Bhalamu kadabila donki eti, “Ngobe wandizana matope! Dzene ndabe ndakabhata thumo ndabe ndowokubulaya sakuno wali.”
30Ngono donki tjikabhuzwa Bhalamu tjikati, “Apa anditeli donki tjitjo tje tjinga tjawakatatha butjilo gugo gose kuswikila nasi kene. Apa kuna pandakatongo kuthama sa ikoku kene?”
Bhalamu kadabila eti, “Aa.”
31Ipapo Yahwe bakazhula Bhalamu mesho, ngono kabona ntumwa wa Yahwe ali mile mu zila akabhata thumo. Bhalamu kakotamisa nsholo kawila pasi akatshibika buso. 32Ngono ntumwa wa Yahwe kambhuzwa kati, “Apa ini waloba donki tjitjo zwingapa katatu? Bona, ndazha se tjita tjitjo, ngobe zila yawakatobela yakakombama. 33Koga donki tjitjo tjandibona tjikapambukila ntome katatu. Ha tjabe tjisajalo, ndobe ndakubulaya itjo ndibe nditjiletja tjitjila.”
34Ipapo Bhalamu kadwa ntumwa wa Yahwe kati, “Ndatjinya, ngobe ndabe ndisaziba kuti wabe uli mile mu zila kundidziba. Ndizo ngwenu, ha ubona kwakabipa kudwilidza gwendo, ndowoshandukila kanyi.” 35Ngono ntumwa wa Yahwe kadwa Bhalamu kati, “Yenda ne balume ibaba, koga ulebe dama landinowobe ndakubudza kuti uli lebe.” Ndizo Bhalamu kayenda ne hadzasha dza Bhalaki.
Bhalaki unoamutjila Bhalamu
36Kukati Bhalaki ehwa kuti Bhalamu waswika, kabhuda kanonshanganidza pa gwizi gwe Arinoni mu nzi nkulu we Moabu pa n'gathu we ntuthu uwe. 37Bhalaki kabhuzwa Bhalamu kati, “Apa andizokutumila thumi kukudana kene? Ini usakazha kundili? Andingatubule kukuwatsha kene?” 38Bhalamu kadabila Bhalaki eti, “Bona, ndazha ku kuli! Apa ngwenu ndina simba landingalebeleka nawe nge buzhalo kene? Dama lingalongwa nge Ndzimu mu nlomo wangu ndilo landingalebeleka.” 39Ndizo Bhalamu kayenda na Bhalaki kunoti ku Kiriathihuzothi. 40Ngono Bhalaki kabhaya tjibhayilo tje ng'ombe ne pkhwizi, katumila nyama kuna Bhalamu ne hadzasha dzaakabe anadzo.
Bulebesambeli gwa Bhalamu gwe kutanga
41Tjimuka Bhalaki katola Bhalamu kan'yisa kwakatuthumala ku Bhamotibali, ngono kati ali ipapo Bhalamu kabona bushomanana gwe bathu.
Currently Selected:
Mbalo 22: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
