Mbalo 16
16
Kupanduka kwa Kora na Dathani na Abiramu
1 #
Judi 1:11
Ndizo Kora nkololo wa Izha, Izha ali nkololo wa Kohati, Kohati ali nkololo wa Levi, kukoti Dathani na Abiramu bali bakololo ba Eliyabu kudwapo Oni nkololo wa Peleti, Peleti na Eliyabu bali bakololo ba Rubheni, bakapandukila Mushe. 2Bakamilika bakamukila Mushe, bazhadziwa nge balume bali mazana mabili ana makumi mashanu (250) bakabe bali batungamili be gubungano, bashalugwa mu gubungano bali balume bana tjilumbi. 3Bakanokubungana mbeli kwa Mushe na Aroni, bakabadwa bakati, “Mapindilila kwazo! Mmwe ne mmwe mu gubungano ileli wakayengemala, Yahwe banaye, ngono ngwenu ini makazwituthumadza kupinda, mu gubungano la Yahwe?” 4Kukati Mushe ehwa nge kwa ikoku, kathigama kakotamila pasi. 5Shule kadwa Kora ne batobeli babe bose kati, “Tjimuka mangwanana Yahwe banowolakidza kuti wabo ndiupi, ne kuti wakayengemala ndiani, banonsedzedza pejo nabo, iye wabanowoshalula banonsedzedza pejo nabo. 6Iwe Kora, ne batobeli babo bose mumuke, mutole zwikambana zwe moto, 7mulonge masimbe anopisa mu zwili, mupise motsha mbeli kwa Yahwe, ngono nlume unowoshalugwa ndi Yahwe ndiye unowobe akayengemala. Mapindilila kwazo, bakololo ba Levi!” 8Ngono Mushe kadwa Kora kati, “Tjihwani imwi bakololo ba Levi. 9Apa kuthu kutukununu kuti Ndzimu we Iziraela ube wakamushalula pakati kwe gubungano le Iziraela, umusedzedza pejo nawo, kube bashingili mu bugalo gwa Yahwe kene? Ne kuti mume mbeli kwe gubungano mulishingila kene? 10Kakale Ndzimu wakamusedzedza pejo nawo, nenge zwikamu zwenyu bakololo ba Levi, apa moshaka ne bupirisiti pezhugwi kwa ikoku kene? 11Iwe ne batobeli babo makubunganila kuwobhayana na Yahwe. Aroni ndiani dumbu wamungang'ong'ola nge kukwe kene?”
12Mushe kabe eti kunodang'wa Dathani na Abiramu bakololo ba Eliyabu, koga bakadabila beti, “Atitowozha. 13Apa unokutola bulelu kube wakatidusa mu shango inowunga nkaka ne butji gwe nyutji, kuwotibulayila mu tjilambanyika, ube uzwithama nlauli mutili kene? 14Kakale auzotikotosa mu shango inowunga nkaka ne butji gwe nyutji, kene kuli kutipa thaka ye minda ne minda dze mizhambi. Apa wakazwimisila kutibiga ludandi mu mesho kene? Atitowozha!”
15Mushe kazhala bushongola kadwa Yahwe kati, “Musitongo amutjila zwibhayilo zwabo. Andizotongo tolela mmwe wabo donki, kene kuli kutjinyidzila mmwe wabo tjimwe.”
16Mushe kadwa Kora kati, “Iwe ne batobeli babo mangwana mumuke muzhe mbeli kwa Yahwe, Aroni unowobe alipobo. 17Mmwe ne mmwe azhe ne lukambana gugwe kwe moto mbeli kwa Yahwe, mmwe ne mmwe alonge motsha muguli, ali makambana ali mazana mabili ana makumi mashanu (250) na Aroni azhebo ne gugwe.” 18Ipapo mmwe ne mmwe kazha ne lukambana gugwe gwe moto guna masimbe anopisa mukati, bakalonga motsha pezhugwi kwe masimbe, bakanoma pa nkoba we nshasha we bushanganilo bana Mushe na Aroni. 19Ndizo Kora kakubunganyila gubungano lose pa nkoba we nshasha we bushanganilo. Ngono kukaboneka tjedza tja Yahwe mbeli kwe gubungano lose. 20Yahwe bakadwa Mushe na Aroni bakati, 21“Milani kutjena ne gubungano ileli, kuti ndibalobese tjinyolotjo.”
22Koga Mushe na Aroni bakathigama bakakotamisa njiso dzabo pasi, bakatembezela beti, “Imwi Ndzimu: Ndzimu we meya ye zwinotjila zose, apa mungazhalila gubungano lose bushongola ngono kwatjinya nthu nng'ompela kene?” 23Yahwe bakadwa Mushe Bakati, 24“Idwa gubungano libhude mu nzi wa Kora na Dathani na Abiramu.”
25Ndizo Mushe kamilika ana batungamili be Iziraela, bakayenda kuna Dathani na Abiramu. 26Kaswika kadwa gubungano kati, “Ndomukumbila idwani ipapa, mu mishasha ye bathu ibaba babiibi, musitongo bhata tjimwe tjabo, kusajalo mowolobesiwa nabo ngekwe zwibi zwabo.” 27Ndizo gubungano likadwa pa mishasha ya Kora na Dathani na Abiramu. Ngono Dathani na Abiramu bakabhuda ne bakadzi ne bana babo, bakama pa mikoba ye mishasha yabo. 28Mushe kadwa gubungano kati, “Ndiko sekwa munowoziba kuti Yahwe bandituma kuthama mishingo yose iyeyi, andizozwithamigwa nge kwangu. 29Ha bathu ibaba bangafa lufu gwakawolobeleka se bathu bose, kene bangafa nge zila ye bathu yabagala befa ndiyo, ipapo kowobe kudwa kuti Yahwe abazondituma. 30Koga ha Yahwe bangathama tjimwe tjitshwa, pasi pakaashama, pakabamidza, ne zwithu zwabo zose bebe beyenda ku bugalo gwe bafi bali bapenyu, ipapo mowoziba kuti bathu ibaba bakalengudza Yahwe.” 31Kukati Mushe epedza leba matama wose iyawa, pasi pakapaluka kusi kwabo, 32pakazhuka nlomo kukabamidzilanya ne misha yabo, ne balume bose bakabe bana Kora ne zwija zwabo. 33Bose ne zwabakabe banazo bakayenda ku bugalo gwe bafi bali bapenyu, pasi kukabazhalilila, bakaloba bedwa pakati kwe gubungano. 34Bathu bose be Iziraela bakabe bali ipapo, bakati behwa makuwo abo, bakatizha, bemimila beti, “Ngatitizheni! Pasi panodwa petimidzabo!”
35Ndizo Yahwe bakadelusa moto ukapisa ukalobesa bathu ibaba bakabe bali mazana mabili ana makumi mashanu (250) bakabe bazhisa motsha.
Makambana e moto
36Ipapo Yahwe bakadwa Mushe bakati, 37“Idwa Eleazari nkololo we mpirisiti Aroni aduse makambana anopisila motsha mu moto, aduse masimbe mu makambana aapaladzile kutjena, ngobe makambana akayengemala. 38Katsha makambana iyawa e balume bakafa bebulawa nge zwibi zwabo, uthame zwifumiko zwe tjibeso, ngobe bakaadusa mbeli kwa Yahwe, akayengemala. Ndizo anowobe tjilakidzo ku bathu be Iziraela.” 39Ipapo Eleazari katola makambana akathamwa nge phangula, akadusiwa nge balume bakapisiwa, kaakatsha kathama ndigwana dzinofumika tjibeso. 40Tjakabe ikumbuludzo, kukumbuludza bathu be Iziraela, kuti kusibe ne nthu usi mpirisiti, usi we bakololo ba Aroni, wakafanila sedzela pejo kupisa motsha mbeli kwa Yahwe. Ha angathama eijalo unowobona tjakabong'wa ndi Kora ne batobeli babe. I ndaulo yakapiwa Eleazari, kubudziwa Mushe.
Aroni unotjidza bathu
41Tjimuka gubungano likang'ong'ola kuna Mushe na Aroni liti, “Makabulaya bathu ba Yahwe.” 42Kukati gubungano lakubunganila kung'ong'ola kuna Mushe na Aroni, likatjebuka ku nshasha we bushanganilo, ngono bonani, gole likabe lakaufukidza, kukaboneka tjedza tja Yahwe. 43Mushe na Aroni bakayenda bakanoma mbeli kwe nshasha we bushanganilo. 44Ngono Yahwe bakadwa Mushe bakati, 45“Bhudila kutjena ne gubungano ileli, kuti ndililobese tjinyolotjo!”
Mushe na Aroni bakathigama bakakotamisa njiso dzabo pasi. 46Ngono Mushe kadwa Aroni kati, “Tola lukambana gugo gwe moto, ukokele masimbe anopisa muguli kudwa mu tjibeso. Ube ulonga motsha muguli, tjinyolotjo ugusengele ku gubungano, ubathamile gadzano na Yahwe, ngobe bushongola gwa Yahwe gwaswika ne tjiga tjatangisa.” 47Ipapo Aroni kathama sekwa adwiwa ndi Mushe. Kalabukila pakati kwe gubungano, ngono bona, tjiga tjikabe tjatangisa kale, pakati kwe bathu. Kalonga motsha mu moto kathamila bathu gadzano na Yahwe. 48Kama ali pakati kwe zwitumbu ne bapenyu, tjiga tjikama. 49Bathu bakabe bafa nge tjiga bakabe bali zwiwulu zwili gumi lina bunna ne mazana ali kutendeka (14 700) kuzhe kwe bakafa nge mishingo ya Kora. 50Kukati tjiga tjatjima, Aroni kashandukila kuna Mushe ku nkoba we nshasha we bushanganilo.
Currently Selected:
Mbalo 16: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
