Nehemiya 5
5
Tshambilidzo ye basheti
1Ngono ngwenu kwakabe nge tjililo tjikulu mu bathu bose, balume ne bakadzi belidziwa nge bakanyikwabo be Bajuta. 2Kwakabe kuna bamwe bakabe beti “Iswi ne bakololo ne bakololokadzi bedu tatjibe banjisa, ngatishakeni mathunde atingaja kuti ndizo titjile.”
3Kukabe ne bamwe bakabe beti “Takadusa minda yedu ne minda ye zhambi ne ng'umba dzedu mbigilidzo kuti ndizo titenge mathunde mu nsi we bhamba.”
4Kakale kwakabe kuna ibabo bakabe beti “Takaadzima mari kuti tilipe lukhetho gwe minda yedu ne minda ye zhambi kuna mambo. 5Tofanana koga ne Bajuta bamwe. Bana bedu banofanana koga ne bana babo, nenguba iswi tikombeledza bakololo ne bakololokadzi bedu kuti babe balanda, bamwe be bakololokadzi bedu batjitengeswa babe balanda kale, atina simba, shango yedu ne minda yedu ye zhambi ya tjibe ye bapoga.”
6Ndakatindihwa tjililo tjabo ne ng'ong'olo dzabo azhala bushongola kwazo. 7#Kufuluka 22:25; Zwipo 25:35-37; Matama 23:19, 20Shule kwe ndakumbula kukulu, ndakatjemela makulukota ne makombgwa abadwa nditi “Mungakombeledza bakanyi kwenyu kudusa mimwiso tjini wali?” Ngono ndakabadanila gubungano gulu kwazo kuti libatjemele kwazo. 8Ngono abadwa ndikati “Ngotubula kwedu takadzutunula bakanyi kwedu be Bajuta bakabe batengesegwa be zwitjaba zwipoga, koga ngwenu imwi motengesa bakanyi kwenyu kuti ndizo tibatengesegwe!” Bakanyalala koga bakasheta dama labangadusa.
9Ngono ati ku bali “Tjithu tjamunothama atjizonaka. Apa amuzofanila tja Ndzimu wedu kuti ndizo tisibe madado ku zwita zwedu zwe zwitjaba kene? 10Pezhugwi kwa ipapo imi ne hama dzangu ne balanda bangu tobaadzima mari ne mathunde. Ngono ngatimiseni kutola mimwiso ikoku. 11Bgwilizani ngwenu minda yabo ne minda yabo ye zhambi ne minda ye mitoba ne ng'umba dzabo ne mimwiso ye mari, ne ye mathunde, ne ye nkumbi we zhambi ne mafuta izo zwamakabatolela.”
12Ngono bakandidwa beti, “Towobabgwilizila tjimwe ne tjimwe kakale akuna tjatinowoshaka mu bali. Towothama sekwa munoleba.” Ngono ndakadana bapirisiti ndikabatunisa kuti banowoshingikadza tjabaleba. 13Ndakashashamula hwomwana#5:13 Ndakashashamula hwomwana: Kushashamula hwomwana yakabe ili tjilakidzo tjelashikigwa nge tjimwe ne tjimwe. dze tjiambalo tjangu ngono ati “Ndzimu ngaushashamule nthu mmwe ne mmwe mu ng'umba iye nenge thundu imwe ne imwe usingowothama tjalebgwa. Ngaashashamugwe asale asina tjaanatjo” Ngono gubungano lose likadabila liti “Ngakujalo” ndizo bakakudza Yahwe. Ndizo bathu bakathama sekwa bakabebeleba.
14Kudwa mu tjibaka itjetjo ndakabe ndashalugwa kube nlauli mu shango ye Juda, kudwa mu gole le bumakumi mabili kunoti le bumakumi matatu ana mabili. Mu makole ali gumi lina mabili e mbuso wa Atazezasi mambo, akuna wedu, imi kene wa kanyi kwedu wakaja zojiwa zwakabe zwili zwe gobe le nlauli. 15Balauli bekutanga bakazha bakabe belemesela bathu nge kubatolela zojiwa ne nkumbi we zhambi kusingabaligwe shekele dze siliva dzili makumi manna (40) dzabakabe betolegwabo. Balanda babo bakabe betshambidzila bathu bo. Imi andizothama saibo ngotja Ndzimu. 16Koga imi ndakabe ndakazwimisila kushinga nshingo we kumusa guma, atizotongo tenga shango, bathu bose bakabe beshinga nami takabe takabhatana mu nshingo. 17Kakale ndakabe ndijisa balume bali zana ling'ompela lina makumi ali mashanu (150), Bajuta ne mamwe makombgwa kuzhe kwa ibabo be tjaba dzakapoteleka bakabe banaswi. 18Nge zhuba kwakabe kubulawa ng'ombe ili ing'ompela ne pkhwizi dzili tathatu ne hwuku mazhuba mamwe ne mamwe ali gumi ndakabe ndidusa nkumbi we zhambi wakasiya siyana uli njinji kwazo. Ngono nenguba ndakadusa zwithu zose izwezwi andizotongo shaka kupiwa gobe le zojiwa linopiwa balauli, ngobe ndakabe ndiziba kuti ikoku kungabe ntolo ungapani mu bathu.
19Mundikumbule Ndzimu wangu muna zose zwandakathamila bathu ibaba.
Kalanga Bible © Bible Society of Botswana, 2008, 2018.