Mbalo 12
12
Miriamu na Aroni banosola Mushe
1Miriamu na Aroni bakatangisa sola Mushe ngekwe nkadzi uwe we Nkhushi, ngobe wakabe alobola Nkhushi. 2Bebhuzhwana beti, “Apa Yahwe bakalebeleka na Mushe ega? Abazolebelekabo naswi kene?” Ngono Yahwe bakahwa tjabanoleba.
3(Mushe wakabe ali nthu unozwiyisa pasi kwazo, ezwiyisa pasi kupinda nthu mmwe ne mmwe mu shango.)
4Tjinyolotjo Yahwe bakadwa Mushe na Aroni na Miriamu bakati, “Ndomushaka ku nshasha we bushanganilo mose butatu gwenyu.” Ipapo butatu gwabo bakabhuda bakayenda. 5Ndizo Yahwe bakadeluka bali mu gole, bakama pa nkoba we nshasha bakadana Aroni na Miriamu. Kukati bebhudila kuzhe bubili gwabo, 6Yahwe bakabadwa bakati, “Teedzani matama angu:
“Ha muna nlebesambeli wa Yahwe pakati kwenyu,
Ndowonzwilakidza nge mbono,
Ndowolebeleka naye nge mawoloto.
7 #
Bahebheru 3:2
Koga ngekwe nlanda wangu Mushe akuzojalo;
unogalikabgwe mu ng'umba yangu.
8Iye ndolebeleka naye tishandudzana takalingisana ku mesho
kuli patjena ndisinga pese;
ebona mbumbiko ya Yahwe.
Apa ini tjisingamutjise
sola nlanda wangu Mushe kene?”
9Yahwe bakazhala bushongola nge kwabo, bakathubukana nabo. 10Kukati gole limilika pezhugwi kwe nshasha, Miriamu kadzuka mbili wose, ukashanduka ukasala uli ntjena unga kapuku. Kukati Aroni elinga Miriamu kabona alizhele mapele, 11kadwa Mushe kati, “Ndomukumbila tetshi wangu, musititilike nlandu ngekwe tjibi tjatathama nge bulengwe. 12Musinletje kanga lushabana gwazwagwa gusingatjile gwakajika lubadu gumwe gutjadwa mu ntumbu wa mme bago.”
13Ipapo Mushe kamimila eti kuna Yahwe, “Ndomukumbila Ndzimu wangu, mumpodze!”
14 #
Mbalo 5:2, 3 Yahwe bakashandula Mushe beti, “Ha tate babe bakabe banthwila mate mu buso, apa unobe asakadusigwa kuzhe kwe nzi mazhuba ali kutendeka kene? Umbige kuzhe kwe bukotokelo mazhuba ali kutendeka, shule kwa ikoku abe ebgwiliziwa mu bukotokelo.” 15Miriamu wakazhaliligwa kuzhe kwe bukotokelo mazhuba ali kutendeka, bathu bakasitongoyenda kudzina ebgwiliziwa mu bukotokelo. 16Shule kwa ipapo, bathu bakamilika mu Hazeroti bakanokotokela mu tjilambanyika tje Parani.
Currently Selected:
Mbalo 12: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
