Mbalo 11
11
Pathu pakadang'wa Tabera
1Bathu bakabe beng'ong'ola kuna Yahwe ngekwe kudziyila kwabo. Ngono kukati Yahwe be bahwa, bakazhala bushongola bakadelusila moto mu bali, ukapisa gwamu limwe le bukotokelo. 2Ndizo bathu bakamimila beshaka bhatsho kuna Mushe, Mushe katembezela kakumbila kuna Yahwe, moto ukadzima. 3Ndizo pathu ipapo pakadang'wa kuyi, Tabera.#11:3 Tabera: Nge Tjihebheru kodwiwa kuti litshwa, ngobe moto wa Yahwe wakapisa mu bathu.
Mushe unoshalula batungamili bali makumi ali kutendeka
4Bataya bakabe beyenda ne Baiziraela bakabe ne njemulo hwulu dze ku ja nyama, ipapo Baiziraela na ibobo bakalila kakale beti, “Dzene tingawana nyama tikaja!” 5Tokumbula hwobe dzatakabe tija ku Egipiti tisingalipe, makakabudzi ne mabisi ne liki ne hanyanisi ne galiki. 6Ngono ngwenu tanyadziwa nge zojiwa izwezwi, akutjina tjatingaja akusi mana iyawa atinoja zhuba ne zhuba!
7 #
Kufuluka 16:31
Mana akabe enga phudzi tjena tukununu ye mbewu, ye mbala inonga we nyonje. 8#Kufuluka 16:13-15Bathu bakabe be bhuda bepoteleka beanunga, be koakwiya mu makwiyilo kene beakhwa nge duni. Bakabe beabhika nge hali kene beathama zwiwunga. Nzipo wawo wakabe uhwika unga tjiwunga tjabhikiwa nge mafuta. 9Kwakabe kuti khawa iwila mu bukotokelo busiku, mana ebe ewabo.
10Mushe wakahwa bathu belila misha yose, mmwe ne mmwe ali mile pa nkoba we nshasha uwe. Yahwe bakazhala bushongola kwazo, ngono Mushe kadziyidzika. 11Mushe kabhuzwa Yahwe kati, “Apa madziyidzilani nlanda wenyu kene? Ndathamani tjisamushathisa kwamadza mukabiga ntolo we bathu bose ibaba mu mathudzi angu kene? 12Apa ndimi ndakabumba bathu bose ibaba kene? Kene ndimi ndakabazwala? Ini mungati ndibaguge, se nkadzi akaguga ngawana, kuswikila ndibakotosa ku shango yamakatuna mugadzabgwe bobatategulu babo kene? 13Apa ndingayi kwandingawanila bathu bose ibaba nyama kene? Banoshwa bendililila beti, ‘Utipe nyama tije!’ 14Andingabhabhe bathu bose ibaba ndilindoga, ntolo unondikulila 15Ha kuli iko sekwa munondibhata ndiko, mundibulaye sangwenu, ha mundihwila ngoni, musithame kuti ndibone tshiyilo yangu.”
16Yahwe bakadwa Mushe bakati, “Undidanile sholotjena dze Iziraela dzili makumi ali kutendeka (70) banozibgwa bali batungamili ne hadzasha mu bathu ubadwe bazhe ku nshasha we bushanganilo, kuti bamepo nawe. 17Ndowodeluka azha ndilebeleka nawe ipapo, ndibe nditola mimwe meya yandakakupa ndibapa iyo. Banowokubhatsha kusenga ntolo we bathu ibaba, kuti usitjausenge uli woga.
18“Ndizo ngwenu budza bathu, ‘Muzwitjenepadze kuzwilulwamisila mangwana, mowowana nyama mukaja. Yahwe bakamuhwa pamakabe mulila muti, “Ha tabe tingawana nyama tikaja. Kwabe kuyita ha tabe tisakadwa mu Egipiti!” Ndizo Yahwe banowomupa nyama mukaija. 19Amungaije koga kwe zhuba ling'ompela kene mabili kene mashanu kene ali gumi kene kwe mazhuba ali makumi mabili, 20kowobe kwe mwedzi wose, kudzina musingatjaishake. Ngobe makalamba Yahwe, ibo banamwi, mukalila mbeli kwabo muti, “Apa ini takabhuda ku Egipiti?” ’ ”
21Koga Mushe kadwa Yahwe kati, “Ipapa ndipakati kwe bathu bali zwiwulu zwili mazana ali matathatu (600 000) banoyenda nge makumbo, ngono maleba mukati, ‘Ndowobapa nyama bakaija kwe mwedzi wose!’ 22Apa inowobalizana ha bangabhayigwa ngubi ye pkhwizi ne matanga e ng'ombe kene? Apa hwobe dzose dze gungwa dzingabalizana ha bangadzibhatigwa kene?”
23Yahwe bakadabila Mushe beti, “Apa simba la Yahwe lina tjilizanyo kene? Ngwenu unowobona kuti tjandinoleba tjowobe lebeswa kene aa!”
24Ipapo Mushe kabhudila ku bathu kababudza tjalebgwa ndi Yahwe. Kakubunganya batungamili babo bali makumi ali kutendeka kabamisa bakapoteleka nshasha. 25Ndizo Yahwe bakadelukila pasi bali mu gole bakalebeleka na Mushe, Yahwe bakatola imwe meya yakabe ili munli, bakailonga mu batungamili ibaba bali makumi ali kutendeka (70). Kwakati meya yangina mubali, bakalebelambeli, koga bakasipaphe kakale.
26Kukabe kwasala balume bali babili mu bukotokelo, mazina abo ili, Eledadi na Medadi, bakabe babaligwabo mu batungamili bali makumi ali kutendeka (70), bakabe basayenda ku nshasha. Ngono na ibobo meya ikangina mubali, bakalebelambeli bali mu bukotokelo. 27Mmwe nzhuzha kabhuda kanobudza Mushe kati, “Eledadi na Medadi banolebeselambeli mu bukotokelo.”
28Joshuwa nkololo wa Nuni, wakabe ali mbhatshi wa Mushe kudwa atji nzhuzha, kalebeleka eti, “Mushe tetshi wangu, mubamise!”
29Mushe kanshandula eti, “Apa una fupa nge kwangu kene? Ndoyemula kuti bathu bose ba Yahwe bangabe balebesambeli, ne kuti Yahwe balonge meya yabo mubali.” 30Ndizo Mushe ne batungamili bali makumi ali kutendeka (70) bakabgwilila ku bukotokelo.
Yahwe banotumila nyuni
31Ipapo kukadwa phepo kuna Yahwe ikatutudza hwalishanga idzidusa mu gungwa. Ikadzidelusila mu bukotokelo dziwuluka dzili pezhugwi kungabe luboko gung'ompela kudwa pasi, dzakaandama mbizho dzose dze bukotokelo kungabe gwendo gwe makumbo gwe zhuba. 32Mu zhuba ilelo lose ne busiku gwalo kunoti zhuba lose tjimuka bathu bakabe beshinga bhata hwalishanga. Akuna wakabhata makabha mashomana pana ali gumi. 33Koga bakati batjaja nyama, betjaitafuna, Yahwe bakazhala bushongola ngekwabo, bakabaloba shamu nge mbatsha hwulu. 34Ndizo pathu ipapo pakatumigwa zina kuyi Kiberotihathava, kudwiwa kuti zwikumbu zwe kuyemula, ngobe pali pakabiganyigwa bathu bakayemula nyama.
35Bakamilika mu Kiberotihathava bakayenda ku Hazeroti bakanogalapo.
Currently Selected:
Mbalo 11: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
