Nehemiya 4
4
Nehemiya unokunda zwita zwizwe
1Kwakati Sanibalati ehwa kuti takabetimusa guma kazhala bushongola bukulu, kagwadzika kwazo ngono katangisa kadadila Bajuta, 2Ngono kaleba mbeli kwe bashingi naye ne nlauli we babhayani be Samariya eti “Bajuta ibaba basakasima banozwidwa beti banothamani wali? Banozwidwa beti banowomusa makuma abo kene? Banozwidwa beti banodusa zwibhayilo kene? Banozwidwa beti banowopedza nge zhuba kene? Banozwidwa beti bangadusa mabgwe aka vukidzigwa mu zwizhalanlota kene?”
3Tobiya we N'amoni wakabe alimile wunde naye ngono kati “Guma labanobaka ne phungubgwe ha ingatjulukila lingawa!” 4“Mutihwilileni Ndzimu wedu! Ngobe tolingigwa pasi. Bgwilizani masapa abo ku bali kakale mu baletje batapiwe se thundu yakatapiwa mu shango ye busungwa, mubaletjedze batolegwe ku shango ye busungwa. 5Musitongo bazwibhatigwa jinyo ne bubi gwa bakathama, ngobe bakatuka babaki.”
6Ngono takabaka guma lose kupoteleka ngobe bathu bakabe beshinga bakasima.
7Koga Sanibalati na Tobiya ne Baarabu ne Baamoni ne Baashidoti bakati behwa kuti ku musa makuma e Jerusalema kwakadwilila kakale banoyenda bezwina apaje na apaje ngono bakagwadza moyo kwazo. 8Bakabalukila gwanga kuti bazhe bowogwisa Jerusalema ne kuthama kuti kube ne kudzongeka muili. 9Ngono takatembezela Ndzimu wedu kakale tikabiga nlingi kuti agale akabalinga siku ne sikati.
10Nekwakajalo Bajuta bakabe bakabhata bemba beti, “Simba le bashingi lopela, kakale kuna malala manjisa anotithama kuti tisitubule kuwidza nshingo wekumusa guma!” 11Ngono zwita zwedu zwikati “Banowoti basathu bakaziba kene basathu bakatibona towobetili apajee, pakati kwabo, ngono towobabulaya ne nshingo wabo ukama.” 12Bajuta bakabaka kubapa nabo bakatibezha bakatidwa kanjinji kungabhata gumi beti “Kumwe ne kumwe kwa munoyenda banowotinginilila.”
13Ndizo pamwe ne pamwe panoboneka mu guma ndakabiga bathu nge misha yabo bakabhata zwibhayano zwakathubukana. 14Ndakati ndisina kulingisisa zwithu izwezwi amilika ngono adwa makombgwa ne makulukota ne bathu bose ati, “Musitongo batja, kumbulani Yahwe, iye nkulu kunotjenamisa, ndizo mu gwile makamu enyu ne bakololo benyu ne bakololokadzi benyu ne bakadzi benyu ne mizi yenyu.” 15Ngono zwita zwedu zwakati zwihwa kuti taziba nkumbulo wazo kakale Ndzimu waka udzibilidza, mmwe ne mmwe kabgwilila ku nshingo uwe we ku musa guma.
16Kudwa mu zhuba ilelo gwamu limwe le balanda bangu bakabe be bumba bamwe bakabhata zwibhayano zwakasiyana ngono batungamili bedu bali mile ne bathu be Juda, 17bakabe bebaka guma. Basengi be zwinobaka bakabe bezwisenga nge luboko gu n'gompela gumwe gwakabhata tjibhayano, 18mbumbi mmwe ne mmwe wakabe akadedela bukanu gugwe mu thunji tjibaka tjose eshinga. Ngono nlume iye wakabe elidza lunyanga wakabe egala pandili. 19Kudwapo ndakadwa makombgwa ne makulukota ne bathu bose nditi “Nshingo njinji kakale wakaandama ngono naswibo takalangana nge guma kwazo. 20Ngono ndizo ha muhwa lunyanga gulila mubuye mushangane naswi ikweno. Ndzimu wedu unotigwila!”
21Takadwilila nge nshingo, gwamu limwe le balume lakabhata makanu kudwa tjose busikwana kunoswika madekwana kwabhata ne nyenyedzi dzoboneka. 22Mu tjibaka itjetjo ndakadwa bathu kakale ati “Nlume mmwe ne mmwe ne mbhatshi mmwe ne mmwe balale mu Jerusalema kuti ndizo balale bali balingi busiku, ngono masikati babe bashingi.” 23Takati tinoizela imi ne bamwe nami ne balanda bangu ne balindi bangu, takaizela takaambala ntome takabhata zwibhayano zwedu.
Kalanga Bible © Bible Society of Botswana, 2008, 2018.