Zwipo 2
2
Tjipo tje mathunde
1“Ha nthu eyisa tjipo tjili tje mathunde kuna Yahwe, tjipo tjitje tjibe tjili bgwisa gwakanathiwa, adile mafuta muguli, alonge ne motsha unonuhwa zwinozipa muguli. 2Abe eguzhisa ku bapirisiti, bakololo ba Aroni. Ngono mpirisiti anokole luboko guli zhele bgwisa ne mafuta ne motsha wago wose, apise ikoku kuli ikumbuludzo tje gobe le tjipo tjapisigwa Yahwe mu tjibeso tjinopisigwa zwibhayilo, tjipo tjinopisiwa mu moto, uli nnuhwo unonuhwa zwinozipa kuna Yahwe. 3Ngono kunowobe kwasala kwe tjipo tje mathunde ngekwa Aroni ne bakololo babe, ikoku kwakayengemala kwazo ngoti kumwe kwe tjipo tjinopisiwa mu moto tjipisigwa Yahwe.
4“Ha uzhisa tjipo tjili tjiwunga tjakabhikwa nge masimbe, ngatjibe tjakavangwa tjisina mbidzo. Zwibe zwili zwiwunga zwisina mbidzo zwe bgwisa gwakanathiwa gwakashanganyiwa ne mafuta, kene makokisi akazhodziwa mafuta.
5“Ngono ha tjipo tjili tjipo tje mathunde, tjili tjiwunga tjakabhikiwa nge pani, tjibe tjili tje bgwisa gwakanathiwa gusina mbidzo, gwakashanganyiwa ne mafuta. 6Utjikwamulanye ube utjidila mafuta, tjipo tje mathunde.
7“Ngono ha tjipo tjili tjipo tje mathunde tjakabhikwa nge pani, tjibe tjakavangwa nge bgwisa gwakanathiwa gwakashanganyiwa ne mafuta. 8Ngono uzhise kuna Yahwe tjipo tje mathunde tjakavangwa nge zwithu izwezwi, ngono ha tjizhisiwa ku mpirisiti, unowotjiyisa pa tjibeso tjinopisigwa zwibhayilo. 9Ngono mpirisiti unowonokola mu tjipo itjetji tje mathunde gobe le ikumbuludzo, ebe episa ikoku mu tjibeso tjinopisigwa zwibhayilo, tjili tjipo tjinopisiwa mu moto kube nnuhwo unonuhwa zwinozipa kuna Yahwe. 10Ngono kunowobe kwasala kwe tjipo tje mathunde kowobe kwa Aroni ne bakololo babe, ikoku kumwe kwakayengemala kwazo kwe zwipo zwinopisiwa mu moto zwipisigwa Yahwe.
11“Akuna tjipo tje mathunde tjinopiwa Yahwe tjinovangwa nge mbidzo. Usitongopisa mbidzo kene butji gwe nyutji tjili tjipo tjinopisiwa mu moto kupisigwa Yahwe. 12Zwitshwa zwe minda zwinotanga bidwa uzwizhise kuna Yahwe gole ne gole zwili zwipo, koga zwisitongopisiwa mu tjibeso tjinopisigwa zwibhayilo. 13Tjipo tjimwe ne tjimwe tjitjo tje mathunde tjaunozhisa kuna Yahwe, utjilonge mwenyu, usitongoletja longa mwenyu, mwenyu umilile tjidumano tjisingapele pakati kuko ne Ndzimu uwo. Ulonge mwenyu mu zwipo zwizo zose zwe mathunde. 14Ha uzhisa tjipo tje zwitshwa zwe kutanga zwe minda kuna Yahwe, abe ali mathunde akababiwa nge moto, ali mu tjiako tjitshwa, akakhwiwa. 15Udile mafuta muali, ulonge ne motsha muali, ikoku, tjipo tje bgwisa. 16Ngono mpirisiti unowopisa tjipo itjetji lili gobe le ikumbuludzo tje gobe le mathunde akakhwiwa, ntome kwe bgwisa ne kwe mafuta ne motsha wose, tjili tjipo tjinopisiwa mu moto kupisigwa Yahwe.”
Currently Selected:
Zwipo 2: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
