Mbalo 10
10
Nyanga dze siliva
1Yahwe bakadwa Mushe bakati, 2“Thula nyanga mbili dze siliva dzaunowoshingisa kudana gubungano ne kulipaladza mu bukotokelo. 3Ngono ha nyanga dzilidziwa nge bubili, gubungano lose lowokubunganila ku kuli pa nkoba we nshasha we bushanganilo. 4Koga ha kungalidziwa gung'ompela, batungamili, hadzasha dze njudzi dze Iziraela, dzowokubunganila ku kuli. 5Ha ulidzila lunyanga pezhugwi, bakakotokela ku bhezhuba banowobhuda bakatola gwendo. 6Ha ulidzila lunyanga pezhugwi gwe bubili, bakakotokela ku burwa banowobhuda bakatola gwendo. Lunyanga gulidzigwe pezhugwi kwazo pabanowobe bebhuda betola gwendo. 7Koga ha ulidzila lunyanga kudana gubungano lose, ugulidze nge nlidzo upoga. 8Nyanga dzilidziwe nge bapirisiti bakololo ba Aroni.
“Oyu ndiwo nlayo kumuli nge kusingapele kuyenda nge zwizekugwana zwenyu. 9Ha mubhuda muyenda ku ngwa munogwa ne tjita tjinomunginilila, mulidze lunyanga, kuti mukumbugwe mbeli kwa Yahwe Ndzimu wenyu, ngono mowoanguligwa mu zwita zwenyu. 10Mulidze lunyanga kakale mu misi yenyu ye kushatha se mu mizano yakabigiwa ne mu mizano ye mwedzi ugala, ne mu tjibaka tje tjibhayilo tjinopisiwa ne tjibaka tje tjibhayilo tje mbakiso ngono zowobe ikumbuludzo kumuli mbeli kwe Ndzimu wenyu. Ndimi Yahwe Ndzimu wenyu.”
Baiziraela banofuluka pa bukotokelo
11Mu gole le bubili, mu mwedzi we bubili una mazhuba ali makumi mabili (20), gole lakamilidziwa pezhugwi kwe nshasha we butendeki. 12Baiziraela bakadwilidza gwendo kudwa mu tjilambanyika tje Sinai kudzina gole linoma pa tjilambanyika tje Parani. 13Bakamilika kuli gwe kutanga nge ndaulo ya Yahwe yabakadwa Mushe. 14Gupo le bukotokelo gwe ludzi gwa Juda lakamilika kutanga nge makupo abo, nlauli wabo ali Nashoni nkololo wa Aminadabu. 15Mbunga we ludzi gwa Isakari wakabe utungamigwa ndi Nethanele nkololo wa Zuari. 16Mbunga we ludzi gwa Zebuluni wakabe waka tungamigwa ndi Eliabu nkololo wa Holoni.
17Kudwapo shule kwaligiwa bugalo gwe Ndzimu, kukamilika ludzi gwa Geshoni, ibo bakasenga bugalo gwe Ndzimu. 18Mbunga we bukotokelo gwa Rubheni wakamilika ne makupo abo, nlauli we mbunga wabo ali Elizuri nkololo wa Shedeuri. 19Nlauli we mbunga we ludzi gwe bana ba Simiyoni wakabe ali Shelumieli nkololo wa Zurishadayi. 20Nlauli we mbunga we ludzi gwe bana ba Gadi wakabe ali Eliyasafu nkololo wa Deuele.
21Ndizo Bakohati bakamilika bakasenga zwithu zwakayengemala, ngono bugalo gwe Ndzimu gwakabambugwa basathu bakaswika.
22Mbunga we bukotokelo gwe ludzi gwa Ifureimi wakamilika nge makupo abo, nlauli we mbunga wabo wakabe ali Elishama nkololo wa Amihudi. 23Nlauli we mbunga we ludzi gwe bana ba Manase wakabe ali Gamaliyele nkololo wa Pedazuri. 24Nlauli we mbunga we ludzi gwe bana ba Bhenjamini wakabe ali Abidani nkololo wa Gideoni.
25Ndizo kukamilika mbunga we bukotokelo gwe ludzi gwa Dani, bali be bupelo mu makotokelo wose, bakamilika nge makupo abo, nlauli wabo ali Ahieza nkololo wa Ammishadai. 26Nlauli we mbunga we ludzi gwe bana ba Asheri wakabe ali Pagiele nkololo wa Okirani. 27Nlauli we mbunga we ludzi gwe bana ba Nafutali wakabe ali Ahira nkololo wa Enani. 28Ikoku ndiko sekwa makupo e bathu be Iziraela akabe emilika ndiko, kuyenda nge mibunga yabo.
29Mushe wakadwa Hobabu nkololo wa Reueli we N'midiati nkalabgwa uwe kati, “Tomilika toyenda ku bugalo gwa takagadziwabgwe ndi Yahwe beti, ‘Ndowomupa igo atiyendeni tose, towokuthamila zwakanaka, ngobe Yahwe bakagadza bgwe Baiziraela zwithu zwakanaka.’ ” 30Hobabu kashandula Mushe eti, “Anditowoyenda, ndowobgwilila kanyi kwedu ku bazwadzi bangu.”
31Mushe kadwa Hobabu kakale kati, “Ndokukumbila, usitilashe, ngobe unoziba sekwa tinokotokela mu tjilambanyika, unowotilingisa. 32Kakale ha ungayenda naswi, tjakanaka Yahwe tjabanowotithamila, tjowobe tjedu tose.”
Baiziraela banodwilila nge gwendo
33Kwakati bathu bemilika ku Dombo le Sinai la Yahwe lakayengemala bakatola gwendo gwe mazhuba matatu, Bhokisi le Tjidumano tja Yahwe lakabatungamila kubashakila bugalo gwa banganokotokela ko. 34Bakati bemilika mu bukotokelo gole la Yahwe likashwa liyenda lili pezhugwi kwabo.
35 #
Njimbo 68:1
Kwakabe kuti Bhokisi le Tjidumano tja Yahwe limilika, Mushe ebe eti, “Milikani imwi Yahwe, mupaladze zwita zwenyu, banomubenga batizhe mbeli kwenyu.” 36Kuti ha lima, ebe eti, “Buyani imwi Yahwe, ku zwiwulu zwisi zwishoma zwe Baiziraela.”
Currently Selected:
Mbalo 10: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
