Mbalo 1
1
Mbalo ye bathu ye kutanga
1 #
Mbalo 26:1-51
Kwakati Yahwe bakalebeleka na Mushe bali mu tjilambanyika tje Sinai bali mu nshasha we bushanganilo, mu zhuba le kutanga le mwedzi we bubili mu gole le bubili shule kwe basinobhuda mu shango ye Egipiti beti, 2“Balani gubungano le bathu be Iziraela, nge njudzi dzabo nenge misha yabo, mubale nlume mmwe ne mmwe nsha nge nsha. 3Balume bose be Iziraela bana makole ali makumi mabili kuyenda pezhugwi bakalizana kuyenda ku ngwa, mubabige nge makupo abo iwe na Aroni. 4Mutole nlume ng'ompela kudwa mu ludzi gumwe ne gumwe kumubhatsha ali nsholo we ng'umba ya katate babe.” 5Awa ndiwo mazina e balume banowomubhatsha: Kudwa mu ludzi gwa Rubheni, Elizuri nkololo wa Shedeuri, 6mu ludzi gwa Simiyoni, Shelumieli nkololo wa Zurishadayi 7mu ludzi gwa Juda, Nashoni nkololo wa Aminadabu, 8mu ludzi gwa Isakari, Nethanele nkololo wa Zuari, 9mu ludzi gwa Zebuluni Eliabu nkololo wa Heloni, 10kudwa mu bakololo ba Josefa ne kudwa mu bakololo ba Ifureimi, Elishama nkololo wa Amihudi ne kudwa mu Manase, Gamaliyele nkololo wa Phedahizu, 11mu Bhenjamini, Abidani nkololo wa Gideoni, 12mu Dani, Ahieza nkololo wa Amishadai, 13mu Asheri, Pagiele nkololo wa Okirani, 14mu Gadi, Eliyasafu nkololo wa Deuele, 15mu Nafutali, Ahira nkololo wa Enani. 16Ibaba ndibo bakashalugwa mu gubungano bali batungamili be njudzi dzabo ne misholo ye ng'umba dze Iziraela.
17Mushe na Aroni bakatola balume be mazina iyawa akalongolosiwa, 18ngono bakati mu zhuba le kutanga le mwedzi we bubili bakakubunganya gubungano lose bakazwikwalisa nge misha, nge ng'umba dza botate babo, bakabagwa nge mazina kudwa muna be makole ali makumi mabili kuyenda pezhugwi, mmwe ne mmwe wabo, 19koga sekwa kadwiwa Mushe ndi Yahwe, ndizo wakakwalisa bathu bali mu tjilambanyika tje Sinai.
20-46Balume bose bakabe bana makole ali makumi mabili kuyenda pezhugwi, bose bakabe bakalizana kuyenda ku ngwa, bakakwagwa nge mazina abo mmwe ne mmwe nge ludzi gugwe, kutangisa nge ludzi gwa Rubheni nkololo wa Jakubo wola. Mbalo yabo yakabe ili sahwoku:
| Ludzi | Mbalo |
|---|---|
| Rubheni | 46 500 |
| Simiyoni | 59 300 |
| Gadi | 45 650 |
| Juda | 74 600 |
| Isakari | 54 400 |
| Zebuluni | 57 400 |
| Ifureimi | 40 500 |
| Manase | 32 200 |
| Bhenjamini | 35 400 |
| Dani | 62 700 |
| Asheri | 41 500 |
| Nafutali | 53 400 |
| Bose bakabe bali | 603 550 |
47Koga ludzi gwe Balevi gwakabe gusabaligwa mu bali, 48ngobe Yahwe bakabe badwa Mushe beti, 49“Usitongo kwalisa ludzi gwe Balevi, kene kuli kubabalilanya mu bathu be Iziraela. 50Koga ubige Balevi kutjengeta nshasha we butendeki ne zwija zose zwago na zose zwimu guli, basenge bugalo gwe Ndzimu ne zwija zwago, kakale bagutjengete bagale bakagupoteleka. 51Ha bugalo gwe Ndzimu gufulusiwa, Balevi banowoguliga ngono ha bugalo gwakafanila teyiwa butshwa, Balevi banowoguteya. Ngono ha mmwe upoga angasedzela paguli abulawe. 52Baiziraela banowobambula mishasha yabo nge makupo abo, mmwe ne mmwe ebe pa nshasha uwe, mmwe ne mmwe nge gupo lile. 53Koga Balevi banowogala bakapoteleka nshasha we butendeki, kuti gubungano le bathu be Iziraela lisiwigwe nge bushongola gwangu, ngono Balevi banowotjengeta nshasha we butendeki.” 54Ndizo bathu be Iziraela bakathama kose Yahwe sekwa bakadwa Mushe.
Currently Selected:
Mbalo 1: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
