Nehemiya 6
6
Nehemiya unolukigwa gwanga
1Ngono ngwenu kukanotjetiwa kuna Sanibalati na Tobiya na Geshemu we N'arabu ne bamwe be zwita zwedu kuti ndakamusa guma kakale akuna ne pang'ompela pakasala mulili, nenguba mu tjibaka itjetjo ndakabe ndisathu alonga zwizhalilo mu mikoba. 2Sanibalati na Geshemu bakanditumilila ndayidzo inoti “Izha tishangane mu mmwe we mizi ye lubala gwe Ono” Koga bakabe bakazwimisila kundithama tjimwe tjakabipa. 3Ngono ndakatumila batumwa ku bali nditi babadwe bati, “Ndoshinga nshingo nkulu kwazo ndizo andingatubule kuzha ikoko. Ini ndakafanila misa nshingo ngekuzha kumuli kene?”
4Bakanditumila bathu kukabe kanna kose, koga imi abashandula nge zila ing'ompela koga.
5Nge zila yakajalo Sanibalati wakatumila nlanda uwe we bushanu ku ndili, ezha akabhata lukwalo gwakazhugwa. 6Kwakabe kwakakwagwa kuyi,
“Kwakahwika mu zwitjaba na Geshemu unosisithila kuti iwe ne Bajuta moshaka panduka, ndizo mumusa guma, kakale unoshaka kube mambo wabo, mbiko iyeyi inojalo. 7Kakale wakashalula balebesambeli kuti bathame zibiso ngekuko mu Jerusalema ‘Kuna mambo mu Juda’ Ngono ngwenu matama iyawa anowoswika mu zebe dza mambo. Ndizo ngwenu izhangeno tilebesane.”
8Ndakantumilila shandulo inoti, “Hakuna tjaunoleba tjashingikala sekwa unoleba, ngobe unozwilebela kudwa mu nkumbulo uwo koga”. 9Bose bakabe beshaka kuti totomosa bekumbula beti, “Banowotemeka mafupa ngono abatowoshinga.” Koga ngwenu Ndzimu, thamani kuti maboko angu asime.
10Zhuba limwe ndakati ndiswika mu ng'umba ya Shemaya nkololo wa Delaya iye ali nkololo wa Mehetabele wakabe akazhaliligwa mu ng'umba, kandidwa kati, “Ngatishangane ku Ng'umba ye Ndzimu ku Bugalo gwakayengemala, tizhalile mikoba ye ku Bugalo gwakayengemala, ngoti balume ibaba baswika bawokubulaya, banowozha busiku bawokubulaya.”
11Ngono ndakati, “Apa nlume unonga imi ungatizha kene? Apa nthu unonga imi ungangina mu Ng'umba ye Ndzimu ka tjila kene? Andidi kuyendako!”
12Ndakalingisisa ngono abona kuti aazotung'wa nge Ndzimu, koga wakabe endizibisa tjaabona nge kwangu ngobe Tobiya na Sanibalati bakabe bantenga. 13Wakabe atengwa kuti ndizo nditotomoke ndibe ndithama saikoku, ndibe ndithama nlandu babe bendipa zina biibi kuti ndizo bandinenele.
14Ndzimu wangu, kumbulani Tobiya na Sanibalati mu zwithu zose zwabakathama ne nlebesambeli Nowadiya ne balebesambeli bose bakabe beshaka kuti nditotomoke.
15Guma lakapedzisiwa mu zhuba le bumakumi mabili ana mashanu e mwedzi we Eluli mu mazhuba ali makumi mashanu ana mabili. 16Ngono kwakati zwita zwedu zwihwa ne kwako, zwitjaba zwakatikomba zwikatja ngono zwikalashikigwa nge kuzwigalabgwe ngobe bakabe bebona kuti nshingo iwoyu wakashingwa nge bhatsho ye Ndzimu wedu.
17Mu tjibaka itjetjo banokudziwa be Juda bakabe betumilila hwalo njinji kuna Tobiya ngono ne shandulo dzakabe dzidwa kuna Tobiya dzikadwilila dzizha kubalibo. 18Bunjinji gwe Bajuta bakabe batuna kubhatshana naye se Tobiya akabe ali nkwasha wa Shekaniya nkololo wa Ara ne nkololo uwe Jehohanani wakabe akalobola nkololokadzi wa Meshulamu nkololo wa Bherekiya. 19Bakadwilila be ndibudza zwakanaka nge kukwe mbeli kwangu bebuya bembudzabo tjandakaleba. Tobiya iye wakanditumilila hwalo kuti nditotomoke.
Kalanga Bible © Bible Society of Botswana, 2008, 2018.