Zwipo 3
3
Zwibhayilo zwe mbakisano
1“Ha kuna unobe edusa tjipo tjili tjibhayilo tje mbakisano, ha edusa ithuwo mu danga, tjili tjilume kene tjikadzi, atjiduse tjisina bulema mbeli kwa Yahwe. 2Ngono abige luboko gugwe pezhugwi kwe nsholo we tjipo tjitje, abe etjibhayila pa nkoba we nshasha we bushanganilo, ngono bakololo ba Aroni bapirisiti banyase tjibeso tjinopisigwa zwibhayilo nge malopa betjipoteleka. 3Ngono mu tjibhayilo tje mbakisano, tjili tjipo tjinopisiwa mu moto kupisigwa Yahwe, ayise lizwizwi ne mafuta wose e zwimukati, 4ne so mbili ne mafuta adzo ne lutembe gwe moyo, azwidusilanye ne so. 5Ndizo bakololo ba Aroni banowozwipisila mu tjibeso tjinopisigwa zwibhayilo pezhugwi kwe tjibhayilo tjinopisiwa, itjetji tjipezhugwi kwe hwuni dzimu moto, tjili tjipo tjinopisiwa mu moto, tjili nnuhwo unonuhwa zwinozipa kupiwa Yahwe.
6“Ha tjipo tjitje tje tjibhayilo tje mbakisano tjinopiwa Yahwe tjili tjinodwa mu ngubi, tjili tjilume kene tjikadzi, atjiyise tjisina bulema. 7Ha eyisa pkhwizana kube tjipo tjitje, ndizo aiyise mbeli kwa Yahwe, 8abige luboko gugwe pezhugwi kwe nsholo we tjipo tjitje, ngono atjibhaye mbeli kwe nshasha we bushanganilo, ngono bakololo ba Aroni banyase tjibeso tjinopisigwa zwibhayilo nge malopa betjipoteleka. 9Ndizo mu tjibhayilo tje mbakisano, tjili tjipo tjinopisiwa mu moto kupisigwa Yahwe, aduse mafuta atjo, mafuta wose e bhesu, ali lungunule kudwa pa thunji ne lizwizwi ne mafuta wose e zwimukati, 10ne so mbili ne mafuta adzo ne lutembe gwe moyo azwidusilanye ne so. 11Ngono mpirisiti unowopisila tjibhayilo mu tjibeso tjinopisigwa zwibhayilo zwili zojiwa zwe zwipo zwinopisiwa mu moto zwipisigwa Yahwe.
12“Ha tjipo tjitje ili mbudzi, ndizo unoiyisa kuna Yahwe, 13abige luboko gugwe pezhugwi kwe nsholo wayo, abe eibhayila mbeli kwe nshasha we bushanganilo, ngono bakololo ba Aroni banyase tjibeso tjinopisigwa zwibhayilo nge malopa kutjipoteleka. 14Ndizo ayise zwimu ili, kube tjipo tjinopisiwa mu moto tjitje, tjinopisigwa Yahwe, lizwizwi ne mafuta wose e zwimukati, 15ne so mbili ne mafuta adzo kudwa ku thunji ne lutembe gwe moyo azwidusilanye ne so. 16Ngono mpirisiti unowozwipisila mu tjibeso tjinopisigwa zwibhayilo kube zojiwa zwe zwipo zwinopisiwa mu moto zwipisigwa Yahwe, zwili nnuhwo unonuhwa zwinozipa. Mafuta wose nge a Yahwe. 17Ibe ndaulo isingapele kuyenda nge zwizekugwana zwenyu mu magalo enyu wose, musitongoja mafuta kene malopa.”
Currently Selected:
Zwipo 3: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
